Muab Siab Npuab Vajtswv Ibtxhis – 27/7/2022

787

 

 

II Xwmtxheej Vajntxwv 13:1-12

Nqe cim:

“Kuv txiav txim siab ua raws li koj tej kevcai mus txog hnub kawg” (Phau Ntawv Nkauj 119:112).

 

Lus nug rau sawvdaws xav:

  • Vajntxwv Anpiyas ua dabtsi thaum yuav muaj kev tsov rog?
  • Nws hais licas rau cov yeebncuab?
  • Qhov sib txawv ntawm cov Yudas thiab cov Yixalayees yog dabtsi?
  • Peb khuvleej vajntxwv Anpiyas rau yam dabtsi? Peb tau tau qhuab ntuas licas dhau zaj kawm no?

Thaum tebchaws Yixalayees thiab Yudas yuav sib tua, cov Yudas tus vajntxwv Anpiyas nce mus saum ib lub roob, nqua hu cov Yixalayees txhob nrog cov Yudas ua rog ntxiv lawm. Vajntxwv hais tias, lawv ua rog rau cov Yudas ces yog ua rog rau tus Tswv ntag thiab lawv yuav kov tsis yeej. Vajntxwv Anpiyas hais txog peb lub vimchiv kom vajntxwv Yelaunpau-as thiab cov Yixalayees sab Qaum teb txhob tuaj ua rog ntxiv: Tim ib, Tus Tswv tau muaj ib lo lus cogtseg ntev uas ruaj khov mus ibtxhis (Teev Npe 18:19b) pub rau Daviv cov xeebntxwv tau tswjkav lub tebchaws tiamsis cov Yixalayees tsis ua raws li tus Tswv siabnyiam, lawv xav tuaj tua cov Yudas. Tim ob, lawv tau pe tej mlom nyuj uas vajntxwv Yelaunpau-as muab kub los nchuav (Khiavdim 20:3-6). Tim peb, lawv tau tsa ib cov los ua povthawj raws lawv siabnyiam thiab ntiab cov povthawj tus Tswv xaiv uas yog Aloos tej xeebntxwv tawm (Teev Npe 3:10). Tiamsis, vajntxwv Anpiyas thiab cov Yudas sab Qab teb tsis tso tus Tswv tseg. Lawv mloog tus Tswv tej lus, cia Aloos tej xeebntxwv ua lawv lub luag haujlwm thiab siv cov Levis los pab (Teev Npe 18:2). Lawv pehawm Vajtswv hauv Tuamtsev nroog Yeluxalees, teeb txhua yam cuabyeej hauv lub Tuamtsev raws nraim li tus Tswv qhia (Levis Kevcai 24:6), tiamsis cov Yixalayees tau tso tus Tswv tseg lawm. Thaum kawg, cov Yudas thiaj tau Vajtswv nyob nrog thiab ua “tus thawjcoj”; vim li ntawd, yog cov Yixalayees tuaj tua lawv, ces yog tuaj ua rog nrog tus Tswv ntag.

Tagnrho cov Yixalayees thiab cov Yudas puavleej yog tus Tswv haivneeg, lawv puavleej paub tus Tswv tej lus samhwm thiab Nws lub siabnyiam. Qhov sib txawv yog leejtwg yuav yog tus mloog tus Tswv lus thiab leejtwg yuav tso tus Tswv tseg. Thaum vajntxwv Anpiyas yuav tawmtsam pab tubrog coob dua nws cov ib npaug, nws paub siv tej lus ntse los hais kom luag mloog, qhov ntawd qhia hais tias vajntxwv kuj paub tus Tswv txoj kevcai, paub cov Yudas tej yawg koob mloog tus Tswv lus licas. Tiamsis tu siab kawg, nyob hauv peb lub xyoos ua vajntxwv, Anpiyas tau “ua txhaum ib yam li nws txiv ua; nws yeej tsis hwm tus TSWV” (I Vajntxwv 15:3).

Niaj hnub nimno, yog peb tsis ua raws li tus Tswv tej lus samhwm ces kuj yog peb tso Nws tseg lawm ntag. Yuav tsum ceevfaj, vim tej zaum peb tso tus Tswv tseg yog thaum tsis tuaj pehawm hauv Nws lub Tuamtsev, tsis muaj kev sib raug zoo nrog Nws los ntawm kev nyeem Vajluskub thiab thov Vajtswv txhua hnub. Txawm yog peb tuaj pehawm hauv Tuamtsev, los yog peb tseem pheej ua neej raws siabnyiam, tsis muab siab npuab tus Tswv ces kuj yog peb tso Nws tseg lawm thiab ntag.

Muaj yam twg hauv peb lubneej ua rau peb tsis muab siab npuab tus Tswv?

Tus Tswv, yog nyob hauv nyuam yaus lubneej muaj kev tawv ncauj twg, thov Koj pab kom nyuam yaus txawj lees kev txhaum kom tau zamtxim thiab rov los cuag Koj, kom nyuam yaus muab siab npuab Koj mus ibtxhis. Amees.

Nyeem Vajluskub hauv peb lub xyoos: Phau Ntawv Nkauj 148:1-150:6

Kênh Youtube BHKTHN:

https://www.youtube.com/c/bhkthn

Bài trướcLâm Đồng: Hơn 1500 Học Viên Học Lớp Thánh Kinh Căn Bản Tại 6 Trung Tâm 
Bài tiếp theoSĭt Suôr Hŏng Aê Diê – 27/7/2022