Efexus 4:11-13
Nqe cim:
“Nws yog tus uas pub koob hmoov rau neeg, nws tsa qee leej ua timthawj, qee leej ua cov cev Vajtswv lus, qee leej ua xibhwb qhia Txojmoo Zoo, qee leej ua cov xibhwb qhia thiab qee leej ua cov saib cov ntseeg. Nws ua li ntawd twb yog nws qhia kom cov ntseeg paub ua Vajtswv tes haujlwm; cov ntseeg uas yog Yexus Khetos lub cev thiaj li yuav txawj loj hlob zuj zus.” (Efexus 4:11-12).
Lus nug rau sawvdaws xav:
– Tej koob hmoov uas tus Tswv pub rau Pawg Ntseeg nyob hauv ntu Vajluskub no yog dabtsi? Muaj homphiaj li cas?
– Koj cheemtsum kawm dabtsi kom pab tau ib feem haujlwm twg hauv Pawg Ntseeg kom zoo dua?
I Kauleethaus 12:1-11 hais txog tej koob hmoov uas Vaj Ntsujplig pub rau Vajtswv cov menyuam, txhua tus puavleej muaj ib lossis ntau txoj koob hmoov sib txawv raws li tus Tswv pub. Tiamsis hauv Efexus 4:11 sau tej koob hmoov uas tus Tswv pub rau cov thawjcoj thiab cov uas qhia kev ntseeg hauv Pawg Ntseeg.
Thawj pab yog cov timthawj. Cov timthawj yog cov neeg uas nrog Tswv Yexus nyob thiab pom tus Tswv uas twb sawv hauv qhov tuag rov los. Cov neeg no yog cov uas tau tus Tswv Yexus xaiv thiab “txib mus” ua timkhawv hais txog Nws zaj thiab qhia rau txhua haivneeg (Mathais 10:1-4). Txuas ntxiv yog cov cevlus, lawv yog cov neeg uas tau tus Tswv tus ntsujplig qhia tshwm thiab cev Vajtswv tej lus raws nraim li tus Tswv hais rau lawv. Txoj koob hmoov cevlus lub homphiaj yog txhim tsa, txhawb zog, thiab nplig siab (I Kauleethaus 14:3). Nimno, ob yam koob hmoov no tsis muaj lawm, vim cov timthawj thiab cov cevlus lub hwjchim qhia tawm los ntawm Phau Vajluskub. Tus uas qhia Txojmoo Zoo, zoo ib yam li cov neeg tawm mus xa Txojmoo Zoo nimno, yog cov neeg uas tshajtawm Tswv Yexus Txojmoo Zoo cawm cov neeg tsis paub tus Tswv (Tes Haujlwm 21:8; II Timautes 4:5). Xibhwb yog tus uas tu thiab saib xyuas cov ntseeg sab ntsujplig (Tes Haujlwm 20:28; I Petus 5:1-4). Cov kws qhia yog tus uas qhia kev ntseeg, qhia Vajtswv Txojlus. Xibhwb yog tus uas ib ke qhia Txojmoo Zoo, ib ke qhia kev ntseeg thiab tu pab yaj.
Lub homphiaj tus Tswv pub koob hmoov rau cov thawjcoj hauv Pawg Ntseeg yog ua kom cov ntseeg koom tes rau tej haujlwm nyob hauv Pawg Ntseeg, paub tej kevcai ntseeg, loj hlob hauv kev ua tus ntseeg, koom ib txojkev ntseeg thiab ib txojkev hlub, nthuav tawm Vajtswv lub Tebchaws kom dav. Yog muab cov Pawg Ntseeg saib zoo ib yam li lub tuamtsev ces Tswv Yexus yog lub Pobzeb, cov timthawj thiab cov cevlus yog lub plag, cov neeg qhia Txojmoo Zoo yog cov khoom txhim lub tsev, xibhwb – cov kws qhia ua kom lub tsev ruaj khov, zoo nkauj, tsimnyog yog lub tuamtsev zoo rau Vajtswv nyob (Efexus 2:19-22).
Hais tau hais tias, ob lub homphiaj tseemceeb Pawg Ntseeg cheemtsum siv zog ua yog qhia Txojmoo Zoo thiab qhia kev ntseeg. Qhia Txojmoo Zoo cawm tibneeg, txhim tsa Pawg Ntseeg; qhia kev ntseeg rau tus Tswv cov menyuam kom ua tau ib tug ntseeg tawm mus qhia Txojmoo Zoo thiab qhia kev ntseeg. Vajtswv cov menyuam txij tus coj Pawg Ntseeg mus txog cov ntseeg yuav tsum siv zog kawm Vajtswv Txojlus kom loj hlob, koom tes ua haujlwm tsim tsa thiab nthuav dav Vajtswv lub Tebchaws hauv ntiajteb no.
Thov Vajtswv,
Vajtswv tus muaj kev hlub, thov Koj pab kom nyuam yaus nquag kawm Koj Txojlus thiab kub siab lug koom tes ua Koj tes haujlwm kom Pawg Ntseeg loj hlob. Amees.
Peb puas rau siab kawm kom peb koom tes tau ib feem haujlwm twg hauv Pawg Ntseeg?
Nyeem Vajluskub hauv peb lub xyoo: Tes Haujlwm 15:1-34
Kênh Youtube BHKTHN:
