II Kauleethaus 12:19-21
Nqe cim:
“…Peb hais raws li tej lus uas Yexus Khetos kom peb hais. Thaum peb hais peb yeej nco ntsoov hais tias, Vajtswv ntsia ntsoov peb. Cov kwvtij uas peb hlub, txhua yam uas peb ua yeej yog peb ua pab nej xwb” (II Kauleethaus 12:19b).
Lus nug rau sawvdaws xav:
– Timthawj Paulus qhia paub lub homphiaj ntawm nws tej lus qhuab ntuas cov ntseeg hauv Kauleethaus yog dabtsi?
– Nws ua licas thaum paub hais tias cov ntseeg nyob qhov ntawd tseem ua txhaum?
– Koj tau qhuab ntuas licas dhau ntawm Timthawj Paulus tej lus txhawb zog?
Thaum raug lwm tus iab hiam txog lub meejmom Timthawj, Paulus tau muaj tej lus ua tabpov rau nws tiamsis tej ntawd tsis yog hais los daws nws zaj, txhua yam yog los txhawb cov ntseeg txojkev ntseeg, kom pab lawv muaj lub neej loj hlob sab ntsujplig. Timthawj Paulus tsis hais nkhab nkhaus, tiamsis hais ncaj nraim rau tej teebmeem thiab qhia rau cov ntseeg hauv Kauleethaus hais tias nws ntshaw pom lawv loj hlob, dhau los ua xibhwb tsis yog tsuas zoo li cov nyuam qhuav los ntseeg xwb. Nws xav kom lawv yuav tsum tso tseg tej kev “…sib cav sib ceg, sib khib sib ntxub, muaj lub siab hlob, ib leeg thuam ib leeg, taug xaiv, khavtheeb thiab tsim kev kub ntxhov” (nqe 20b). Nws qhia tshwm yam uas nws lub siab ntshaw ntawm cov ntseeg hauv Kauleethaus dhau ntawm kev cia siab hais tias thaum nws tuaj txog yuav pom lawv ua tau raws li nws lub siab xav (nqe 20a).
Timthawj Paulus hlub tshua cov ntseeg hauv Kauleethaus ib yam li leej txiv hlub thiab niaj hnub txhawj txog cov menyuam, yog li ntawd nws thiaj tsis qab siab thaum pom nws cov menyuam “… tseem tsis tau tso lawv tej kev txhaum tseg, tsis hais kev nkauj kev nraug thiab ua phem ua qias” (nqe 21). Nws tauv tsis taus lub kua muag, quaj ntsuag rau lawv thiab qhuab ntuas kom lawv lees kev txhaum, tso kev txhaum tseg. Timthawj Paulus hais meej hais tias: “Peb hais raws li tej lus uas Yexus Khetos kom peb hais. Thaum peb hais peb yeej nco ntsoov hais tias, Vajtswv ntsia ntsoov peb”. Tej lus hais ncaj ncees uas muaj Yexus Khetos thiab Vajtswv ua tabpov tsis yog hais kom zoo rau tus hais tiamsis hais los txhawb cov uas mloog lub zog.
Timthawj Paulus ibtxwm hais lus ncaj ncees, yog li ntawd nws tsis ntshai cia Vajtswv ua tabpov rau nws tej lus tseeb. Txhua tus ntseeg puavleej yog cov tub txib uas tau Vajtswv muab cob ua tej haujlwm tseemceeb, lawv yog “Yexus Khetos cov tubtxib” (II Kauleethaus 5:20). Yog cov sawv cev ntawm Ntuj Ceeb Tsheej peb tsis tau cai hais lus raws li siabnyiam, kuj tsis khav txog tus kheej, tiamsis yuav tsum siv tej lus hais kom lwm tus tau los sib raug zoo nrog Vajtswv, txhawb cov ntseeg lub zog, pab cov tseem nyob hauv kev txhaum zeem paub txog lawv tus kheej, lees thiab tso kev txhaum tseg. Peb yoojyim hais tej lus yuamkev (Yakaunpaus 3:1-12), vim li ntawd cia li taij thov tus Tswv uas tswjkav txhua yam taw qhia kom peb hais tej lus txhawb tau lwm tus lub zog.
Thov Vajtswv
Vajtswv! Thov pab nyuam yaus zeem paub lub meejmom thiab qhov tseemceeb ntawm tes haujlwm ua tub txib sawv cev rau Ntuj Ceeb Tsheej uas Koj muab cob, kom nyuam yaus nco ntsoov tuav Koj lub npe los ua txhua yam, ceevfaj hauv kev hais lus kom txhawb tau lwm tus lub zog. Amees.
Peb tej lus hais txhawb zog lossis tua tau lwm tus?
Nyeem Vajluskub hauv peb lub xyoos: Yauhas 10
Kênh Youtube BHKTHN:
https://www.youtube.com/c/bhkthn
Nyeem Vajluskub hauv peb lub xyoos: Yauhas 7:1-44
