Klei Aê Diê Blŭ: Y‑Mathiơ 21:12-13
Êlan kliăng: “Ñu lač kơ phung anăn, “Klei Aê Diê Blŭ čih leh snei, ‘Arăng srăng pia sang kâo sang pioh wah lač,’ ƀiădah diih mjing gơ̆ ƀăng kơ phung knĕ.” (Y‑Mathiơ 21:13)
Klei êmuh ksiêm mĭn: Ya klei Khua Yang Yêsu ngă leh ti Sang Kkuh Mpŭ Yêrusalem? Si Ñu mñă kơ klei kñăm phŭn mơ̆ng Sang Kkuh Mpŭ? Ya klei mñă kơ drei tơdah nao kkuh mpŭ kơ Khua Yang?
Leh êpul mnuih ƀuôn sang bi mni kơ Khua Yang Yêsu mŭt hlăm ƀuôn Yêrusalem, hruê êdei Ñu nao ti Sang Kkuh Mpŭ. Tinei Khua Yang “suôt jih jang mnuih dôk čhĭ mnia wăt blei mnơ̆ng hlăm Sang Kkuh Mpŭ. Ñu klư̆ jhưng phung mlih prăk leh anăn mdhô̆ phung čhĭ mgăm” (êlan 12). Anei jing gưl tal dua Khua Yang Yêsu ngă klei anei, tal sa jing hlăk Ñu mrâo mphŭn ngă bruă klam (Y‑Yôhan 2:13-17). Phung čhĭ mnia kƀĭn sa anôk hlăm wăl Sang Kkuh Mpŭ jing anôk pioh kơ phung tue. Diñu čhĭ mnơ̆ng pioh yua ngă yang kơ phung nao hlăm klei kkuh mpŭ hŏng ênoh yuôm snăk; phung mlih prăk bi mlih prăk yua ti êngao jing prăk mơ̆ng Sang Kkuh Mpŭ čiăng myơr hŏng ênoh yuôm snăk. Klei năng lač jing bruă mnia blei anei dôk ti tluôn khua ngă yang prŏng Y’Anas! Khua Yang Yêsu yua leh boh blŭ “knĕ” čiăng lač kơ bruă ngă mjing wăl Sang Kkuh Mpŭ jing anôk knĕ hrô kơ kkuh mpŭ kơ Aê Diê.
Phung Yuđa hlăk dlăng phung ƀuôn sang tue hơăi mang kyua anăn diñu amâo mđing ôh kơ ai tiê ksiêm hriăm leh anăn kkuh mpŭ mơ̆ng phung tue tơdah diñu nao ti Sang Kkuh Mpŭ. Khua Yang Yêsu lač hŏng phung Yuđa snei, “Klei Aê Diê Blŭ čih leh snei, ‘Arăng srăng pia sang kâo sang pioh wah lač,’ ƀiădah diih mjing gơ̆ ƀăng kơ phung knĕ” (êlan 13), Khua Yang mă hlăm Y‑Êsai 56:7 čiăng mñă klă kơ Sang Aê Diê jing sang wah lač kơ grăp djuê ana, amâo djŏ knŏng mnuih Yuđa ôh ƀiădah grăp čô hlei djuê ana ăt dưi sơăi ksiêm hriăm kơ Khua Yang leh anăn wah lač akâo kơ Khua Yang. Tinei, phung ƀuôn sang Yuđa bi mjing Sang Aê Diê jing “ƀăng kơ phung knĕ” kyua anăn ngă leh hŏng klei ktang tĭt.
Phung ƀuôn sang hruê anei brei thâo săng Sang Aê Diê jing Sang wah lač. Phung Sang Aê Diê jing anôk jih jang mnuih nao kkuh mpŭ leh anăn bi mguôp hŏng Aê Diê. Phung ƀuôn sang Aê Diê brei mâo knuih bi êdah ai tiê huĭ mpŭ kơ Aê Diê mơ̆ng klei blŭ, ai tiê mđing hmư̆ Klei Aê Diê Blŭ, jih ai tiê mpŭ kơ Anăn Aê Diê. Phung Sang Aê Diê ăt jing anôk drei iêô phung ka đăo nao hlăm dŭm hdră hưn mthâo klei khăp Khua Yang Yêsu kơ anak mnuih. Kyua anăn ya klei ngă gun kpăk phung ƀuôn sang Aê Diê hlăm klei bi kƀĭn kkuh mpŭ kơ Khua Yang amâodah phung ka đăo nao hmư̆ Klei Aê Diê Blŭ brei dưi mñă čiăng mkra mlih leh anăn lăm lui. Phung ka đăo ăt srăng mâo klei bi kgăn mơh tơdah nao hlăm klei hưn klei mrâo mrang jăk kyua klei arăng dlăng hơăi mang, kƀah klei khăp, amâodah klei blŭ amâo mâo klei khăp mơ̆ng phung hlăm sang Aê Diê. Brei hdơr hlăk đưm Khua Yang Yêsu ƀuah ăl ktang tĭt kơ klei gun kpăk phung mkăn nao kkuh mpŭ leh anăn bi mguôp hŏng Aê Diê hlăm Sang Aê Diê, snăn hruê anei ăt msĕ snăn mơh. Grăp čô drei brei thâo răng!
Mâo mơ̆ mmông drei mâo bruă ngă bi gun kpăk pô mkăn hlăm klei kkuh mpŭ kơ Aê Diê?
Wah lač: Ơ Khua Yang, kâo bi mni kơ Aê Diê kyua kâo dưi mâo klei êngiê čiăng kkuh mpŭ kơ Ih. Akâo kơ Ih brei kơ kâo amâo mâo klei blŭ, bruă ngă bi kgun kpăk ayŏng amai adei kâo hlăm klei kkuh mpŭ kơ Aê Diê. Akâo kơ Ih đru kâo êpa hmao, tui duah Aê Diê čiăng kkuh mpŭ kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
