Klei Aê Diê Blŭ: Hêbrơ 13:20-25
Êlan kliăng: “Brei kơ diih klei dưi ngă djăp mta bruă jăk, čiăng kơ diih dưi ngă klei Ñu čiăng, êjai Ñu mă bruă hlăm diih klei bi mơak kơ Ñu hlăm Yêsu Krist…” (Hêbrơ 13:21)
Klei êmuh ksiêm mĭn: Si ngă pô čih hră Hêbrơ wah lač kơ phung bi đru đăo? Ya klei ñu čiăng kơ digơ̆ lŏ wĭt ngă hŏng klei ñu mtă? Klei thâo kơ drei dôk hlăm sa boh gŏ sang phung đăo prŏng si klei bi mđĭ ai kơ klei đăo drei?
Hlăm kdrêč bi ruê̆ hră mơĭt kơ phung Hêbrơ, pô čih mơĭt kơ phung dlăng hră ñu mơĭt klei wah lač, klei kkuh čhưn, leh anăn klei hơêč hmưi kơ digơ̆. Hlăm êlan 20-21, pô čih hră mơĭt akâo kơ Aê Diê klei êđăp ênang “brei kơ diih klei dưi ngă djăp mta bruă jăk, čiăng kơ diih dưi ngă klei Ñu čiăng”. Boh blŭ “brei” tinei hlăm boh blŭ phŭn klei Grek lŏ mblang jing “mjing sa čô mnuih jing mnuih guôp leh anăn năng kluôm dhuôm hŏng sa mta klei.” Pô čih dôk akâo kơ Aê Diê mprăp brei kơ phung đăo djăp mta klei jăk čiăng kơ digơ̆ mâo djăp klei dưi čiăng dưi ngă tui si klei Aê Diê čiăng hŏng klei bi mơak kơ Ñu. Amâo mâo pô dưi hdĭp hŏng klei đăo hŏng klei ktang ñu pô ôh, ƀiădah hdĭp hlăm ya klei Aê Diê brei kơ ñu “hlăm Yêsu Krist”, čiăng lač jih jang bruă Ñu ngă hlăm drei leh anăn găn hŏng drei. Wăt tơdah klei hdĭp phung đăo kơ Krist găn lu klei lông dlăng, klei dleh dlan dưn, ƀiădah drei ăt bi mni kơ Aê Diê nanao kyuadah Ñu mprăp leh kơ drei djăp mta klei čiăng kơ drei dưi hdĭp bi mơak kơ Ñu.
Klei wah lač anei jing klei klah čŭn kơ jih jang klei kñăm čiăng phŭn hlăm hră Hêbrơ mơh, anăn jing Aê Diê ngă leh djăp mta bruă jăk čiăng drei dưi hdĭp kơ Ñu. Pô čih hră mơĭt čang hmăng kơ phung đăo hŏng klei mơak “tŭ bĕ klei kâo blŭ mtrŭt diih” (êlan 22). Klei Aê Diê Blŭ arăng mtô leh, ƀiădah klei yuôm jing phung đăo srăng pŏk ai tiê mă tŭ hŏng klei luă gŭ, kriăng hriăm leh anăn knang kơ klei pap Aê Diê mă yua klei bi mtô anăn. Klei arăng mtô jăk mơai dưn mơh, ƀiădah tơdah amâo mă yua hlăm klei hdĭp ôh snăn klei mtô anăn ăt jing hơăi mang mơh. Klei Aê Diê Blŭ amâo djŏ knŏng mtrang mngač kơ ai tiê, klei mĭn ôh, ƀiădah wăt jing “pui kđen kơ jơ̆ng kâo, leh anăn klei mngač kơ êlan kâo” mơh (Klei Mmuñ Hđăp 119:105), čiăng lač Klei Aê Diê Blŭ srăng atăt gai klei hdĭp drei grăp hruê.
Êlâo kơ bi ruê̆ hră mơĭt, pô čih hră mơĭt bi êdah kơ klei mĭn ñu pô čiăng snăk dưi nao čuă čhưn phung đăo mbĭt hŏng Y-Timôthê. Msĕ mơh, ñu bi ala kơ Phung Sang Aê Diê ti čar Itali mơĭt klei kkuh čhưn kơ digơ̆. Klei anăn brei ƀuh klei khăp sĭt suôr hlăm Khua Yang nao tar ƀar anôk. Mơak êdimima tơdah thâo kơ drei pô jing sa čô mnuih hlăm gŏ sang phung đăo prŏng snăk, jing phung anak wăt tơdah mdê bi anôk dôk, mdê djuê ana, ƀiădah mâo mbĭt sa klei đăo kơ Yêsu Krist leh anăn mâo mbĭt sa klei kñăm čiăng hdĭp bi mơak kơ Ñu. Klei bi mguôp anei yơh brei kơ grăp čô phung đăo mâo klei ktang čiăng kơ digơ̆ čuăn hdĭp kơ Khua Yang nanao, đru bi mguôp hlăm bruă mkŏ mjing Phung Sang Aê Diê hlăm anôk pô leh anăn wăt Phung Sang Aê Diê tar ƀar lăn ala.
Si ngă drei dôk yua djăp mta klei jăk Aê Diê mprăp leh čiăng hdĭp bi mơak kơ Ñu?
Wah lač: Ơ Khua Yang, akâo kơ Ih mprăp brei djăp mta klei yuôm kơ kâo čiăng kâo dưi ngă klei Ih čiăng leh anăn ngă klei bi mơak kơ Ih. Đru kâo hdơr nanao kơ klei Ih mtă čiăng kơ kâo dôk sĭt suôr leh anăn hưn klei Ih pap kơ jih jang mnuih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
