Mathais 21:12-13
Nqe cim:
“Nws hais rau lawv tias: Twb muaj lus sau cia hais tias, ‘Kuv lub tuam tsev yuav hu tias lub tsev uas thov Vajtswv,’ tiamsis nej muab ua qhov rau tub sab nkaum.” (Mathais 21:13)
Lus nug rau sawvdaws xav:
– Tswv Yexus tau ua dabtsi hauv lub Tuamtsev Yeluxalees?
– Nws tau hais txog lub homphiaj tseemceeb ntawm lub Tuamtsev yog dabtsi?
– Peb tau qhuab ntuas li cas thaum tuaj pehawm Vajtswv?
Tomqab uas cov pejxeem txais tos Tswv Yexus mus rau hauv nroog Yeluxalees lawm, hnub tomqab Tswv Yexus mus rau hauv lub Tuamtsev. Nyob ntawd, Tswv Yexus tau “ntiab cov neeg uas ua lag ua luam hauv lub tuam tsev khiav, thiab nws muab cov uas pauv nyiaj tej rooj thiab cov uas muag nquab nyeg tej rooj zaum ntxeev pes kiag tseg” (nqe 12 HMOWSV). Zaug no yog zaum ob uas Tswv Yexus ua qhov no, thawj zaug yog thaum chiv ua Nws txoj haujlwm (Yauhas 2:13–17). Cov neeg ua lag luam tuaj nyob hauv Tuamtsev lub tshav puam sab nraud yog qhov chaw rau lwm haivneeg. Lawv muab cov tsiaj uas luag yuav ua khoom fij los muag tus nqi kim heev rau cov neeg tuaj ua kevcai, thiab cov neeg pauv nyiaj muab tej nyiaj uas siv sab nraud pauv mus ua nyiaj siv hauv lub Tuamtsev tus nqi siab kawg. Qhov zoo hais tshaj yog tej kev lag luam ntawd muaj kev tso cai ntawm tus Povthawj Hlob Anas! Tswv Yexus tau siv lo lus “tub sab” los cem tes haujlwm muab Tuamtsev lub tshav puam uas siv pehawm Vajtswv los ua qhov chaw huab luag lwm tus.
Cov Yudais yeej ib txwm saib tsis taus cov neeg txawv tebchaws, lawv thiaj tsis quav ntsej txog lwm haivneeg nplooj siab nrhiav thiab pehawm Vajtswv thaum tuaj hauv Tuamtsev. Tswv Yexus thiaj hais rau cov Yudais hais tias: “Twb muaj lus sau cia hais tias: Kuv lub tuam tsev yuav hu tias lub tsev uas thov Vajtswv” (nqe 13), Tswv Yexus siv nqe lus hauv Yaxayas 56:7 los hais meej hais tias Vajtswv lub Tuamtsev yog lub tsev uas txhua haivneeg tuaj thov Vajtswv, tsis yog cov Yudais xwb tiamsis txhua tus neeg hauv txhua haivneeg puavleej muaj cuabkav nrhiav thiab taij thov Vajtswv. Nyob ntawm no, cov Yudais tau muab Vajtswv lub Tuamtsev hloov mus ua ib lub chaw rau “tub sab” nkaum, yog li Tswv Yexus thiaj ua hnyav npaum ntawd.
Vajtswv cov menyuam niaj hnub nimno, yuav tsum zeem paub hais tias Vajtswv lub Tuamtsev yog lub tsev thov Vajtswv. Tus Tswv Pawg Ntseeg yog qhov chaw uas peb sawvdaws tuaj pehawm thiab sib raug zoo nrog Vajtswv. Peb yuav tsum muaj lub siab uas hwm Vajtswv dhau ntawm txhua lo lus hais, nplooj siab mloog Vajtswv Txojlus thiab qhuas Vajtswv lub koob npe . Pawg Ntseeg kuj yog qhov chaw uas peb caw phoojywg tuaj koom tej rooj qhia txog Tswv Yexus txojkev hlub rau tibneeg. Vim li ntawd, yam twg uas ua tabkaum tus Tswv haivneeg kev pehawm Vajtswv, lossis ua tabkaum tej phoojywg tuaj mloog Vajtswv Txojlus ces yuav tsum raug hais kom txhim kho thiab muab tso povtseg. Cov phoojywg tsis tau ntseeg kuj raug kev cuam tshuam thaum tuaj koom rooj xa Moo Zoo tiamsis cov ntseeg tsis quavntsej txog lawv, tsis xav zoo rau lawv, lossis tsis hais tej lus hlub lawv. Yuav tsum nco ntsoov hais tias thaum ub Tswv Yexus twb cem tawv heev rau tej haujlwm ua cuam tshuam lwm tus los pehawm Vajtswv thiab sib raug zoo nrog Vajtswv hauv Nws lub Tuamtsev lawm, ces hnub no kuj zoo ib yam nkaus li ntawd. Peb txhua tus yuav tsum ceevfaj!
Thov Vajtswv,
Vajtswv, nyuam yaus ua Koj tsaug uas nyuam yaus muaj kev ywj pheej tuaj pehawm Koj. Thov Koj pub kom nyuam yaus tsis muaj tej lus hais lossis tej haujlwm ua cuam tshuam lwm tus hauv kev pehawm Koj. Thov pub nyuam yaus muaj lub siab nqhis nqhawv los nrhiav Koj thiab pehawm Koj. Nyuam yaus tuav Yexus Khetos lub npe thov, Amees.
Peb puas tau ua tej yam uas tabkaum lwm tus hauv kev pehawm Vajtswv?
Nyeem Vajluskub hauv peb lub xyoos: I Xwmtxheej Vajntxwv 13
Kênh Youtube BHKTHN:
