Yelemis 44:20-30
Nqe cim:
“Kuv yuav saib ntsoov tsis pub kom nej vammeej, tiamsis yuav cia kom nej puastsuaj. Nej yuav tuag tas, tsis hais tuag rau hniav ntaj hniav riam lossis tuag kab mob kev nkeeg, mus txog hnub uas nej tsis tshuav ib tug li” (Yelemis 44:27).
Lus nug rau sawvdaws xav:
– Thaum cov Yudas muaj lub siab tawv thiab tsis mloog lus, tus cevlus hais li cas rau lawv?
– Thaum “tus Tswv chim heev”, Nws ua li cas?
– Zaj kawm tus Tswv saib ntsoov ua kom puastsuaj qhia kom peb paub ceevfaj dabtsi?
Cov neeg Yudas tsis ua raws li tus Tswv tej lus samhwm, lawv ua raws li lawv lub siab nyiam, tua tsiaj hlawv fij rau tus niam vajntxwv ntuj, qhov ntawd yog tej kev “phem kev qias” thiab “yog kev nkauj kev nraug” lawv ua tabmeeg tus Tswv. Yog li, tus cevlus Yelemis qhia rau tus Tswv haivneeg paub hais tias tus Tswv paub thiab nco lawv tej kev tawvncauj, tsis mloog lus thiab ua txhaum xws li “nej cov yawgkoob, nej cov vajntxwv, nej cov thawjcoj thiab cov neeg uas nyob hauv tebchaws Yudas”. Thaum txog lub sijhawm “tus Tswv tsis xav saib” (nqe 21-23), Nws lub hwjchim yuav ua kom cov Yudas puastsuaj hauv lub tebchaws Iziv tas, tshwj cov uas seem rov qab los. Qhov no yeej yuav muaj li tus Tswv hais. Tus Tswv saib ntsoov ua kom lawv puastsuaj (nqe 26-27). Lub cim qhia paub tus Tswv yeej yuav ua raws li Nws hais yog “…muab Falaus Haufelas uas kav tebchaws Iziv cob rau nws cov yeebncuab uas xav muab nws tua povtseg, ib yam li kuv muab Vajntxwv Xedekiyas uas kav tebchaws Yudas cob rau Vajntxwv Nenpukajnexales uas kav tebchaws Npanpiloos uas yog Xedekiyas tus yeebncuab uas xav muab nws tua povtseg” (nqe 30).
Cov neeg Yudas nyob hauv lub tebchaws Iziv zoo yam li kaj siab lug, muaj noj tsau npo thiab tsis muaj kev txhawj, tsis pom tej sub tawg sub ntsha; yog li lawv rov pemlom ua phem ua qias kawg nkaus thiab txaus siab rau tej uas lawv muaj. Lawv tsis quav ntsej txog tus Tswv tej lus qhia dhau los ntawm tus cevlus Yelemis thiab kuj tsis quavntsej txog tus Tswv tej lus ceebtoom hais tias txog lub sijhawm Nws yuav ua kom lawv puastsuaj. Txog lub sijhawm tus Tswv “tsis xav saib”, kev puastsuaj yuav los raug lawv. Thaum ntawd, tej lus uas tus Tswv qhia, lawv xav txog ces twb lig lawm.
Nimno, peb tau txais tej lus cog tseg ntau yam nyob hauv Phau Vajluskub, tsis yog li xwb kuj muaj tej lus ceebtoom thiab. Ntau leej paub hais tias yus ua txhaum tiamsis tsis pom raug puastsuaj, yog li saib tsis taus tus Tswv tej lus qhia, mus pehawm tom tuamtsev los tseem txiav txim siab ua raws li yus lub siab nyiam, ua qhev rau tej nyiaj txiag. Tej uas peb ua, tus Tswv puavleej “…paub lossis …nco tej ntawd” (nqe 21). Yuav tsum ceevfaj, yog peb pheej ua raws li yus lub siab ces txog lub sijhawm rau txim, peb yuav tsis muaj sijhawm los lees kev txhaum. Saib cov Yudais lub neej ua rau peb txhua tus paub ceevfaj, mus raws li txojkev ntseeg, mloog tus Tswv lus, vim“poob rau hauv Vajtswv tus uas muaj sia nyob lub xibteg, tus ntawd yuav ntshai kawg nkaus li” (Henplais 10:31).
Thov Vajtswv,
Vajtswv! Nyuam yaus paub hais tias Koj yeej yuav ua raws li Koj tej lus cog tseg, kom nyuam yaus cia siab ntsoov rau Koj thiab niaj hnub tswj lub neej zoo thiaj tsis raug txim. Amees.
Puas muaj yam dabtsi cheemtsum peb lees txim, hloov tshiab thaum kawm dhau zaj hnub no? Peb sawvdaws puas muaj kev txiav txim siab ua dabtsi rau tus Tswv?
Nyeem Vajluskub hauv peb lub xyoo: Lukas 6:1-36
Kênh Youtube BHKTHN:
