Klei Aê Diê Blŭ: Y-Mathiơ 5:4
Êlan kliăng: “Jăk mơak yơh phung čŏk hia, kyuadah Aê Diê srăng bi juh diñu.” (Y‑Mathiơ 5:4)
Klei êmuh ksiêm mĭn: Si ngă čŏk hia jing klei jăk mơak? Ya klei mă tŭ mơ̆ng klei jăk mơak? Klei jăk mơak anei brei drei thâo ya klei jing kơ mngăt ai tiê drei?
Čŏk hia khăng nao mbĭt hŏng klei ênguôt hnĭng. Ƀiădah hlăm klei jăk mơak tal dua, Khua Yang Yêsu lač: “Jăk mơak yơh phung čŏk hia”. Kyua klei čŏk hia tinei tui tluôn klei thâo kral klei ƀun ƀin hlăm mngăt ai tiê snăn thâo săng jing klei mngăt ai tiê čŏk hia. Hlăm II Kôrantô 7:10-11, khua ƀĭng kna Y-Pôl brei thâo klei ênguôt hnĭng tui si Aê Diê atăt kơ klei kmhal kơ klei soh leh anăn djŏ tuôm hŏng klei soh. Snăn, čŏk hia tui si Khua Yang jing čŏk hia kơ klei soh (Klei Mmuñ Hđăp 38:18). Khua Yang Yêsu amâo lač kơ phung đăo ênguôt hnĭng, knap mñai nanao ôh, leh anăn Ñu kăn lač mơh kơ phung đăo čŏk hia tơdah tlă anăp hŏng klei truh dleh dlan, ƀiădah čŏk hia kyua thâo klei soh.
Tal sa, čŏk hia kơ klei soh drei pô. Klei jăk mơak tal sa djŏ tuôm hŏng klei thâo săng kơ klei dlưh rai mngăt ai tiê drei. Tơdah thâo kral sĭt hlei drei pô jing snăn drei srăng mâo klei kčŭt ai tiê tơl dlai hŏng klei čŏk hia. “Čŏk hia” amâo djŏ ôh knŏng sa blư̆ êlâo hlăk mnuih soh thâo kral klei soh leh anăn đăo kơ Khua Yang Yêsu, ƀiădah “čŏk hia” jing boh hră lač kơ ară anei hin, čiăng lač mta bruă ăt ngă nanao, čŏk hia kơ klei soh amâo mâo mjưh ôh hlăk mâo leh klei bi mtlaih ƀiădah ăt ngă nanao hlăm klei hdĭp phung đăo grăp hruê.
Tal dua, phung đăo amâo knŏng hia kơ klei soh pô ƀiădah wăt hia kơ klei soh phung riêng gah, phung ƀuôn sang drei dôk hdĭp mbĭt (Klei Mmuñ Hđăp 119:136; Y‑Yêrêmi 9:1). Khua ƀĭng kna Y-Pôl tuôm čŏk hia kơ phung arăng pia jing phung đăo ƀiădah amâo sĭt thâo kral Khua Yang ôh leh anăn dôk hdĭp soh wê (Philip 3:18). Hruê anei si ngă drei čŏk hia mơ̆ kơ phung anak drei lui wir klei đăo, tui tiŏ êlan klei hdĭp tui si lăn ala anei? Si ngă drei čŏk hia mơ̆ kyua lu mnuih bi kdơ̆ng hŏng Aê Diê, ư ai mbĭt hŏng klei kkuh rup yang?
Khua Yang lač phung čŏk hia kơ klei soh srăng mâo klei jăk mơak kyuadah “Aê Diê srăng bi juh diñu” – klei bi juh kbiă hriê mơ̆ng klei pap brei klei soh. Blŭ mdê, knŏng phung čŏk hia kơ klei soh dưi mâo klei “jăk mơak” kyuadah pô anăn srăng mă tŭ klei pap brei klei soh. Si drei ngă čiăng jing pô čŏk hia kơ klei soh? Knŏng Klei Aê Diê Blŭ yơh brei drei thâo kral ya klei jing soh, ya klei jing doh jăk, leh anăn brei drei djăl thâo kral mtam ya klei mplư dôk jŭm dar drei. Kyuanăn brei mđing hmư̆ Klei Aê Diê Blŭ hŏng drei grăp hruê hlăm mmông pioh wah lač hjăn čiăng mă tŭ klei Khua Yang pap brei klei soh leh anăn lŏ bi mrâo drei leh anăn mă tŭ klei ktang myang hdĭp bi mơak kơ Aê Diê.
Si ngă drei hia mơ̆ kơ klei soh drei pô leh anăn kơ klei soh phung riêng gah drei?
Wah lač: Ơ Khua Yang, akâo Ih brei kâo ksiêm hŏng klei kpă sĭt klei soh kâo grăp hruê. Akâo Klei Aê Diê Blŭ mtrang mngač leh anăn bi doh klei hdĭp kâo. Akâo Khua Yang pap brei bi mtlaih lăn čar kâo leh anăn bi mtlaih brei phung găp djuê kâo.
Dlăng Klei Aê Diê Blŭ hlăm tlâo thŭn: Klei Mmuñ Siam Hĭn 4:1 – 5:2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
