Klei Aê Diê Blŭ: Klei Bi Hriêng 27:12-13
Êlan kliăng: “Mnuih thâo răng ƀuh klei jhat leh anăn đuĕ dăp, ƀiădah phung mluk hlŏng nao phă anăp leh anăn tŭ klei knap mñai” (Klei Bi Hriêng 27:12)
Klei êmuh ksiêm mĭn: Ya klei tŭ dưn mâo mơ̆ng klei thâo răng? Ya boh jhat srăng tŭ tơdah kƀah klei thâo răng? Si drei srăng răng hlăm klei hdĭp?
Klei Bi Hriêng 27:12-13 bi êdah klă anôk mdê mnuih thâo mĭn leh anăn mnuih mluk, kñăm kơ boh yuôm klei thâo tĭng ksiêm leh anăn thâo dlăng kbưi ƀuh êlam hlăm klei bi tlă anăp hŏng klei lông dlăng hlăm klei hdĭp.
Mnuih thâo mĭn ƀuh klei jhat leh anăn đuĕ dăp. Diñu thâo kral klei jhat srăng truh leh anăn duah êlan čiăng mâo klei êđăp ênang mơ̆ng klei srăng truh. Čiăng dưi mâo klei anăn, brei bi mâo hĕ klei thâo mĭn kdlưn êgao hĭn kơ klei thâo mĭn bhiăn mâo, klei anei knŏng mâo mơ̆ng klei brei mơ̆ng Aê Diê jing akŏ klei thâo mĭn. Hdĭp hlăm lăn ala mâo djăp mta klei rŭng, mnuih thâo mĭn mpŭ kơ Aê Diê mâo Aê Diê mtrang mngač brei thâo kral klei jhat leh anăn thâo si srăng ngă čiăng răng mgang ñu pô. Mnuih kƀah klei thâo răng srăng mă tŭ boh jhat amâo yŏng thâo ôh. Diñu amâo mđing amâodah amâo thâo ôh kơ klei jhat dôk jŭm dar diñu. Jih jang klei diñu ngă kƀah klei thâo mĭn amâodah amâo mâo uêñ ôh ti knhal tuč diñu amâo srăng tlaih ôh kơ boh jhat. Drei ăt mưng leh mơh hŏng boh jhat mơ̆ng klei kƀah klei thâo răng, tăp năng anăn jing boh jhat kơ drei pô kbiă mơ̆ng klei čuăn ngă hŏng klei ruăt, amâodah boh jhat kbiă mơ̆ng klei blŭ amâodah bruă ngă bi kah mbha phung, amâodah boh jhat kơ klei hdĭp myang kbiă mơ̆ng klei tui duah klei thâo mĭn êjai bhiâo ti lăn ala anei.
Klei Bi Hriêng 27:13 lŏ mñă kơ boh yuôm mơ̆ng klei thâo răng leh anăn klei čuăn ngă hŏng klei thâo mĭn. Klei mtô kơ klei yuôm: “Djă pioh čhiăm ao sa čô tue čiăng ngă klei rơ̆ng” leh anăn “brei ñu mâo mnơ̆ng mgơ̆ng mơ̆ng pô rơ̆ng kơ mniê tue” kčĕ kơ klei brei mâo klei thâo mĭn leh anăn mĭn bi nik hlăm klei blei mnia, thâo kral klei jhat srăng truh amâo mâo čiăng ôh kbiă mơ̆ng bruă ngă kƀah klei mĭn leh anăn kƀah klei thâo răng.
Wăt tơdah thâo kiă kriê prăk hŏng klei thâo mĭn, brei thâo răng mơh hlăm klei bi rŏ leh anăn bi mguôp hlăm ƀuôn sang, amâodah bruă kiă kriê ngăn drăp leh anăn mmông găl Khua Yang jao leh kơ drei, mnuih thâo mĭn mpŭ kơ Aê Diê jing mnuih thâo kral boh yuôm kơ klei thâo răng leh anăn ñu thâo ƀuh kbưi. Hŏng klei djă pioh thâo tĭng ksiêm leh anăn thâo dlăng kbưi mơ̆ng sa čô mnuih thâo mĭn, drei dưi răng mgang drei pô leh anăn phung drei khăp mơ̆ng boh jhat amâo năng mâo ôh, leh anăn rơ̆ng kjăp kơ drei jing phung kiă kriê sĭt suôr prăk kăk leh anăn klei bi mguôp Khua Yang jao. Akâo Khua Yang đru drei hmư̆ klei mtă brei thâo răng, thâo kral klei huĭ hyưt djiêo gah leh anăn ngă klei thâo răng čiăng dưi mâo klei êđăp ênang hlăm klei thâo mĭn mơ̆ng Klei Aê Diê Blŭ. Brei klei hdĭp drei jing klei hưn bi sĭt kơ klei myang dưi bi mlih klei hdĭp kyua klei thâo mĭn mơ̆ng Khua Yang, ktŭng hrip mnuih mkăn hriê kơ klei čang hmăng kjăp sĭt mâo knŏng hlăm Yang Krist đuč.
Ya klei drei srăng ngă čiăng bi mđĭ klei thâo răng hlăm klei hdĭp?
Wah lač: Ơ Khua Yang, đru kâo thâo răng leh anăn thâo mĭn hlăm klei hdĭp čiăng răng mgang kâo pô, čiăng dưi weh đuĕ kơ boh jhat amâo năng mâo ôh, leh anăn bi guh kơang kơ Anăn Ih hŏng klei hdĭp kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 112-113
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com\
Kênh Youtube BHKTHN:
