Klei Aê Diê Blŭ: II Klei Yăl Dliê 31:4-10
Êlan kliăng: “Ƀiădah hlei kâo jing, leh anăn hlei phung ƀuôn sang kâo jing tơl hmei dưi myơr hŏng ai tiê čiăng msĕ snei? Kyuadah jih jang mnơ̆ng kbiă hriê mơ̆ng ih, leh anăn hmei myơr kơ ih dŏ ih pô” (I Klei Yăl Dliê 29:14)
Klei êmuh ksiêm mĭn: Ya klei Mtao Hêsêkia mtă brei phung ƀuôn sang ngă? Si ngă phung ƀuôn sang lŏ wĭt ngă hŏng klei mtă anăn? Hŏng si ai tiê leh anăn knuih drei dôk myơr kơ Aê Diê?
Leh lŏ bi mbha phung mă bruă hlăm Sang kkuh mpŭ, Mtao Hêsêkia lŏ ngă klei myơr čiăng mâo djăp mnơ̆ng yua hlăm Sang kkuh mpŭ. Tơdah ñu mtă kơ phung ƀuôn sang dôk ti ƀuôn Yêrusalem myơr kdrêč djŏ kơ phung khua ngă yang leh anăn phung Lêwi jing phung jao kluôm digơ̆ pô kơ bruă Aê Diê, snăn mâo dua phung ngă djŏ tui si klei mtă anăn. Phung tal sa jing “phung ƀuôn sang Israel”, hlăm anăn mâo phung mơ̆ng čar dưr, ba myơr hŏng klei êbeh dlai boh hlâo hlang, leh anăn dŏ sa kdrêč hlăm pluh mơ̆ng djăp mta mnơ̆ng. Phung tal dua jing “phung Israel leh anăn Yuđa dôk hlăm ƀuôn čar Yuđa”, diñu myơr dŏ sa kdrêč hlăm pluh jing hlô mnơ̆ng rông leh anăn mnơ̆ng myơr doh jăk pioh leh kơ Yêhôwa (Klei Yap 18:19).Tơdah čih yăl dliê kơ klei phung Israel leh anăn phung Yuđa myơr, hdruôm hră Klei Yăl Dliê čiăng kñăm kơ klei jih jang phung ƀuôn sang Aê Diê bi mguôp jing sa. Digơ̆ bi mguôp leh mbĭt hlăm klei hdơr mpŭ kơ Knăm Klei Găn, ară anei digơ̆ lŏ sa ai myơr mnơ̆ng đru phung mă bruă hlăm Sang kkuh mpŭ. Amâo djŏ digơ̆ myơr knŏng gưt tui si klei Aê Diê mtă ôh (Bruă Lêwi 27:30-32) ƀiădah wăt myơr hŏng klei hdơr knga bi mni kơ Aê Diê jing akŏ kơ jih jang klei jăk jĭn mơh.
Phung ƀuôn sang ba mkăm mnơ̆ng myơr mơ̆ng mlan tal tlâo bi ruê̆ ti mlan tal kjuh, jing dua yan puôt wiă ruê̆ Knăm Klei Găn. Mnơ̆ng myơr lu êbeh dlai tơl arăng mkăm jing lu kăm prŏng. Ƀuh klei anăn Mtao leh anăn phung khua bi mni kơ Aê Diê leh anăn hơêč hmưi kơ phung ƀuôn sang. Diñu bi mni kơ Aê Diê kyuadah diñu thâo kyua klei Aê Diê brei yơh phung ƀuôn sang dưi mâo mnơ̆ng myơr hŏng klei êbeh dlai msĕ snăn (I Klei Yăl Dliê 29:14). Diñu hơêč hmưi kơ phung ƀuôn sang čiăng akâo kơ Aê Diê lŏ brei lu klei jăk jĭn kơ phung ƀuôn sang Ñu. Y-Asaria, khua ngă yang prŏng lŏ wĭt lač kơ mtao, mơ̆ng hruê phung ƀuôn sang dơ̆ng ba mnơ̆ng myơr hlăm Sang kkuh mpŭ, phung khua ngă yang leh anăn phung Lêwi mâo djăp mnơ̆ng ƀơ̆ng huă leh anăn mâo lu dŏ êbeh, leh anăn diñu thâo Aê Diê hơêč hmưi leh kơ phung ƀuôn sang Ñu kyuanăn yơh digơ̆ dưi myơr lu êbeh msĕ snăn.
Hlăm ênuk Mtao Hêsêkia, hŏng klei hdơr knga phung ƀuôn sang myơr leh êbeh dlai kơ bruă Aê Diê. Sui thŭn digơ̆ kkuh mpŭ kơ rup yang, ară anei digơ̆ lŏ wĭt kơ Aê Diê, Aê Diê pap brei leh anăn dôk mbĭt hŏng digơ̆. Digơ̆ hơ̆k mơak snăk leh anăn myơr hŏng klei kmah čiăng bi mni kơ Aê Diê. Hruê anei, drei msĕ mơh bi mni kơ Aê Diê kyuadah Ñu bi mtlaih leh anăn pap brei leh klei soh drei, leh anăn djăp mta mnơ̆ng drei mâo jing dŏ Ñu brei sơăi. Brei grăp čô drei tui knuih phung ƀuôn sang Aê Diê hlăm ênuk Mtao Hêsêkia, hŏng jih ai tiê myơr êbeh dlai čiăng bi mni kơ Aê Diê kyua djăp mta mnơ̆ng drei mâo msĕ si klei suaih pral, prăk mah…jing dŏ Aê Diê brei sơăi.
Si ngă drei sĭt suôr myơr hŏng klei kmah kyua hdơr knga bi mni kơ Aê Diê mơ̆?
Wah lač: Ơ Khua Yang, bi mni kơ Ih kyuadah Ih khăp êdimima kơ kâo, bi mtlaih kâo leh anăn brei kơ kâo djăp mta mnơ̆ng. Đru kâo mâo ai tiê kmah leh anăn sĭt suôr myơr kơ bruă Ih hŏng klei hơ̆k mơak leh anăn hdơr knga bi mni kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 44
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
