II Xwmtxheej 17:1-6
Nqe cim:
“Tus TSWV thiaj pub Yehausafas tswj tau lub tebchaws Yudas nyob ruaj khov, thiab cov pejxeem coj khoom tuaj pub rau nws. Yog li ntawd, nws thiaj muaj txiag npluanuj thiab muaj koob meej nto moo lug” (II Xwmtxheej 17:5).
Lus nug rau sawvdaws xav:
- Vajntxwv Yehausafas ua dabtsi thaum sawv los ua vajntxwv?
- Vajntxwv muaj nplooj siab licas rau tus Tswv?
- “Cov pejxeem coj khoom tuaj pub rau nws” qhia txog dabtsi?
- Peb yuav tsum ua dabtsi thiaj tau lwm tus ibncig hwm?
Vajntxwv Yehausafas yog ib tug vajntxwv uas zoo thiab tseemceeb vim phau II Xwmtxheej siv plaub tshooj los sau txog nws. Rau nqe xubthawj hauv tshooj 17 no hais txog vajntxwv Yehausafas kev txhim kho tebchaws. Ob nqe 1 thiab 2 hais txog tes haujlwm ntaus rog thaum nws nyuam qhuav sawv ua vajntxwv, thiab plaub nqe tomqab hais txog nws tes haujlwm sab ntsujplig. Hais txog kev ntaus rog, vajntxwv tso tubrog mus nyob rau hauv cov Yudais tej nroog uas muaj ntsa yeej thaiv thiab tso tubrog mus zov thoob plaws tebchaws Yudais thiab tej nroog hauv xeev Efalayees uas nws txiv Axas txeeb tau los. Hais txog lub neej sab ntsujplig ces vajntxwv pehawm nws cov yawgkoob tus Vajtswv, tsis pe mlom Npa-as. Vajntxwv ua raws li nws yawgkoob Daviv txojkev, nws ua raws li Vajtswv tej lus samhwm, nws tsis ua li cov Yixalayees tej vajntxwv ua.
Thaum kawg “Tus TSWV thiaj pub Yehausafas tswj tau lub tebchaws Yudas nyob ruaj khov” (nqe 5). Tagnrho cov pejxeem coj khoom tuaj pub rau nws thiaj ua rau nws muaj txiag npluanuj thiab tau “koob meej nto moo lug”, txhais tau hais tias nws tau sawvdaws hwm heev. Tagnrho tej yam uas vajntxwv muaj, puas yog los ntawm nws tus kheej lub zog? Tagnrho puavleej yog Vajtswv ua tus pub xwb. Nyob hauv rau nqe luv luv no xwb, “Vajtswv” tau hais txog plaub zaug, nyob hauv muaj ob zaug hais txog tej uas tus Tswv pub rau vajntxwv Yehausafas (nqe 3, 5), thiab muaj ob zaug hais txog vajntxwv nplooj siab pub rau tus Tswv (nqe 4, 6), qhov ntawd qhia tau hais tias Vajtswv yog tus tseemceeb nyob hauv vajntxwv Yehausafas kev npluanuj thiab lub koob meej. Tus Tswv nrog nraim vajntxwv nyob thiab ua rau lub tebchaws nyob ruaj khov, vajntxwv muaj txiag npluanuj thiab tau koob meej thaum nws paub nrhiav tus Tswv, rhuav tshem tej mlom thiab ua raws tus Tswv tej lus samhwm.
Kuj zoo ib yam li vajntxwv Yehausafas, tej yam uas peb muaj puavleej yog tus Tswv muab pub xwb,“Txhua yam zoo uas pub rau peb thiab txhua yam uas zoo kawg nkaus yog los saum ntuj los, yeej yog los ntawm Leej Txiv uas tsim lub hnub lub hli thiab tej hnub qub huvsi” (Yakaunpaus 1:17). Thaum peb paub nrhiav tus Tswv, ua raws Nws tej lus samhwm, rhuav tshem tej mlom hauv peb lub neej lawm, ces peb yuav tau tus Tswv nyob nrog nraim, tau foom koobhmoov thiab tau lwm tus hwm. Meej mom, hwjchim thiab nyiaj txiag tsis ua rau peb tau luag hwm tiamsis ib lub neej uas ntseeg tus Tswv yuav tau tus Tswv pub rau muaj “koob meej nto moo lug” yog qhov uas tau lwm tus hwm. Neeg ntiajteb yuav ntxub peb vim peb tsis yog ntiajteb tug (Yauhas 15:18-19), tiamsis thaum peb ua neej sib hlub, ua neej txawv neeg ntiajteb, ces txawm yog lawv ntxub peb los lawv yeej hwm taus peb.
Thov Vajtswv,
Tus Tswv thov qhia nyuam yaus ua tau lub neej nrhiav Koj, ua raws Koj tej lus samhwm, rhuav tshem tej mlom hauv nyuam yaus lub neej, nyuam yaus thiaj tau Koj nyob nrog thiab ua tau qauv zoo rau lwm tus xyaum. Amees.
Peb puas nrhiav Vajtswv thiab ua raws li Nws tej lus samhwm txhua lub sijhawm lawm tau?
Nyeem Vajluskub hauv peb lub xyoos: Yelemis 15
Kênh Youtube BHKTHN:
