Klei Aê Diê Blŭ: I Bruă Mtao 17:17-24
Êlan kliăng: “Kâo jing Yêhôwa, Pô bi hlao ih.” (Klei Kbiă 15:26)
Klei êmuh ksiêm mĭn: Ya klei truh kơ mniê djiê ung ti ƀuôn Sarepta? Ya klei Khua pô hưn êlâo Y-Êli ngă leh, leh anăn si boh tŭ dưn? Mơ̆ng klei anăn, drei thâo kral si Pô Khua Yang jing, leh anăn si klei drei pô bi knal?
Aê Diê yua leh mniê djiê ung ti ƀuôn Sarepta pioh čiêm Khua pô hưn êlâo Y-Êli hlăm sa wưng. Leh anăn bhiâo riâo rit anak êkei gơ̆ ruă leh anăn amâo lŏ bi êwa ôh. Êjai dôk rŭng ênguôt, gơ̆ ƀuah kơ Khua pô hưn êlâo Y-Êli, pô dôk jưh hlăm sang ñu. Gơ̆ mĭn Aê Diê bi kmhal leh gơ̆ kyua klei soh gơ̆ ngă leh, leh anăn brei anak gơ̆ djiê. Hruê anei, tăp năng phung anak Aê Diê ăt mâo klei mĭn msĕ si gơ̆ mơh tơdah găn klei knap mñai hlăm klei hdĭp.
Khua pô hưn êlâo Y-Êli amâo bi mgăl wĭt hŏng mniê djiê ung anei ôh, ñu knŏng mtă brei gơ̆ brei anak êkei gơ̆ kơ ñu, leh anăn ñu pŭ ba hđeh anăn kơ adŭ dlông anôk ñu pĭt, kwưh akâo kơ Aê Diê lŏ bi hdĭp hđeh anăn. Anei jing sa bruă klei đăo. Ñu amâo êdu ai amâodah rŭng răng ôh, ƀiădah đăo kjăp kơ Aê Diê ñu dôk mă bruă. Aê Diê jing Pô čiêm ñu mbĭt hŏng dua amĭ anak mniê djiê ung hŏng klei yuôm bhăn hlăm sa wưng sui dlông, snăn Aê Diê srăng khăp pap, amâo lui anak mniê djiê ung anei djiê bhiâo riâo rit ôh. Ñu đăo kơ Aê Diê mâo hdră kñăm hlăm jih jang bruă Ñu. Aê Diê hmư̆ leh klei kwưh akâo mơ̆ng Khua pô hưn êlâo Y-Êli. Ñu brei “Mngăt hđeh anăn lŏ wĭt hlăm gơ̆, leh anăn gơ̆ lŏ hdĭp”. Ñu pŭ hđeh anăn trŭn ba gơ̆ jao kơ mniê djiê ung leh anăn blŭ hŏng klei ktang: “Dlăng bĕ, anak êkei ih dôk hdĭp” (êlan 22-23).
Anei jing klei wah lač Aê Diê hmư̆ leh anăn lŏ bi hdĭp tal êlâo hĭn hlăm Klei Aê Diê Blŭ. Boh tŭ dưn mơ̆ng bruă ngă yuôm bhăn lŏ bi hdĭp anak êkei mniê djiê ung anei, anăn jing klei gơ̆ thâo kral Khua pô hưn êlâo Y-Êli jing mnuih Aê Diê sĭt. Gơ̆ hưn klă klei gơ̆ đăo kơ Aê Diê phung ƀuôn sang Israel jing Pô ktang myang. Klei Aê Diê blŭ hŏng ƀăng êgei khua pô hưn êlâo jing sĭt nik, Ñu jing Pô mâo klei dưi brei klei hdĭp, lŏ bi hdĭp leh anăn mă mđuĕ klei hdĭp. Klei truh kơ anak êkei mniê djiê ung phung tue Sarepta, leh anăn dưi lŏ hdĭp, čiăng bi klă klei đăo gơ̆. Hŏng klei anăn, gơ̆ mâo klei đăo kơ Aê Diê leh anăn lŏ đĭ hriê kơ prŏng hĭn hlăm klei đăo. Truh ti mmông anei, gơ̆ lač kơ Khua pô hưn êlâo Y-Êli snei: “Ară anei kâo thâo kơ ih jing sa čô mnuih Aê Diê, leh anăn klei Yêhôwa blŭ hlăm ƀăng êgei ih jing klei sĭt” (êlan 24).
Mta klei yuôm hĭn, brei mâo klei hdĭp wah lač tŭ dưn leh anăn ktang anăn jing klei đăo yơh. Khua Yang Yêsu mtô: “Ya klei diih akâo êjai wah lač, diih srăng mă tŭ jih tơdah diih mâo klei đăo.” (Y-Mathiơ 21:22). Tơdah drei wah lač hŏng Khua Yang snăn brei drei đăo kơ klei ktang myang, klei thâo mĭn leh anăn klei jăk Ñu. Đăo kơ Khua Yang srăng wĭt lač nanao kơ klei wah lač bi hlao drei leh anăn Ñu srăng brei nanao klei jăk hĭn, tui si mmông jăk hĭn Ñu, kơ phung anak Ñu.
Si ngă drei thâo kral leh anăn đăo knang kơ Khua Yang jing Pô dưi bi hlao leh anăn bi hdĭp mơ̆?
Wah lač: Ơ Khua Yang, bi mni kơ Khua Yang kyua Ih jing Yêhôwa Rapha, Pô bi hlao kâo. Akâo Khua Yang đru kâo wah lač hŏng klei đăo nanao leh anăn đăo knang kơ Khua Yang Pô brei nanao klei jăk hĭn kơ kâo tui si klei Ih čiăng. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
