Loos 15:1-7
Nqe cim:
“Ces tus TSWV uas yog Vajtswv hais tias: Tsis tsimnyog cia tus txivneej no nyob ib leeg. Kuv yuav tsim dua ib tug los nrog nws nyob ua txij ua nkawm pab nws” (Chivkeeb 2:18).
Lus nug rau sawvdaws xav:
– Timthawj Paulus ntuas cov uas muaj kev ntseeg ruaj lawm yuav tsum ua licas rau cov uas muaj kev ntseeg tsawg?
– Txojcai no muab siv hauv lub neej txijnkawm zoo licas?
– Neb ob niamtxiv sib pab licas kom lub neej txijnkawm tau zoo thiab zoo thooj tus Tswv?
Timthawj Paulus muab ib txojcai pub rau Pawg Ntseeg, hais tias: “Peb cov uas muaj kev ntseeg ruaj lawm, tsimnyog peb pab cov uas kev ntseeg tsawg thiab peb tsis txhob ua kom haum peb siab xwb” (nqe 1). Txojcai no kuj cheemtsum heev nyob hauv lub neej txijnkawm. Thaum Vajtswv tsim muaj kev sib yuav, Vajtswv twb hais meej lawm hais tias: “Tsis tsimnyog cia tus txivneej no nyob ib leeg. Kuv yuav tsim dua ib tug los nrog nws nyob ua txij ua nkawm pab nws” (Chivkeeb 2:18). Tus Tswv paub hais tias Adas zoo tsis txaus thiab nws cheemtsum ib tug los pab, yog li ntawd tus Tswv thiaj tsim Evas los nyob ntawm nws ib sab pab nws. Kev sib yuav tau tus Tswv tsim pub rau tus txiv neej thiab tus pojniam kom nkawd sib ntxiv, sib pab thiab sib txhim kho kom lub neej txijnkawm zoo zuj zus thiab muaj kev kaj siab.
Timthawj Paulus qhia kom peb txhua tus tsis txhob ua kom haum tus kheej siab xwb, tiamsis yuav tsum ua haum cov neeg ibncig siab kom pab tau lawv thiab muaj kev ntseeg ruaj (nqe 1-2). Nws kuj muab Tswv Yexus tus qauv los qhia rau peb txog qhov uas Tswv Yexus tsis ua haum tus kheej siab tiamsis txaus siab hlo tiv kev thuam kom cawm tibneeg (nqe 3-4). Timthawj Paulus taij thov tus Tswv pab peb ua tau lub neej sib haumxeeb kom sawvdaws qhuas Vaj Leej Txiv (nqe 5-6).
Txojcai sib pab thiab siv ntxiv yog txojcai tseemceeb txhim kho lub neej txijnkawm ruaj khov. Tus pojniam thiab tus txiv yog ob tug tibneeg sib txawv, nyias muaj nyias tus cwjpwm, tagnrho ob tug puavleej tau tsim raws li Vajtswv tus yamntxwv tsis yog raws li ib tug twg tus yamntxwv. Vim li ntawd, thaum rhais ruam mus rau lub neej txijnkawm yuav muaj ntau yam sib txawv, qee zaus tseem sib tawmtsam thiab. Tiamsis, Tswv Yexus qhia hais tias: “Nkawd tsis yog ob leeg lawm, tiamsis yog ib leeg xwb” (Mathais 19:6a). Ob tug yuav tsum sib pab kom sib haum rau sab ntsujplig, lub cev thiab kev xav. Yuav ua tau qhov no, peb yuav tsum kawm raws Tswv Yexus tus qauv thiab ua raws li txojcai Timthawj Paulus tau qhia.
Ob niamtxiv yuav tsum sib “txais tos”, txhais hais tias sib lees yuav zoo li tus Tswv twb lees yuav peb lawm, txais yuav qhov zoo thiab qhov phem huv tibsi (nqe 7). Tej yam zoo ntawm tus no yuav txhab ntxiv thiab pab tej yam tsis zoo ntawm tus tod. Ob tug sib pab kom yim hnub yim zoo, yim muaj txaus thiab yim zoo thooj tus Tswv. Cia li ua tus Tswv tsaug rau tej yam sib txawv ntawm koj thiab tus txij tus nkawm. Thov tus Tswv pab kom ob niamtxiv sib totaub, sib txais tos thiab paub siv tej yam sib txawv los sib pab txhim kho lub neej txijnkawm mus rau qhov zoo.
Thov Vajtswv,
Tus Tswv, thov pab nyuam yaus ob niamtxiv paub sib txais yuav zoo li tus Tswv tau txais yuav nyuam yaus ob niamtxiv. Thov qhia nyuam yaus ob niamtxiv paub sib pab thiab sib ntxiv kom txhim kho lub neej txijnkawm ruaj khov hauv Koj. Amees.
Peb puas txais yuav tej yam sib txawv thiab txaus siab hlo sib pab, sib ntxiv hauv lub neej txijnkawm lawm tau?
Nyeem Vajluskub hauv peb lub xyoos: Mathais 13:24-58
Kênh Youtube BHKTHN:
