Klei Aê Diê Blŭ: Klei Mtô Mñă Klei Bhiăn 26:12-15
Êlan kliăng:“Snăn diih srăng lač ti anăp Yêhôwa Aê Diê diih, ‘Kâo mă leh mơ̆ng sang kâo kdrêč doh jăk, leh anăn kâo brei leh dŏ anăn kơ phung Lêwi, kơ pô dôk jưh bhiâo, kơ anak êrĭt, leh anăn kơ mniê djiê ung, tui si jih klei mtă Ih brei leh kơ kâo” (Klei Mtô Mñă Klei Bhiăn 26:13)
Klei êmuh ksiêm mĭn: Tlâo thŭn sa blư̆, phung Israel srăng mă sa kdrêč hlăm pluh boh mơ̆ng mnơ̆ng diñu buh pla pioh bi mbha kơ hlei pô? Bruă ngă anei ya čiăng lač? Si ngă Aê Diê čiăng drei hdĭp ti krah phung ƀuôn sang?
Klei bhiăn myơr sa kdrêč hlăm pluh ti thŭn tal tlâo lŏ mñă hlăm Klei Mtô Mñă Klei Bhiăn 14:28-29 brei ƀuh kơ boh yuôm kơ klei bhiăn anei. Čiăng bi mđĭ ai phung ƀuôn sang Aê Diê hdĭp hŏng klei brei jing jăk hĭn kơ mă tŭ. Aê Diê mtă kơ phung Israel tlâo thŭn sa blư̆ brei digơ̆ mă sa kdrêč hlăm pluh boh mơ̆ng mnơ̆ng digơ̆ buh pla ba mbha kơ phung Lêwi, phung anak êrĭt, mniê djiê ung leh anăn phung dôk jưh bhiâo hlăm čar. Hlăm klei Aê Diê mprăp brei, phung dleh knap srăng mă tŭ sa kdrêč boh mnga mơ̆ng klei phung thâo mâo ƀiă bi mbha tlâo thŭn sa blư̆. Klei bhiăn Aê Diê đru phung Israel mâo mmông găl tui si thŭn bi kčah leh srăng bi mbha boh mơ̆ng mnơ̆ng digơ̆ buh pla kơ phung ayŏng adei digơ̆ dôk hlăm klei knap mñai, amâo bi kah phung Israel hŏng phung tue êgar ôh. Klei bi mbha anei amâo djŏ bruă mgô̆ brei ngă hŏng klei ktrŏ ôh, ƀiădah jing sa mmông găl bi êdah klei hơ̆k mơak hdơ̆ng ayŏng adei hlăm klei jăk mơak Aê Diê brei, đru phung ƀuôn sang Aê Diê mâo ai tiê kmah kơ phung mâo klei hdĭp kƀah knap hlăm čar. Mơ̆ng klei ngă anăn, phung ƀuôn sang Aê Diê mâo klei bi mguôp sĭt suôr hŏng phung ƀuôn sang, thâo bi uêñ mĭn hlăm klei hdĭp hdơ̆ng digơ̆. Klei bhiăn Aê Diê ăt mtă mơh kơ knuih srăng ngă hlăm klei đru bi mbha anei brei ngă hŏng klei kkuh mpŭ, klei hơ̆k mơak leh anăn klei doh jăk (êlan 13-15) čiăng mpŭ mni kơ Aê Diê jing Pô brei jih jang mnơ̆ng, jing phŭn leh anăn akŏ kơ jih jang klei jăk jĭn digơ̆ mâo mă tŭ leh, amâo djŏ kyua ai tiê digơ̆ pô mjing leh ôh, đru digơ̆ thâo myơr, bi êdah klei kmah, klei khăp leh anăn klei pap Aê Diê kơ jih jang mnuih.
Hdĭp hŏng klei kmah đru drei amâo duah klei tŭ dưn knŏng kơ drei pô ôh, ƀiădah dlăng nanao kơ Aê Diê leh anăn thâo uêñ mĭn kơ klei kƀah knap phung riêng gah drei. Brei drei thâo săng snei, jih jang klei jăk Aê Diê brei leh kơ drei amâo djŏ pioh kơ drei yua tui si drei čiăng amâodah mkăm pioh hŏng klei tluh ôh, ƀiădah brei drei bi mbha kơ phung ƀun ƀin amâo djŏ knŏng hlăm Phung Sang Aê Diê ôh, ƀiădah wăt kơ jih jang mnuih Aê Diê mdưm leh jŭm gah găn drei. Aê Diê amâo čiăng ôh drei kkuh mpŭ kơ Ñu knŏng hŏng hdră kkuh mpŭ hlăm sang Aê Diê, ƀiădah Ñu ciăng drei kkuh mpŭ kơ Ñu wăt hŏng klei drei dôk dơ̆ng ƀơ̆ng huă, knuih drei uêñ mĭn kơ klei kƀah knap phung riêng gah leh anăn klei drei bi mbha mơh kơ digơ̆ ya dŏ drei mâo.
Si ngă drei uêñ mĭn leh anăn đru mơ̆ phung mâo klei dleh dlan hlăm Phung Sang Aê Diê leh anăn phung riêng gah drei?
Wah lač: Ơ Khua Yang, đru kâo thâo ƀuh bruă đru bi mbha mnơ̆ng Ih brei kơ phung knap mñai jing mmông găl čiăng bi êdah klei kmah, klei khăp leh anăn klei pap Ih kơ jih jang mnuih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Mathiơ 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
