Klei Aê Diê Blŭ: II Klei Yăl Dliê 17:1-6.
Êlan kliăng: “Kyua anăn Yêhôwa bi kjăp ƀuôn ala mtao hlăm kngan ñu; leh anăn jih jang phung Yuđa tuh jia kơ Y‑Jôsaphat. Ñu mâo klei mdrŏng prŏng leh anăn klei arăng mpŭ” (II Klei Yăl Dliê 17:5)
Klei êmuh ksiêm mĭn: Ya bruă mtao Y‑Jôsaphat ngă leh mrâo đĭ ngă mtao? Si knuih mtao hŏng Yêhôwa? “Jih jang phung Yuđa” tuh jia kơ ñu ya klei čiăng lač? Ya klei brei drei ngă čiăng kơ phung riêng gah mpŭ?
Mtao Jôsaphat dưi dlăng jing mtao jăk leh anăn yuôm bhăn kyua hdruôm hră II Klei Yăl Dliê pioh pă kdrêč čih kơ ñu. Năm êlan tal êlâo hlăm kdrêč 17 anei lač kơ hdră mtao Jôsaphat mkra mđĭ ala mtao. Dua êlan 1 leh anăn 2 lač kơ bruă lĭng kahan leh ñu mrâo đĭ jing mtao, leh anăn pă êlan adôk lač kơ bruă hlăm mngăt ñu. Kơ bruă lĭng kahan, mtao dăp leh êpul lĭng kahan hlăm dŭm ƀuôn prŏng kjăp mơ̆ng Yuđa leh anăn hlăm dŭm ƀuôn prŏng Êpraim ama ñu plah mă leh. Bi kơ klei hdĭp mgăt snăn mtao wah lač kơ Yêhôwa mơ̆ng aê ama mtao amâo duah ôh yang Baal. Mtao êbat hlue si êlan Mtao Đawit, phung nao êlâo kơ pô, hlue ngă klei bhiăn Aê Diê, amâo tui hlue ôh phung Israel ngă klei jhat.
Boh tŭ jing “bi kjăp ƀuôn ala mtao hlăm kngan ñu” (êlan 5). Jih jang phung ƀuôn sang Yuđa tuh jia kơ mtao mjing ñu jing mdrŏng leh anăn dưi mâo “klei mdrŏng prŏng”, jing dưi mpŭ. Jih jang klei dưi mâo anăn djŏ mơ̆ kyua knŏng klei mtao gĭr? Jih jang kyua klei Aê Diê ngă. Knŏng hlăm năm êlan đŭt anei, Aê Diê mñă truh pă blư̆, hlăm anăn mâo dua blư̆ lač kơ ya klei Aê Diê ngă leh kơ Mtao Jôsaphat (êlan 3, 5), leh anăn dua blư̆ lač kơ knuih mtao hŏng Aê Diê (êlan 4, 6), klei anăn brei ƀuh Aê Diê jing yuôm bhăn hĭn hlăm klei mdrŏng leh anăn dưi mpŭ mơ̆ng mtao Jôsaphat. Yêhôwa dôk mbĭt hŏng mtao leh anăn đru kơ ala čar jing kjăp, mtao jing mdrŏng leh anăn dưi mpŭ leh ñu duah Aê Diê, lui jih rup yang leh anăn gưt hlue si klei bhiăn Aê Diê.
Ăt msĕ si Mtao Jôsaphat, ya klei drei mâo kyua Aê Diê brei, “Jih jang klei brei jăk leh anăn klei brei klă ênŭm trŭn mơ̆ng adiê mơ̆ng Ama klei mngač sơăi. Hlăm Ñu amâo mâo klei bi mlih ôh, kăn mâo êyui klei bi mlih rei.” (Y‑Yakơ 1:17). Sĭt drei tui duah Aê Diê, gưt asăp klei bhiăn Ñu, lăm lui rup yang hlăm klei hdĭp pô snăn drei srăng mâo Aê Diê dôk mbĭt, hơêč hmưi, leh anăn mâo phung riêng gah mpŭ. Klei dưi, kơhưm amâodah prăk mah amâo đru kơ drei mâo klei arăng mpŭ ôh ƀiădah sa klei hdĭp thâo huĭ mpŭ srăng mâo Aê Diê brei “klei mdrŏng prŏng” jing jih jang mnuih mpŭ. Phung ti lăn ala năng ai bi êmut kơ drei kyua drei amâo jing dŏ lăn ala (Y‑Yôhan 15:18-19), ƀiădah sĭt drei hdĭp thâo khăp, hdĭp hŏng hnơ̆ng čuăn mdê hŏng lăn ala, snăn wăt tơdah bi êmut kơ drei ƀiădah hlăm lam ai tiê diñu ăt mpŭ kơ drei.
Drei tui duah Aê Diê leh anăn gưt klei bhiăn Ñu nanao mơ̆?
Wah lač: Ơ Khua Yang! Akâo kơ Ih đru kâo hdĭp thâo duah klei Aê Diê čiăng, hlue ngă Klei Aê Diê Blŭ, lăm lui rup yang hlăm klei hdĭp kâo čiăng mâo Aê Diê dôk mbĭt leh anăn klei hdĭp kâo bi hmô jăk kơ phung riêng gah.
Dlăng Klei Aê Diê Blŭ hlăm tlâo thŭn: Y‑Yêrêmi 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
