Sab Ntsujplig Quaj Ntsuag – 7/9/2022

486

 

 

Mathais 5:4

 Cov uas paub nyuaj siab rau lawv tej kev txhaum; cov ntawd tau koob hmoov rau qhov Vajtswv yuav nplig lawv siab!

Phau txhais tshiab Hmowsv hais tias: “Cov uas quaj ntsuag tau nyob kaj siab lug, rau qhov lawv yuav tau txais kev nplij siab”.

 

Lus nug rau sawvdaws xav: Vim li cas quaj ntsuag tau koob hmoov? Qhov koob hmoov ntawd yog dabtsi? Txoj koob hmoov no qhia rau peb paub txog yus sab ntsujplig li cas?

Quaj ntsuag thiab nyuaj siab mus sib nraws nroos. Tiamsis hauv qhov koob hmoov tim ob, Tswv Yexus hais tias: “Cov neeg uas paub nyuaj siab…tau koob hmoov”. Quaj ntsuag thaum zeem paub pluag sab ntsujplig, yog li peb totaub hais tias yog quaj ntsuag rau sab ntsujplig. Hauv II. Kauleethaus 7:10-11, Timthawj Paulus hais txog kev nyuaj siab raws li Vajtswv siab nyiam coj mus txog qhov kev lees txim, thiab lees txim ces ntsig txog txojkev txhaum. Yog li ntawd, quaj ntsuag raws li tus Tswv siab nyiam yog quaj tu siab rau tej kev txhaum (Phau Ntawv Nkauj 38:18). Tswv Yexus tsis yog hais kom cov ntseeg yuav tsum ua neeg nyuaj siab, quaj ntsuag, thiab Nws kuj tsis hais kom cov ntseeg quaj ntsuag thaum ntsib kev txomnyem, tiamsis yog quaj ntsuag vim zeem paub kev txhaum.

Tim ib, quaj ntsuag thaum yus ua txhaum. Thawj qhov koob hmoov yog ntsig txog seem uas paub tias yus sab ntsujplig raug puastsuaj, qhov koob hmoov tim ob ntsig txog seem kev xav. Thaum zeem paub hais tias yus yog leejtwg ces lub siab yuav muaj kev xav thiab nyuaj siab tshwm qhov kev quaj ntsuag. “Quaj ntsuag” tsis yog muaj ib zaug nyob hauv tus neeg zeem paub kev txhaum thiab txais yuav Yexus xwb, tiamsis “quaj ntsuag” yog hais txog lub neej uas ua ntu zus mus, txhais tau hais tias quaj ntsuag txog tej kev txhaum thiab nrhiav txojkev cawm dim rau lub neej txhua hnub.

Tim ob, tus ntseeg Yexus tsis yog quaj rau tej kev txhaum yus ua xwb tiamsis quaj rau tej neeg ibncig, hauv lub tebchaws uas yus nyob thiab (Phau Ntawv Nkauj 119:136; Yelemis 9:1). Timthawj Paulus twb quaj rau cov neeg uas lees hais tias lawv yog ib tug ntseeg tiamsis qhov tseeb lawv yeej tsis paub tus Tswv thiab ua neej tsis raws li tus Tswv qhia (Filipis 3:18). Nimno peb puas quaj ntsuag rau peb cov menyuam thaum lawv tso kev ntseeg tseg mus ua raws li neeg ntiajteb ua? Peb puas quaj ntsuag vim muaj coob leej tawmtsam tus Tswv, mus pe dab pemlom?

Tus Tswv hais tias tus uas quaj ntsuag rau nws tej kev txhaum yuav tau koob hmoov vim tau “nplig…siab” – qhov kev nplig siab no yog tau kev zam txim. Ua lwm seem lus hais, tsuas yog cov neeg uas quaj ntsuag rau lawv tej kev txhaum thiaj tau “koob hmoov”, vim tus ntawd tau zam tej kev txhaum huvsi. Yuav ua li cas kom ua tau ib tug neeg quaj ntsuag rau txojkev txhaum? Tsuas yog tus Tswv Txojlus qhia rau peb paub tias yam twg yog kev txhaum thiab yam twg dawbhuv, thiab taw qhia rau peb paub tej kev sim siab uas tabtom nyob puagncig yus. Yog li ntawd, cia li mloog tus Tswv qhia rau yus txhua hnub los ntawm qhov uas yus niaj hnub thov Vajtswv, yus thiaj paub ua lub neej haum Nws siab nyiam.

 

Thov Vajtswv,

Tus Tswv, thov Koj tshuaj saib nyuam yaus lub neej txhua hnub. Thov Koj Txojlus qhia thiab ntxuav kom nyuam yaus lub neej dawbhuv. Thov koj hlub thiab cawm nyuam yaus lub tebchaws, pub txojsia ntev dhawv ibtxhis rau nyuam yaus cov txheebze. Amees.

 

Peb puas quaj ntsuag rau yus thiab cov neeg uas nyob puagncig peb tej kev txhaum?

Nyeem Vajluskub hauv peb lub xyoos: Xalumoos Tej Nkauj 4:1-5:2

Kênh Youtube BHKTHN:

https://www.youtube.com/c/bhkthn

Bài trướcHiệp Nguyện Giáo Phẩm và Nhân Sự Tỉnh Quảng Ngãi Tháng 09/2022
Bài tiếp theoMngăt Ai Tiê Čŏk Hia – 7/9/202