Sơnăm ‘Nao Jơhngơ̆m Pran ‘Nao – 31/1/2025

187
Trình chơi Audio

 

 

Lĕch Đơ̆ng Êyiptơ 3:1-6, 4:18

“Bơ̆n adrin jang tơdrong Kră Yang tôch bơneh kơ bơ̆n jang.” (Rôma 12:11)

Nơ̆r jet tơchĕng pơwao:

– ’Bok Môis đei pơm tơdrong kiơ lăm hnam tơnei sư tơdêh Mađian?

– Tơdrong arih sư đei tơplih  thoi yơ kơ plah đei Kră Yang Krao?

– Lăm sơnăm ‘nao, ih đei arih păng bơ̆jang hăm jơhngơ̆m đon thoi yơ?

Đơ̆ng rŏng kơ Môis đei pơlôch bơngai Êyiptơ đe đei băt, sư đei kơdâu klĕnh tơ dêh Mađian, iŏk hnam dơnŏ păng wei triu kơ tơnei sư. Puăn jĭt sơnăm mă kơ jung dêh yua kơ kiơ ƀok Môis ưh kơ đei tơmam kơdih pơsư̆ mă lei nhen thoi bơngai wei triu thuê? Minh ‘nu bơngai Môis âu ưh kơ trŏ ưh kơ đei đon gơh hơgei ôh. Rŏ lăng sư đei bơ̆l hăl yua kơ kon pơlei Israel ưh kơ hlôh kơ jơhngơ̆m sư, đei dŏng tơgŭm kon pơlei sư mă lei kon pơlei sư roi sư pơlôch bơngai Êyiptơ, thoi noh sư đei arih ưh kơ đei bu băt na chă jang thuê đĕch kuă kơ jang pơjing tơmam sư kơdih. Đĭ tơhngam jĭt sơnăm, ƀok Môis ưh pă maih wă jang tơiung kơ dih kâu sư, ưh pă tơchĕng kơ kon pơlei pơla sư, ưh kơ maih wă chă pơdrŏng, ưh kơ maih wă yak năm tơnai maih arih lăm anih sư ƀơ̆t anih noh đĕch. Thoi noh na ‘bơ̆t Kră Yang ‘Bok Kei-Dei đei krao sư na sư chă trong wă sơngah.

‘Bok Môis ưh kơ băt kơ ‘Bok Kei-Dei yua dôm tơdrong noh wă bơtho tơƀôh ăn kơ sư. Truh kơ jơnăr Kră Yang, Kră Yang krao sư wih brŏk wă dŏng pơklaih kon pơlei đơ̆ng đĭch. Tuch luch, ƀok Môis đei chu yom Kră Yang, wih brŏk tơ hnam tơnei sư păng apinh tơnei sư ăn kơ sư brŏk tơ dêh Êyiptơ wă dŏng pơklaih kon pơlei Kră Yang năm tơ dêh char mă Kră Yang đei pơkă. Đơ̆ng minh ‘nu bơngai arih kuă pă hơtŭt kơ tơdrong nai arih wă tôch kơ khei năr ră mă lei ƀok Môis đei bơ̆jang kơ Kră Yang hăm jơhngơ̆m ‘nao plơ̆ng. Đơ̆ng bơngai wei triu jing bơngai pơgơ̆r kon pơlei ‘Bok Kei-Dei. Đơ̆ng minh ‘nu kon pơtao Pharaôn na dang ei jing ayăt kơ pơtao Pharaôn hăm nơ̆r apinh kon pơlei Isơrael lĕch đơ̆ng dêh Êyiptơ.

Năr âu năr mă pêng lăm sơnăm ‘nao, lu bơ̆n đei arih lăm sơnăm ‘nao, apinh Kră Yang ăn kơ bơ̆n mơnơh kơ yak năm hăm Kră Yang hăm jơhngơ̆m ‘nao plơ̆ng. Nĕ kơ đei bơngai bu tơchĕng khan pơm minh ‘nu bơngai lui akŭm minh năr tơpơh đĕch khan hoei bơih. Phŏ lu bơ̆n tơchĕng hiôk lăm tơdrong hŏk, tơdrong jang mă bơ̆n oei jang dang ei na hiơt kơ tơdrong mă Kră Yang đei pơkă kơ bơ̆n ba Tơdrong ‘Nao ‘Lơ̆ng Kră Yang jơ̆p jang. Apinh Kră Yang ăn kơ bơ̆n sơnăm ‘nao lu bơ̆n đei pơchŭt đơ̆ng Yang Bơhngol ‘Lơ̆ng, đei jơhngơ̆m pran dơ̆ng iung, yak năm tơanăp hơdai pơm keh nơ̆r Kră Yang ată tih hơdrol kơ Kră Yang tŏk tơpal plĕnh: “Thoi noh năm bĕ lu iĕm, bơtho kơ đĭ-đăng lu khŭl bơngai jơ̆p kơ teh đak, athei lu sư lui kiơ̆ kơ Inh, pơm ‘batem kơ lu sư krao anăn Yang ‘Bă, Yang Kon, hăm Yang Bơhngol ‘Lơ̆ng wă kơ đe nai băt kơ lu sư lui boih. Bơtho kơ lu sư pơm kiơ̆ tôm tơdrong Inh đei pơkă kơ lu iĕm. Inh oei hơdai hăm lu iĕm ling-lang truh năr tôch ning-mônh.” (Mathiơ 28:19-20). Sơnăm ‘nao, jơhngơ̆m pran ‘nao! Mă đei tơƀơ̆p tơdrong anat, mă đei tơdrong pơgăn đơ̆ng Sa-tan, mă khan đei kơtơih pơ̆k lăm chăl arih, apinh Kră Yang ăn kơ lu bơ̆n dơ̆ng kơjăp sơng iŏk nơ̆r Kră Yang đei pơjao, păng tơgŭm tơiung wă kơ dêh char ‘Bok Kei-Dei rai pran wơ̆ lăm teh đak.

Lu bơ̆n đei pơkă tơdrong kiơ hăm Kră Yang lăm sơnăm ‘nao âu?

Ơ Kră Yang, apinh mơnat kơ inh lơ wơ̆t inh ưh kơ mơ̆ng nơ̆r mă Ih đei krao wơh, ưh tam mă đĭ jơhngơ̆m lăm tơdrong bơ̆jang kơ Ih. Apinh Yang Bơhngol ‘Lơ̆ng thim ăn kơ inh jơhngơ̆m pran wă kơ ră roi Tơdrong ‘Nao ‘Lơ̆ng lăm sơnăm ‘nao âu. Yua anăn Kră Yang Yêsu Krist, Amen!

Đŏk Sơ̆p hla bơar ‘Bok Kei-Dei lăm pêng sơnăm: Hơriso 33-34.

Kênh Youtube BHKTHN:

https://www.youtube.com/c/bhkthn

Bài trướcNăm Mới Tinh Thần Mới – 31/1/2025
Bài tiếp theoThơ: XUÂN BẤT TẬN