Henplais 13:20-25
Nqe cim:
“Thov Vajtswv tus uas pab nej tau zoo nyob kaj siab lug pub txhua yam zoo uas nej yuav tsum muaj rau nej, nej thiaj ua tau raws li Vajtswv lub siab nyiam. Thiab thov Vajtswv tshoov peb cov uas ntseeg Yexus Khetos lub siab kom peb ua tej uas haum Vajtswv siab” (Henplais 13:21)
Lus nug rau sawvdaws xav:
– Tus sau tsab ntawv Henplais thov Vajtswv rau cov ntseeg licas?
– Nws xav kom lawv ua licas rau tej lus qhuab ntuas?
– Kev zeem paub tias peb tabtom nyob hauv lub tsevneeg loj sab kev ntseeg txhawb peb txojkev ntseeg licas?
Nyob hauv feem xaus ntawm tsab ntawv Henplais, tus sau xa nws lo lus thov Vajtswv, lus tu moo thiab lus foom hmoov mus rau cov uas nyeem. Nyob hauv nqe 20-21, tus sau taij thov hais tias: “Thov Vajtswv tus uas pab nej tau zoo nyob kaj siab lug pub txhua yam zoo uas nej yuav tsum muaj rau nej, nej thiaj ua tau raws li Vajtswv lub siab nyiam. Thiab thov Vajtswv tshoov peb cov uas ntseeg Yexus Khetos lub siab kom peb ua tej uas haum Vajtswv siab”. Lo lus “pub” ntawm no nyob hauv lus Kilis muaj lub ntsiab hais tias “ua rau ib tug neeg phim rau ib yam dabtsi twg”. Tus sau tabtom thov Vajtswv pub rau cov ntseeg muaj txhua yam zoo kom lawv muaj peevxwm ua raws li tus Tswv lub siabnyiam. Tsis muaj ib tug twg muaj peevxwm ua lubneej ntseeg los ntawm tus kheej lub zog tiamsis yuav tsum ua neej los ntawm tej yam Vajtswv pub “hauv Yexus Khetos”, lossis dhau ntawm tej uas tus Tswv ua hauv peb thiab dhau ntawm peb. Txawm yog lubneej ntawm tus ntseeg ntsib ntau yam kev sim siab, txomnyem, los peb yeej ua tus Tswv tsaug vim Nws pub rau peb muaj txhua yam txaus kom ua tau lubneej haum Nws siab.
Tej lus thov Vajtswv no kuj yog hais sau zog tej ntsiab lus tseemceeb hauv tsab ntawv Henplais, ntawd yog tus Tswv tau ua txhua yam zoo kom peb ua tau lubneej pub rau Nws. Tus sau xav kom cov ntseeg “ua siab ntev mloog tej lus” uas nws “sau tuaj ntuas” lawv (nqe 22). Tej lus qhia twb tshajtawm lawm, tiamsis qhov tseemceeb yog cov ntseeg yuav tsum qhib siab txais yuav los ntawm kev txo hwjchim, ib siab kawm xyaum, thiab vamkhom tus Tswv txoj koob hmoov ua raws li tej lus qhia ntawd. Txawm yog tej lus qhia yuav zoo npaum licas los yog tsis siv tau rau hauv lubneej ces kuj tsis muaj qabhau. Tus Tswv tej lus tsis yog tsuas ci kaj rau lub siab, txojkev xav xwb, tiamsis yuav tsum yog “lub teeb uas taws ua kuv ntej thiab ci rau kuv txoj haukev” (Ntawv Nkauj 119:105), txhais tau hais tias yuav tsum taw kev rau peb lubneej txhua hnub.
Ua ntej xaus tsab ntawv, tus sau hais txog nws tus kheej kev ntshaw uas yog xav coj Timautes tuaj xyuas cov ntseeg. Nws kuj sawvcev ntawm Pawg Ntseeg Italias hais lus noj qab nyob zoo rau sawvdaws. Qhov ntawd qhia pom txojkev hlub hauv tus Tswv tshwm muaj txhua qhov. Zoo siab kawg li thaum paub hais tias peb yog ib tug hauv lub tsevneeg loj sab kev ntseeg, txawm yog sawvdaws nyias muaj nyias chaw nyob, nyias yog nyias ib haivneeg, los peb koom tib txojkev ntseeg Cawmseej Yexus thiab koom ua lubneej haum tus Tswv siab. Txojkev sib raug zoo no ntxiv lub zog rau txhua tus ntseeg kom txiav txim siab ua lubneej pub rau tus Tswv, koom tes txhim kho Pawg Ntseeg ntawm thajchaw peb nyob thiab thoobplaws qab ntuj.
Thov Vajtswv,
Tus Tswv, thov pub nyuam yaus muaj txaus txhua yam los ua lubneej haum Koj siab. Thov pab nyuam yaus nco ntsoov Koj tej lus qhia kom mob siab rau ntseeg thiab coj Koj txoj koob hmoov mus rau lwm tus. Nyuam yaus tuav Yexus Khetos lub npe thov, Amees.
Peb tabtom siv tej yam zoo uas tus Tswv pub licas kom ua tau lubneej haum Nws siab?
Nyeem Vajluskub hauv peb lub xyoos: II Kevcai 21
Kênh Youtube BHKTHN:
