Klei Aê Diê Blŭ: II Klei Yăl Dliê 1: 13-17
Êlan kliăng: “Mtao mkăm pioh prăk leh anăn mah hlăm ƀuôn Yêrusalem lu msĕ si boh tâo, leh anăn ñu mkăm pioh kyâo sêdar jing lu msĕ si kyâo sikamôr hlăm lăn dap.” (II Klei Yăl Dliê 1:15).
Klei êmuh ksiêm mĭn: Ya ngă Mtao Y-Salômôn blei lu êdeh aseh leh anăn aseh? Mơ̆ ng ya mta mtao dưi mdrŏng msĕ snăn? Si ngă Klei Aê Diê Blŭ čih kơ sa êdei anăp kdrưh kơang hlăm Ala Mtao Aê Diê? Ya klei drei čang hmăng hlăm adiê mrâo lăn mrâo Aê Diê ƀuăn brei?
Leh jih ai tiê tui duah Aê Diê hlăm klei kkuh npŭ ti Gabaôn, Mtao Y-Salômôn wĭt ti Yêrusalem čiăng kiă kriê Israel. Mtao mâo truh 1.400 êdeh aseh bi blah leh anăn 12.000 aseh blei mơ̆ ng Êjip, leh anăn ba čhĭ kơ phung mtao Hitit leh anăn Siri. Năng ai dưi lač anei jing bruă mnia blei aseh leh anăn êdeh aseh prŏng hlăm krĭng hlăk anăn ba wĭt lu klei tŭ kơ Mtao Y-Salômôn, leh anăn mtao ƀrư̆ hruê ƀrư̆ mdrŏng sah.
Kyua klei mdrŏng pô, Mtao Y-Salômôn mkăm pioh prăk leh anăn mah hlăm ƀuôn Yêrusalem lu msĕ si boh tâo, leh anăn ñu mkăm pioh kyâo sêdar jing lu msĕ si kyâo sikamôr hlăm lăn dap. Klei mdrŏng sah Mtao dưi mâo jing kyua Aê Diê bi sĭt klei Ñu ƀuăn leh, “Kâo srăng brei mơh kơ ih klei mdrŏng, ngăn dŏ, leh anăn klei mpŭ”(êlan 12b). Aê Diê sĭt suôr bi sĭt leh klei Ñu ƀuăn kơ Mtao Y-Salômôn kơ klei mdrŏng sah, jing klei mưn leh ñu tui duah klei thâo mĭn leh anăn klei thâo săng Aê Diê leh anăn ăt čiăng mprăp kơ bruă rŭ mdơ̆ ng Sang yang Aê Diê.
Tơdah hlăm ênuk Mtao Y-Salômôn, ti Yêrusalem mah jing mnơ̆ ng mkăn msĕ si boh tâo, snăn ti anôk Yêrusalem mrâo,“êlan ƀuôn anăn” ăt “ngă hŏng mah doh, mngač msĕ si ală kĭng”(Klei Bi Êdah 21:21). Truh mông anăn, phung hlăm ƀuôn Aê Diê srăng dưi mâo “Yêhôwa srăng jing klei mngač ih hlŏng lar” (Y-Êsai 60:20b). Năng ai dưi ƀuh klei mdrŏng sah leh anăn kdrưh kơang Aê Diê brei kơ Mtao Y-Salômôn tinei ăt jing gru rup kơ sa êdei anăp kdrưh kơang grăp čô đaŏ kơ Aê Diê srăng ƀuh hlăm Ƀuôn Ala Mtao Aê Diê, jing anôk drei srăng dưi dôk lă lar hŏng Ñu. Aê Diê jing sĭt suôr, Ñu bi sĭt leh klei ƀuăn hŏng Mtao Y-Salômôn, brei leh kơ ñu klei mdrŏng sah amâo mâo hlei mtao êlâo leh anăn êdei ñu dưi mâo ôh. Aê Diê ăt jing Pô amâo mâo bi mlih (Y-Mika 3:6),
Ñu srăng bi sĭt klei Ñu ƀuăn brei kơ phung drei kơ sa adiê mrâo, lăn mrâo leh anăn Yêrusalem mrâo, anôk Aê Diê srăng lač hŏng grăp čô snei “dŭm hruê ih kơŭ kyăm ruê̆ leh.”
Jing anak Aê Diê, wăt tơdah ară anei dôk hdĭp hlăm klei găl jăk amâo dah hlăm hruê mlan dleh dlan, lông dlăng, drei ăt mâo sơaĭ klei čang hmăng kơ sa êdei anăp jăk siam lu hĭn. Đưm dih Aê Diê brei leh kơ Mtao Y-Salômôn dưi thâo êlâo kơ êdei anăp jăk siam anăn ti lăn, snăn Ñu ăt srăng brei kơ drei lông thâo kluôm ênŭm ya klei Aê Diê ƀuăn leh ti Ƀuôn Ala Mtao jăk mơak.
Si ngă ai tiê leh anăn ya bruă drei ngă hlăk êjai dôk guôn sa êdei anăp Aê Diê ƀuăn dưi jing sĭt kluôm ênŭm?
Ơ Khua Yang, akâo kơ Ih đru kâo hdĭp êđăp ênang, đaŏ knang kơ Ih wăt tơdah ya klei găn kyua thâo mâo sa êdei anăp jăk siam lu hĭn dôk guôn hlei pô jih ai tiê tui duah Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 7
Kênh Youtube BHKTHN:
https://www.youtube.com/channel/UCaSY8ebjVfMKhPups5jZ9yw
