Klei Aê Diê Blŭ: Klei Čŏk Hia 1:1-8
Êlan kliăng: “Kyuadah Yêhôwa brei ñu tŭ klei knap kyua klei soh ñu lu đei” (Klei Čŏk Hia 1:5b)
Klei êmuh ksiêm mĭn: Ya dua pŏk rup bi klăk Khua pô hưn êlâo Y-Yêrimi bi êdah kơ ƀuôn Yêrusalem hlăk êlâo leh anăn ară anei? Mơ̆ng mâo klei knap mñai msĕ snăn lĕ? Ya drei khăng ngă tơdah bi tlă anăp hŏng klei knap mñai hlăm klei hdĭp?
Hdruôm hră Klei Čŏk Hia jing sa pŏk hdruôm hră klei duê čih klei čŏk hia kơ ƀuôn Yêrusalem dlưh rai, arăng čih hdruôm hră anei leh phung Yuđa nao jing mnă sui thŭn leh. Mâo lu mnuih bi tŭ ư Khua pô hưn êlâo Y-Yêrêmi yơh jing pô čih hdruôm hră anei. Amâo kma blŭ dlông ôh, ñu hlŏng blŭ mtam kơ klei ñu čiăng bi êdah hŏng klei ñu jing sa čô pô hưn bi sĭt kơ klei hƀuê ênuk. Ñu ƀuh ti ală kơ “ƀuôn anei” hlăk êlâo bŏ hŏng mnuih ƀuôn sang, bŏ hŏng klei dưi, jing msĕ si sa čô mtao mniê, mâo lu mah jiăng, lu pô khăp, lu pô mpŭ, mâo lu klei mdrŏng sah, klei mơak mñai. Ƀiădah ară anei, jih jang klei kdrưh kơang anăn jing klei êgao leh, bi ară anei hin phung ƀuôn sang Aê Diê bŏ hŏng klei knap mñai. Hlăk êlâo bŏ hŏng mnuih ƀuôn sang, ară anei dôk hjăn, hlăk êlâo jing prŏng mâo lu mnuih thâo, ară anei jing msĕ si mniê djiê ung ƀun pliê hlăm phung ƀuôn sang, amâo mâo pô uêñ mĭn ôh; leh anăn jing msĕ si hlŭn, tŭ klei jing mnă, mă bruă hŏng klei suăi; hlăk êlâo ƀăng jang ñu drông lu mnuih hriê bi kƀĭn hlăm hruê knăm yuôm (êlan 4); ară anei ƀăng jang ñu jing ênguôl amâo mâo pô mŭt kbiă ôh.
Ƀuôn Khua pô hưn êlâo Y-Yêrêmi lač anăn jing ƀuôn Yêrusalem yơh, ñu bi msĕ ƀuôn Yêrusalem jing msĕ si sa čô mniê mâo lu mnuih khăp hơiêng ƀiădah ară anei jing hĕ čhŏ, kyua klei anăn mâo lu ƀuôn ala mtao tlao mưč kơ ñu. Hlăm ală phung tue leh anăn tui si klei pô čih hdruôm hră ƀuh, ară anei hin phung Yuđa leh anăn ƀuôn Yêrusalem dôk tŭ klei arăng bi hêñ, klei arăng bi êmut leh anăn bŏ hŏng klei hêñ amâo mdê ôh hŏng sa čô mniê dôk lưng mlŭn (êlan 8b).
Phung ƀuôn sang Aê Diê hdĭp hlăm klei knap mñai msĕ snăn kyuadah “Ƀuôn Yêrusalem ngă soh kjham leh, kyuanăn ñu jing hĕ čhŏ” (êlan 8a), leh anăn “kyuadah Yêhôwa brei ñu tŭ klei knap kyua klei soh ñu lu đei” (êlan 5b). Ênguôt kơ klei găp djuê pô tŭ klei knap mñai, Khua pô hưn êlâo Y-Yêrêmi čŏk hia kơ klei knap găp djuê ñu msĕ si kơ ñu pô. Ƀiădah lĕ, tơdah dôk hlăm klei knap mñai anăn, amâo djŏ ôh pô čih hdruôm hră ƀuh mă knŏng klei knap mñai leh anăn knŏng dôk gŭ čŏk hia đuč, ƀiădah yuôm hĭn jing ñu ƀuh mơh phŭn agha atăt truh kơ klei knap mñai msĕ snăn.
Drei khăng dlăng wĭt kơ ênuk êgao leh čiăng bi msĕ hŏng klei knap ară anei hin leh anăn krao ƀuah kơ klei hdĭp drei pô leh anăn hdĭp hŏng klei ênguôt hnĭng, ƀiădah drei amâo ƀuh ôh phŭn agha kơ klei knap anăn msĕ si Khua pô hưn êlâo Y-Yêrêmi ƀuh leh. Knŏng čŏk hia kơ klei knap mñai đuč srăng atăt drei kơ klei êdu ai leh anăn srăng atăt truh kơ klei luč klei čang hmăng, amâo lŏ thâo bĭt êlan msir mkra ôh. Grăp blư̆ tuôm hŏng klei knap mñai, brei drei lŏ dlăng wĭt kơ drei pô, hriê kơ Aê Diê hŏng klei luă gŭ čiăng Ñu ktrâo brei ya ngă mâo hĕ klei knap mñai msĕ snăn lĕ. Hŏng klei anăn drei srăng dưi dôk kjăp hlăm klei knap mñai leh anăn kmhal hĕ mtam kơ klei soh čiăng dưi mă tŭ klei bi mrâo mơ̆ng Khua Yang.
Ya knuih drei mâo hŏng Khua Yang tơdah bi tlă anăp hŏng klei knap mñai?
Wah lač: Ơ Aê Diê Pô doh jăk! Brei kâo thâo ngă klei djŏ tơdah tuôm hŏng klei knap mñai, djăl thâo kral klei soh kâo ngă leh, amâo mâo klei phĭ ôh hŏng klei knap mñai kâo dôk bi tlă anăp, ƀiădah hŏng klei luă gŭ hriê kơ Ih čiăng akâo klei pap mơ̆ng Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Yap 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
