Klei Aê Diê Blŭ: II Klei Yăl Dliê 13:1-12
Êlan kliăng: “Kâo čuăn leh ai tiê kâo tui gưt klei bhiăn Ih nanao tơl knhal tuč” (Klei Mmuñ Hđăp 119:112).
Klei êmuh ksiêm mĭn: Ya klei mtao Y-Abija ngă leh dơ̆ng mâo klei bi blah? Ya klei ñu mblang čiăng mă ai phung nah dih? Ya klei mdê plah wah phung ƀuôn sang Yuđa leh anăn phung ƀuôn sang Israel? Ya klei năng hơưi kơ Mtao Y-Abija? Ya klei mñă kơ drei mơ̆ng klei hriăm anei?
Leh ala mtao Israel leh anăn Yuđa dơ̆ng mâo klei bi blah snăn Mtao Y-Abija čar Yuđa đĭ ti sa čŏng čư̆ iêô mthưr Israel lui klei mĭn bi blah. Mtao lač sĭt bi blah hŏng Yuđa jing diñu dôk bi blah hŏng Aê Diê pô leh anăn amâo srăng dưi ôh. Mtao Y-Abija ba mdah tlâo mta phŭn čiăng mă ai Mtao Y-Jêrôbôam leh anăn phung ƀuôn sang Israel ti kwar Dưr: Tal sa, Aê Diê mâo leh sa klei bi mguôp hŏng hră jing klei bi mguôp dôk lă lar (Klei Yap 18:19b) čiăng jao klei dưi kiă kriê kơ djuê ana Mtao Y-Đawit ƀiădah Israel amâo mpŭ ôh klei Aê Diê čiăng, čiăng bi blah hŏng Yuđa. Tal dua, diñu kkuh leh kơ rup êmô mah kyua Mtao Y-Jêrôbôam tuh mkra (Klei Kbiă 20:3-6). Tal tlâo, diñu mkŏ mjing leh phung khua ngă yang hlue si klei mĭn hjăn suôt hĕ phung khua ngă yang Aê Diê ruah, jing anak čô Y-Arôn (Klei Yap 3:10). Mklăk wĭt, Mtao Y-Abija leh anăn phung ƀuôn sang Yuđa ti kwar Dhŭng amâo đuê̆ mơ̆ng Aê Diê ôh. Diñu gưt asăp Aê Diê čiăng mđĭ lar bruă jing khua ngă yang mơ̆ng anak čô Y-Arôn leh anăn yua phung Lêwi čiăng mă bruă kơ Aê Diê (Klei Yap 18:2). Diñu mđĭ lar klei kkuh mpŭ Aê Diê ti Sang Yang Yêrusalem, hlue si klei Aê Diê dăp dŭm mta mnơ̆ng hlăm Sang Yang (Bruă Lêwi 24:6), hlăk êjai phung ƀuôn sang Israel lui wir Aê Diê. Klei tŭ jing phung ƀuôn sang Yuđa mâo Aê Diê dôk mbĭt leh anăn ngă khua, kyua anăn tơdah Israel bi blah hŏng diñu jing bi blah hŏng Yêhôwa Aê Diê.
Jih phung Israel wăt phung Yuđa jing phung ƀuôn sang Aê Diê sơaĭ, thâo jih asăp Aê Diê mtă. Klei mdê jing hlei pô gưt hlue si klei Aê Diê mtă leh anăn hlei pô lui wir Aê Diê, amâo gưt asăp Ñu. Hlăk êjai Mtao Y-Abija dơ̆ng mŭt hlăm klei bi blah hŏng sa êpul lĭng kahan lu hĭn kơ pô dua blư̆, mtao thâo yua klei thâo mĭn čiăng mă ai, brei ƀuh mtao thâo hdră bhiăn Aê Diê, thâo si phung aê ama Yuđa gưt leh asăp Aê Diê. Ƀiădah klei năng hơưi jing jih tlâo thŭn kiă kriê, mtao Y-Abija lŏ “êbat hlăm jih jang klei soh…; amâo jing sĭt suôr klă ôh hŏng Yêhôwa Aê Diê” (I Bruă Mtao 15:3).
Hrue anei, tơdah drei amâo hlue ngă klei Aê Diê mtă snăn drei ăt dôk lui wir Ñu. Brei thâo răng kyua drei lui Aê Diê sĭt lui klei bi kƀĭn ti Sang Yang Ñu. Drei ăt lui Aê Diê sĭt amâo bi mguôp hŏng Ñu hlăm mông hriăm Klei Aê Diê Blŭ leh anăn wah lač grăp hruê. Wăt tơdah nao Sang Aê Diê grăp knăm kjuh, drei ăt lui Aê Diê tơdah hdĭp hlue si klei pô čiăng, amâo sĭt suôr klă ôh hŏng Aê Diê truh knhal tuč.
Mâo mơ̆ ya klei hlăm klei hdĭp ngă kơ drei ƀuh pô ka sĭt suôr klă hŏng Aê Diê?
Wah lač: Ơ Khua Yang, tơdah klei hdĭp kâo amâo gưt asăp, akâo kơ Aê Diê đru kâo kmhal klei soh čiăng dưi pap brei leh anăn lŏ wĭt hŏng Ih, čiăng kâo sĭt suôr klă hŏng Aê Diê leh anăn Ih jing Aê Diê kâo truh lă lar.
Dlăng Klei Aê Diê Blŭ hlăm tlâo thŭn: Klei Mmuñ Hđăp 148:1-14; 149:1-9; 150:1-6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
