II.Kauleethaus 3:12-18
Nqe cim:
“Peb txhua tus tsis muaj daim ntaub npog ntsejmuag lawm, peb zoo li daim tsom iav rau sawvdaws pom tus Tswv lub tshwjchim; thiab lub tshwjchim uas tus Tswv pub rau peb yog Vaj Ntsujplig, nws muab peb hloov kom peb muaj tus yam ntxwv zoo zuj zus li tus Tswv tus yam ntxwv” (nqe 18).
Lus nug rau sawvdaws xav:
– Timthawj Paulus hais txog yam dabtsi ntsig txog Mauxes daim ntaub npog qhov muag?
– Paulus muab daim ntaub npog qhov muag piv rau tus Tswv haivneeg lub siab tawv twg?
– Vamkhom qhovtwg Timthawj Paulus tau thajyeeb ntsia tus Tswv lub tshwjchim?
– Tus Tswv lub tshwjchim pab tau peb lub neej licas?
Tom qab uas qhia rau cov ntseeg hauv Pawg Ntseeg Kauleethaus paub txog tes haujlwm tim ib txawm yog nws twb dhau lawm los tseem muaj tshwjchim, yog muab piv rau Vaj Ntsujplig tes haujlwm ces hajyam muaj tshwjchim loj dua thiab nyob mus li (nqe 11), Timthawj rov hais txog qhov xwmtxheej uas thaum ub Mauxes mus ntsib tus Tswv saum roob Xinais tas nws nqis rov los ces tus Tswv lub tshwjchim ua rau Mauxes lub ntsejmuag ci ntsa iab nws thiaj muab ib daim ntaub npog ntsej muag thaum nws mus nrog tus Tswv haivneeg sib tham (Khiavdim 34:29-35). Ntev ntev los tom qab no thiab txog lub sijhawm “niaj hnub no” Timthawj Paulus tabtom qhia los Vajtswv haivneeg tseem tawvncauj yog li lawv thiaj tsis tau ntsia Nws lub tshwjchim. Qhov uas tus Tswv haivneeg tawvncauj rau Vajtswv tau Timthawj Paulus muab piv zoo ib yam li daim ntaub npog qhov muag tabtom npog lawv lub qhov muag siab ua rau lawv tsis totaub thiab tsis pom Vajtswv lub tshwjchim (nqe 14-15).
Tiamsis Timthawj Paulus thiab cov neeg ua haujlwm rau lo lus cog tseg tshiab vim tau nyob rau hauv Yexus Khetos yog li Vaj Ntsujplig pub lawv muaj kev cawm dim thiab kev thajyeeb “zoo li daim tsom iav rau sawvdaws pom tus Tswv lub tshwjchim” (nqe 17-18), txhais tau hais tias tsis muaj daim ntaub npog lawm, vim nyob hauv Yexus Khetos daim ntaub ntawd raug muab tshem tawm (nqe 14), kom tus neeg los ntseeg Yexus tau kev thajyeeb kawm paub Vajtswv tus yamntxwv, koom nrog Nws lub tshwjchim.
Tagnrho tej koob hmoov no tsuas yog hauv Yexus Khetos thiaj muaj xwb. Yog peb tsis taug txojkev kaj ntawm Tswv Yexus ces peb cov uas nyob rau tiam no kuj zoo ib yam li cov neeg uas thaum ub Timthawj Paulus hais tias “niaj hnub no” tseem muaj daim ntaub npog lawv lub qhov muag siab. Qhov uas Mauxes pom Vajtswv lub tshwjchim ua rau nws muaj kev ntseeg ua haujlwm, pab tau Timthawj Paulus “muaj siab tawv” qhia Txojmoo Zoo mus thoob ntiajteb (nqe 12). Kuj zoo ib yam li ntawd, tus Tswv lub tshwjchim yuav pab kom peb tau txais koob hmoov, muaj kev thajyeeb kawm paub Vajtswv, ua neej pub rau tus Tswv thiab ua timkhawv qhia Nws zaj.
Koj puas zeem paub hais tias koj twb muaj cai ntsia Vajtswv lub tshwjchim lawm tau?
Thov Vajtswv,
Vajtswv tus uas muaj tshwjchim loj kawg nkaus! Nyuam yaus ua Tswv Yexus tsaug vim Koj los cawm, tshem daim ntaub thaiv kom nimno nyuam yaus “zoo li daim tsom iav rau sawvdaws pom tus Tswv lub tshwjchim,… hloov kom peb muaj tus yam ntxwv zoo zuj zus li tus Tswv tus yam ntxwv”. Amees.
Nyeem Vajluskub hauv peb lub xyoo: Phau Ntawv Nkauj 89:19-52
Kênh Youtube BHKTHN:
