Nkauj Quaj Ntsuag 1:1-8
Nqe cim:
“Tus Tswv ua rau nws raug kev txomnyem vim tej kev txhaum uas nws ua” (Nkauj Quaj Ntsuag 1:5b).
Lus nug rau sawvdaws xav:
– Tus cevlus Yelemis hais txog ob tug duab sib txawv twg ntawm lub nroog Yeluxalees thaud thiab nimno?
– Qhov keebtiv twg ua rau muaj kev puas li ntawd?
– Peb pheej ua dabtsi thaum ntsib kev nyuaj nyob hauv lub neej?
Phau ntawv Nkauj Quaj Ntsuag yog ib zaj nkauj hais txog lub nroog Yeluxalees raug puastsuaj, sau tom qab uas cov neeg Yudas raug ntes mus ua qhev. Ntau leej pom zoo hais tias tus uas sau phau ntawv no yog tus cevlus Yelemis. Yelemis tsis sau cov lus qhib thawj ntev, Yelemis ncaj qha rau cov teebmeem uas nws xav hais. Yelemis pom “lub nroog no” hnub thaud muaj neeg coob heev, muaj koob nto npe, zoo li ib tug poj vajntxwv, muaj phoojywg coob, txhua tus nyiam, saib taus, vammeej, muaj kev lomzem zoo siab. Tiamsis txhua yam ntawd tsuas yog thaud xwb, nimno tus Tswv haivneeg txomnyem kawg. Thaud coob tiamsis nimno tsuas yog ib tug, thaud ua loj tau txhua tus neeg paub, nimno zoo li tus poj ntsuam txomnyem, poob qis nyob hauv lub tebchaws, tsis muaj leejtwg hmov tshua; tiamsis yuav tsum them se, raug ua qhev, raug yuam ua haujlwm hnyav; tej roojvag thaud txais qhua txhua qhov tuaj ua tej kevcai tseemceeb (nqe 4), nimno nyob ntsiag to tsis muaj neeg tuaj.
Lub nroog uas tus cevlus Yelemis hais yog lub nroog Yeluxalees, Yelemis muab piv zoo li ib tug pojniam uas sawvdaws nyiam tiamsis nimno dhau los ua phem ua qias, raug tej tebchaws thuam. Raws li lwm haivneeg ntsia thiab tus uas sau phau ntawv pom, nimno cov neeg Yudas thiab lub nroog Yeluxalees yuav raug tej kev txob thuam, saib tsis taus, tsis dawbhuv thiab txaus txajmuag kawg li, zoo yam li ib tug pojniam liabqab (nqe 8a).
Tus Tswv haivneeg yuav ua neej nyob rau lub tsamthawj zoo li ntawd, vim “Yeluxalees rov ua rau nws vuabtsuab heev vim nws txojkev txhaum.” (nqe 8b), thiab “Tus Tswv ua rau nws raug kev txomnyem vim tej kev txhaum uas nws ua;” (nqe 5b). Tu siab rau yus haivneeg thaum raug tej xwm no, tus cevlus Yelemis quaj ntsuag rau nws haivneeg zoo ib yam li quaj rau nws tus kheej. Txawm yog li ntawd los, thaum nyob rau lub tsamthawj zoo li ntawd, Yelemis tsis yog tsuas pom kev nyuaj siab zaum tsaws quaj xwb, tiamsis Yelemis ntsia pom meej qhov keebtiv twg ua rau lawv raug txomnyem li ntawd.
Peb pheej ntsia yav tas los, muab tej ntawd los piv rau tamsim no ua rau yus nyuaj siab cem tus kheej thiab chim, peb tsis ntsia qhov keebtiv uas zoo li Yelemis pom. Quaj rau tej kev txomnyem ces yuav ua rau peb poob siab thiab tws kev, tas kev cia siab. Txhua zaus uas raug tej kev txomnyem cia li ntsia yus tus kheej, txo hwjchim mus cuag Vajtswv thov Nws qhia lub keebtiv twg ua rau peb raug tej ntawd. Ua li ntawd, tsis yog peb ua kom peb sawv tau ruaj khov thaum raug txomnyem xwb, tiamsis paub tig kiag los lees txim kom rov tau lub neej zoo uas tus Tswv pub.
Thov Vajtswv,
Vajtswv tus uas dawbhuv! Thov Koj qhia kom nyuam yaus muaj tus cwjpwm tsimnyog thaum raug kev txomnyem, paub qaij deb tej txhaum tsis zoo, tsis chim thaum ntsib kev nyuaj, tiamsis txo hwjchim los cuag Koj, nyob hauv Koj txojkev hlub. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Nyeem Vajluskub hauv peb lub xyoo: Teev Npe 12
Kênh Youtube BHKTHN:
