Klei Aê Diê Blŭ: Rô-ma 15:1-7
Êlan kliăng: “Khua Yang Aê Diê lač, “Amâo jăk ôh êkei anăn dôk hjăn; Kâo srăng mjing brei kơ ñu sa čô pô đru năng kơ ñu.” (Klei Mphŭn Dơ̆ng 2:18)
Klei êmuh ksiêm mĭn: Ya klei khua ƀĭng kna Y-Pôl mtă mtăn kơ phung ktang brei ngă hŏng phung awăt? Si mă yua êlan hdră anei hlăm klei hdĭp ung mô̆? Si klei diih dôk bi đru hdơ̆ng ung mô̆ diih čiăng kơ klei hdĭp ung mô̆ dưi jing klă kluôm leh anăn msĕ si Khua Yang hĭn?
Khua ƀĭng kna Y-Pôl hưn mdah sa hdră êlan kluôm brei bi mâo hlăm Phung Sang Aê Diê snei: “Drei jing phung ktang hlăm klei đăo, brei drei gui klei ktrŏ phung awăt, leh anăn đăm bi mơak kơ drei pô ôh” (êlan 1). Hdră êlan anei ăt kăn dưi kƀah rei hlăm klei hdĭp ung mô̆. Kčưm mơ̆ng mphŭn dơ̆ng mkŏ mjing klei hdĭp ung mô̆, Khua Yang Aê Diê lač leh: “amâo jăk ôh êkei anăn dôk hjăn; Kâo srăng mjing brei kơ ñu sa čô pô đru năng kơ ñu” (Klei Mphŭn Dơ̆ng 2:18). Khua Yang thâo kơ Y-Ađam ăt mâo klei kƀah leh anăn čiăng mâo pô đru ñu, snăn Khua Yang hrih mjing H’Êwơ kăp dôk ti djiêô ñu. Khua Yang hrih mjingklei hdĭp ung mô̆ ti krah êkei leh anăn mniê čiăng bi klă ênŭm, bi đru, bi rŭ mdơ̆ng mbĭt hdơ̆ng ung mô̆ čiăng kơ klei hdĭp ung mô̆ dưi jing klă kluôm leh anăn jăk mơak.
Khua ƀĭng kna Y-Pôl mtô grăp čô hlăm phung drei amâo djŏ knŏng thâo bi mơak kơ drei pô ôh, ƀiădah brei thâo bi mơak kơ phung riêng gah čiăng ba klei tŭ dưn leh anăn đru bi rŭ mdơ̆ng hdơ̆ng găp (êlan 1-2). Ñu ăt bi êdah msĕ mơh rup bi hmô tloh ênoh mơ̆ng Khua Yang Yêsu tơdah Ñu amâo tuôm bi mơak kơ Ñu pô ôh ƀiădah kăp tŭ jih klei arăng tlao mưč kyua čiăng bi mtlaih mnuih (êlan 3-4). Khua ƀĭng kna Y-Pôl wah lač akâo kơ Khua Yang đru phung drei dôk hdĭp hnŭk ênang hdơ̆ng pô čiăng dưi mđrăm mbĭt sa asăp mpŭ mni kơ Aê Diê Ama (êlan 5-6).
Hdră êlan bi đru leh anăn bi ênŭm hdơ̆ng găp jing hdră êlan yuôm čiăng dưi mkŏ mdơ̆ng klei hdĭp ung mô̆ kjăp rơ̆ng. Ung leh anăn mô̆ jing dua čô mnuih mdê mdê, knuih klei jing mdê mdê, jih dua mâo klei hrih mjing tui si rup Aê Diê sơăi, amâo djŏ ôh tui si rup pô adih. Kyuanăn, tơdah mŭt hlăm klei hdĭp ung mô̆ srăng mâo lu snăk klei mdê, tăp năng bi mklăk kluôm dhuôm. Ƀiădah lĕ, Khua Yang Yêsu mtô: “Ung mô̆ amâo lŏ jing dua ôh ƀiădah knŏng sa kđeh” (Y-Mathiơ 19:6a). Brei jih diñu dua bi đru hdơ̆ng diñu čiăng dưi bi mguôp sa wăt hlăm klei hdĭp myang, hlăm asei mlei kđeh leh anăn ai tiê klei mĭn. Čiăng dưi ngă klei anei, brei drei tui ngă msĕ si klei Khua Yang Yêsu bi hmô leh anăn mă yua dŭm hdră êlan khua ƀĭng kna Y-Pôl mtô anei.
Jih dua ung mô̆ brei thâo bi “jum” hdơ̆ng pô, čiăng lač bi tŭ hdơ̆ng pô msĕ si Khua Yang Yêsu tŭ leh drei pô mbĭt hŏng klei jăk wăt klei jhat (êlan 7). Grăp čô hŏng klei jăk pô dê srăng kăp đru bi ênŭm anôk ka klă ênŭm kơ pô dih. Jih dua kăp bi đru hdơ̆ng pô čiăng dưi jing jăk klă hĭn leh anăn jing msĕ si Khua Yang hĭn grăp hruê. Bi mni bĕ kơ Khua Yang kyua klei jing mdê mdê ti krah ih pô hŏng pô ih dôk. Akâo kơ Khua Yang đru ung mô̆ mâo klei bi thâo săng, bi tŭ leh anăn yua klei mdê mdê anăn kăp bi đru rŭ mdơ̆ng klei hdĭp ung mô̆ dưi jing jăk mơak leh anăn mdê hĭn.
Si ngă drei bi tŭ klei mdê hlăm grăp čô leh anăn kăp bi đru, bi ênŭm hdơ̆ng pô hlăm klei hdĭp ung mô̆ mơ̆?
Wah lač: Ơ Khua Yang, akâo Khua Yang đru ung mô̆ hmei kyua klei guh kơang Ih nanao, snăn thâo bi tŭ jum hdơ̆ng hmei msĕ si Khua Yang tŭ jum leh hmei. Akâo Khua Yang bi hriăm ung mô̆ hmei thâo bi đru leh anăn bi klă ênŭm hdơ̆ng hmei čiăng kơ klei hdĭp ung mô̆ dưi jing kjăp rơ̆ng hlăm Khua Yang.
Dlăng Klei Aê Diê Blŭ hlăm tlâo thŭn: Y-Mathiơ 13:24-58
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
