II Xwmtxheej Vajntxwv 31:4-10
Nqe cim:
“Kuv haivneeg thiab kuv yeej muab tsis tau ib yam dabtsi pub rau koj li, rau qhov tej ntawd puavleej yog koj li, peb tsuas muab tej uas yog koj li rov rau koj xwb.” (I Xwmtxheej Vajntxwv 29:14)
Lus nug rau sawvdaws xav:
– Vajntxwv Hexekiyas hais kom cov pejxeem ua dabtsi?
– Cov pejxeem pom ua li cas?
– Vim li cas lawv ua tau li ntawd?
– Peb tabtom muaj lub siab thiab tus cwjpwm fij khoom zoo li cas?
Tomqab uas txhim tsa kev ua Vajtswv haujlwm hauv Tuamtsev, Vajntxwv Hexekiyas txhim tsa kev fij khoom nyiaj txiag ua haujlwm hauv lub Tuamtsev. Thaum vajntxwv tshajtawm rau cov pejxeem nyob hauv lub nroog Yeluxalees kom fij khoom nyiaj txiag pab cov povthawj thiab cov neeg Levis uas ua Vajtswv haujlwm ces muaj ob pab neeg zoo siab hlo pab. Thawj pab yog “cov neeg Yixalayees”, hauv cov ntawd muaj cov uas nyob sab qaumteb, coj lawv tej thawj qoobloo, thiab ib feem kaum ntau kawg nkaus tuaj fij. Pab tim ob, yog “cov neeg Yixalayees thiab cov neeg Yudas uas nyob tej nroog hauv lub tebchaws Yudas, lawv fij ib feem kaum uas yog tej tsiaj thiab tej khoom uas lawv tseg tshwjxeeb (Teev Npe 18:19). Thaum hais txog kev fij khoom ntawm cov neeg Yixalayees thiab cov neeg Yudas, phau ntawv Xwmtxheej Vajntxwv xav hais txog qhov kev koom tes ntawm tus Tswv haivneeg. Lawv koom siab ua Kevcai Hla Dhau, nimno lawv koom siab fij khoom los pab cov neeg ua Vajtswv tes haujlwm hauv lub Tuamtsev. Lawv fij tsis yog ua raws li Vajtswv tej lus samhwm (Levis Kevcai 27:30-32) tiamsis fij vim lawv paub ua tus Tswv tsaug rau tej koob hmoov uas Nws pub.
Qhov kev fij khoom no pib lub hli peb mus txog rau lub hli xya, yog ntu sijhawm uas sau ob cim qoobloo tomqab uas ua Kevcai Hla Dhau. Cov khoom fij ntau mus txog qib uas muab tib ua tsheej pawg cia. Tus duab no ua rau vajntxwv thiab cov thawjcoj tsa suab qhuas tus Tswv thiab foom koob hmoov rau cov pejxeem. Lawv qhuas tus Tswv vim lawv paub hais tias yog Nws pub es cov pejxeem thiaj fij tau ntau npaum ntawd (I Xwmtxheej Vajntxwv 29:14). Lawv foom koob hmoov rau cov pejxeem thiab thov Vajtswv pab kom Nws pub koob hmoov ntau npaug rau cov pejxeem. Tus Povthawj Hlob Axaliyas hais rau vajntxwv tias txij thaum cov pejxeem pib coj tej khoom tuaj fij hauv Tuamtsev ces cov povthawj thiab cov Levis muaj noj muaj haus txaus thiab tseem tshaj, lawv zeem paub tias Vajtswv twb foom koob hmoov rau cov pejxeem yog li lawv thiaj fij ntau npaum li ntawd.
Cov pejxeem nyob tiam Vajntxwv Hexekiyas fij khoom ntau yam ua Vajtswv tes haujlwm, vim lawv paub ua Nws tsaug. Ntau lub xyoo nyob rau kev pemlom, nimno tau los cuag Vajtswv thiab tau Nws zam txim, nrog nraim. Lawv zoo siab heev thiab paub ua tus Tswv tsaug, yog li lawv thiaj muaj lub siab dav fo fij khoom. Nimno peb kuj yuav tsum paub ua tus Tswv tsaug, vim tau Nws zam txim, cawm thiab txhua yam uas peb muaj puavleej yog Nws pub tagnrho. peb txhua tus yuav tsum xyaum Vajtswv haivneeg tiam Vajntxwv Hexekiyas nyob tus qauv fij khoom, fij tas siab vim peb paub tias tus Tswv pub txhua yam rau peb xws li dag zog, nyiaj txiag, qoobloo… puavleej yog Nws pub xwb.
Thov Vajtswv,
Vajtswv, ua tsaug qhov uas Koj hlub, cawm nyuam yaus thiab pub nyuam yaus muaj txhua yam. Thov Koj pab kom nyuam yaus txaus siab hlo thiab ncaj ncees rau kev fij khoom nyiaj txiag ua Koj tes haujlwm kom dav fo. Nyuam yaus tuav Tswv Yexus lub npe thov, Amees.
Peb puas ncaj ncees fij khoom nyiaj txiag ua Vajtswv tsaug lawm los tsis tau?
Nyeem Vajluskub hauv peb lub xyoo: Yaxayas 44
Kênh Youtube BHKTHN:
