Klei Aê Diê Blŭ: II Kôrantô 12:19-21
Êlan kliăng: “… Hơăi, hmei blŭ hlăm Krist ti anăp Aê Diê, leh anăn hlăm jih klei anăn čiăng đru diih hriê kơ prŏng, Ơ phung kâo khăp” (II Kôrantô 12:19b)
Klei êmuh ksiêm mĭn: Ya klei Khua ƀĭng kna Y‑Pôl brei thâo hdră kñăm dŭm klei ñu mtă kơ phung đăo Kôrantô? Si klei ñu ngă tơdah thâo phung đăo tinei ăt dôk hdĭp hlăm klei soh? Ya klei mñă kơ diih mơ̆ng ai tiê Khua ƀĭng kna Y‑Pôl ?
Ti anăp klei mčeh luar kơ bruă pô jing khua ƀĭng kna, Khua ƀĭng kna Y‑Pôl mâo leh klei blŭ mgang ƀiădah dŭm klei anăn amâo djŏ kñăm mgang kơ pô ôh, ƀiădah jih jang kñăm mđĭ ai klei đăo phung đăo, đru digơ̆ mâo klei hdĭp mngăt kjăp. Khua ƀĭng kna Y‑Pôl amâo blŭ bi hriêng ôh, ƀiădah lač kơ klei mâo leh anăn bi êdah hŏng phung đăo ti Kôrantô ñu čang hmăng dưi ƀuh digơ̆ srăng hriê kơ prŏng hlăm klei đăo, jing phung ksiêm hriăm amâo djŏ ôh čiăng klei đru msĕ si sa čô hlăm dŭm hruê mrâo lŏ wĭt mă tŭ. Ñu čang hmăng digơ̆ lui klei “… klei bi mneh msao, klei nač, klei ăl, klei klih, klei blŭ jhat, klei mčeh, klei mgao, leh anăn klei rŭng răng” (êlan 20b). Ñu bi êdah klei ñu čang hmăng kơ phung đăo Kôrantô mơ̆ng klei čiăng tơdah ñu nao čhưn srăng ƀuh hlăm digơ̆ klei ai tiê ñu čang hmăng (êlan 20a).
Khua ƀĭng kna Y‑Pôl khăp kơ phung đăo Kôrantô msĕ si sa čô ama khăp kơ anak leh anăn bi mĭn nanao kơ anak, anăn ñu amâo dưi ngă ngơi mang ôh amâodah hơĭt ai tiê rei tơdah ƀuh anak pô “… amâo tuôm kmhal ôh kơ klei čhŏ mrŏ, klei knhông leh anăn klei ƀai diñu ngă” (êlan 21). Ñu amâo dưi krơ̆ng ôh êa ală, ênguôt hnĭng kơ klei digơ̆ jing leh anăn mtă kơ digơ̆ kmhal, lui êlan klei soh. Khua ƀĭng kna Y‑Pôl jhŏng lač: “hmei blŭ hlăm Krist ti anăp Aê Diê”. Klei blŭ kpă ênô mâo Aê Diê bi mklă leh anăn Aê Diê amâo kñăm ba klei tŭ dưn kơ pô blŭ ôh, ƀiădah čiăng mđĭ ai phung hmư̆.
Khua ƀĭng kna Y‑Pôl kpă ênô hlăm klei pô blŭ, kyua anăn ñu amâo uêñ ôh čiăng kơ Aê Diê bi mklă kơ ya klei ñu blŭ jing kpă ênô. Grăp čô đăo jing phung dĭng buăl Aê Diê jao bruă klam yuôm bhăn, jing “dĭng ktang kơ Krist” (II Kôrantô 5:20). Dĭng ktang mơ̆ng Ƀuôn Jăk amâo dưi plă plia ôh hlăm klei pô blŭ, ăt kăn dưi yua klei pô blŭ ciăng hưn kơ pô, ƀiădah yua klei blŭ čiăng kơ phung mkăn dưi bi grăng hŏng Aê Diê, čiăng đru kơ klei hdĭp phung đăo kơ Khua Yang Yêsu Krist, đru kơ phung dôk hdĭp hlăm klei soh thâo kơ klei soh jhat pô, kmhal leh anăn lui. Drei ênưih soh hlăm klei blŭ (Y‑Yakơ 3:1-12), kyua anăn akâo kơ Khua Yang kiă kriê leh anăn ktrâo atăt čiăng kơ klei drei blŭ ba klei mđĭ ai kơ phung mkăn.
Klei blŭ drei ba klei mđĭ ai amâodah bi mdjiê pô mkăn?
Wah lač: Ơ Aê Diê! Akâo kơ Ih đru kâo thâo kơ anôk pô dôk hŏng bruă yuôm bhăn Aê Diê jao jing dĭng ktang kơ Ƀuôn Jăk čiăng kơ kâo kyua Anăn Khua Yang Yêsu ngă djăp mta bruă, jih ai tiê thâo răng hlăm bruă yua klei blŭ kâo čiăng ba klei tŭ dưn kơ phung dôk hmư̆.
Dlăng Klei Aê Diê Blŭ hlăm tlâo thŭn: Y‑Yôhan 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
