1 Vajntxwv 17:17-24
Nqe cim:
“Kuv yog tus TSWV, tus uas kho nej tej mob tej nkeeg” (Khiavdim 15:26).
Lus nug rau sawvdaws xav:
– Yam dab tsi tshwm rau tus pojntsuam Xalefas?
– Tus cev lus Eliyas tau ua dab tsi thiab muaj qabhau zoo li cas?
– Dhau zaj kawm, peb zeem paub Vajtswv yog tus zoo li cas thiab txais tau dab tsi rau peb tus kheej?
Vajtswv tau siv tus pojntsuam ntawm Xalefas yug Eliyas hauv ib ncua sijhawm. Tsis ntev tib pliag ntshis xwb, tus pojntsuam ntawd tus tub tau mob thiab tuag lawm. Hauv lub sijhawm ntxhov siab, tus pojntsuam no tau yws tus cev lus Eliyas uas tabtom nyob hauv nws tsev. Nws xav hais tias, Vajtswv tau rau txim rau nws txog tej kev txhaum uas nws tau ua, nws tus tub thiaj tuag. Niaj hnub nim no, thaum raug kev txomnyem hauv lub neej, Vajtswv cov menyuam kuj xav ntau yam ib yam li tus poj ntsuam no thiab.
Tus cev lus Eliyas tsis sib cav nrog tus pojntsuam ntawd, nws tsuas thov kom tus pojntsuam muab tus pojntsuam tus tub rau nws, thiab puag tus tub ntawd mus rau saum nws chav thov Vajtswv pab kho kom tus me tub ciaj rov los. Tes haujlwm ntawd yog tus qauv zoo ntawm kev ntseeg. Eliyas tsis txhawj thiab tsis ntxhov siab tiamsis nws ntseeg ruaj khov rau tus Vajtswv tus uas nws tabtom teev tiam. Vajtswv yog tus yug Eliyas thiab tus pojntsuam nkawd ob niam tub hauv ib ncua sijhawm ntev loo los lawm, ces Vajtswv yeej yuav hlub tshua thiab tsis cia tus pojntsuam ntawd tus tub tuag. Eliyas ntseeg hais tias Vajtswv muaj lub homphiaj rau Nws tes haujlwm. Vajtswv teb Eliyas tej lus thov. “ces tus tub ntawd txawm ua pa thiab rov muaj sia lawm”. Eliyas puag tus me tub los rau tus pojntsuam thiab hais muaj zog sis hais tias: “Koj saib, koj tus tub rov muaj sia lawm!” (nqe 22-23).
Tej no yog tej lus thov tau Vajtswv teb thiab pub rov muaj sia los thawj zaug nyob hauv Vajluskub. Qab hau ntawm qhov txujci tseemceeb uas cawm tau tus pojntsuam tus tub rov muaj sia yog ua rau nws paub Eliyas yog Vajtswv tus neeg tiag. Nws tabmeeg lees nws kev ntseeg rau ntawm cov Yixalayees tus Vajtswv, tus uas muaj hwjchim loj. Vajtswv tej lus hais los ntawm cov cev lus lub ncauj yeej muaj tseeb. Vajtswv yog tus muaj hwjchim pub txojsia, pab cawm thiab rov taij txojsia ntawd mus. Qhov uas tus poj ntsuam Xalefas tus tub tau tuag thiab ciaj rov los yog qhia kom tus poj ntsuam no rov lees nws kev ntseeg. Dhau qhov ntawd tus pojntsuam muaj kev ntseeg rau Vajtswv thiab nws kuj loj hlob hauv kev ntseeg ntxiv. Thaum ntawd, tus pojntsuam hais rau tus cev lus Eliyas hais tias: “Nimno kuv paub lawm hais tias koj yog Vajtswv tus neeg thiab yog tus cev Vajtswv lus tiag.” (nqe 24).
Yam tseemceeb tshajplaws cheem tsum hauv lubneej thov Vajtswv muaj kuab thiab muaj zog yog txojkev ntseeg. Tswv Yexus qhia: “Yog nej ntseeg tiag, nej thov yam twg, nej yuav tau yam ntawd” (Mathais 21:22). Thaum thov Vajtswv peb yuavtsum ntseeg hais tias Vajtswv muaj hwjchim, muaj kev txawjntse thiab muaj lub siab hlub. Ntseeg hais tias Vajtswv ibtxwm teb tej lus thov thiab yuav kho peb tej mob zoo raws li Nws siab nyiam, Nws ibtxwm pub yam uas zoo tshaj plaws rau peb thaum yog lub sijhawm uas Nws pom zoo.
Thov Vajtswv
Vajtswv, nyuam yaus ua Koj tsaug vim Koj yog tus Tswv Kho Tau Mob Zoo. Thov pab nyuam yaus muab kev ntseeg los thov Vajtswv Koj thiab ntseeg hais tias, Koj yeej ibtxwm pub yam uas zoo tshaj rau nyuam yaus raws li Koj lub siab nyiam. Nyuam yaus tuav Tswv Yexus Khetos lub npe thov. Amees.
Ib tsoom mloog uas hmov tshua,
Peb puas zeem paub thiab ntseeg Vajtswv yog tus muaj hwjchim kho mob thiab cawm tau peb dim lawm tau?
Nyeem Vajluskub hauv peb lub xyoos: 2 Xeemtxheej Vajntxwv 20
Kênh Youtube BHKTHN:
