Henplais 2:5-9
Nqe cim:
“Nimno peb pom Yexus muaj lub tshwjchim ci ntsa iab thiab Nws tau ntsejmuag, rau qhov Nws raug kev tuag txomnyem ntsuav” (Henplais 2:9c).
Lus nug rau sawvdaws xav: Tibneeg muaj meejmom zoo li cas nyob hauv Vajtswv lub homphiaj tsim txhua yam? Qhov uas Tswv Yexus raug tuag muaj qabhau dabtsi rau peb?
Cov neeg Yudais yog cov uas ibtxwm paub Vajtswv Txojlus Phau Qub, yog li thaum sau tsab ntawv no rau lawv, tus uas sau tsab ntawv Henplais thiaj muab Vajtswv Txojlus Phau Qub los hais lub ntsiab uas nws sau. Txij nqe 6-8a hauv ntu Vajluskub no yog rho hauv Phau Ntawv Nkauj 8:4-6 los, Vajntxwv Daviv hais txog tibneeg lub meejmom uas Vajtswv tsim. Vajtswv tsim tibneeg “los ua tus yau ntawm” Nws, thiab pub tibneeg “muaj hwjchim thiab meejmom”, tsa tibneeg los kav txhua yam thiab txhua yam mloog neeg hais. Txawm yog tau Vajtswv pub hwjchim kav txhua yam Nws tsim los tus uas sau tsab ntawv Henplais pom hais tias, “nimno peb tseem tsis tau pom neeg kav ib puas tsav yam” (nqe 8c), hauv phau txhais tshiab Hmowsv hais tias, “qhov tseeb lub sijhawm no peb tsis tau pom tias txhua yam nyob hauv nws qab kev tswjhwm”. Vim li cas zoo li ntawd?
Kev txhaum ua puas Vajtswv lub homphiaj zoo uas tsim ib puas tsav yam, raws li Timthawj Paulus hais, “Twb yog vim ib tug xub ua txhaum, neeg ntiajteb txhua tus thiaj ua txhaum. Vim tus ntawd ua txhaum, tus ntawd thiaj tuag. Yog li ntawd, txhua haivneeg uas nyob hauv ntiajteb no thiaj txawj tuag, rau qhov txhua tus puavleej tau ua txhaum lawm” (Loos 5:12). Kev tuag yog nqi zog txaus ntshai ntawm txojkev txhaum thiab qhov ntawd yog yam uas txhua tus tibneeg yuav ntsib ib zaug, tsis muaj leejtwg khiav dhau. Qhov uas txaus ntshai dua, tuag lawm los tseem yuav raug Vajtswv txiav txim thiab ris lub txim ntawd mus ibtxhis tsis paub kawg.
Txojkev tuag yog ib qhov uas tibneeg ntiajteb ntshai kawg nkaus, tiamsis Tswv Yexus txojkev tuag yog ib qhov uas zoo heev, “Vajtswv tus uas hlub sawvdaws Nws yuav txib Yexus los tuag theej sawvdaws lub txhoj” (nqe 9b). Txojkev tuag ua rau Yexus Khetos tau ntsejmuag vim Nws tuag “theej sawvdaws lub txhoj”, qhov uas Nws tuag qhia tshwm “Vajtswv hlub sawvdaws” (câu 9b). Tswv Yexus “raug” tua tuag, txhais tau hais tias tibneeg ntiajteb qhov kev txhawj ntshai tus Tswv tuag txhiv lawm. Nws sawv hauv qhov tuag rov los ua timkhawv hais tias Nws muaj hwjchim kovyeej txojkev tuag thiab nimno Nws “yog tus uas kav txojkev tuag thiab tubtuag teb” (Tshwmsim 1:18).
Los ua tibneeg nyob, cov uas tsis ntshai tuag muaj tsawg tus. Txawm li ntawd los, cov ntseeg Yexus tsis ntshai tuag lawm, vim lawv twb “nrog Yexus tuag” thiab” nrog Yexus sawv rov los” thaum lawv txais yuav Yexus. Thaum ntawd, peb yuav hais tau khov kho hais tias: “Txojkev tuag, koj swb lawm lauj! Txojkev tuag, koj tej taug tsuag tas lawm lauj!..Tiamsis peb cia li ua Vajtswv tsaug, rau qhov Vajtswv twb kom Yexus Khetos tus uas yog peb tus Tswv pab peb kovyeej lawm” (I. Kauleethaus 15:55,57).
Thov Vajtswv,
Tswv Yexus, nyuam yaus ua Koj tsaug vim Koj tau los hauv ntiajteb tuag txhiv nyuam yaus saum tus ntoo khaublig. Thov Vaj Ntsujplig lub hwjchim pab kom nyuam yaus ua tau lub neej tsimnyog lub meejmom tau ua Vajtswv menyuam thiab ua rau Koj tau ntsejmuag. Amees.
Peb puas tau ua lub neej muaj yeej txhua hnub raws li qhov uas tus Tswv twb tuag txhiv peb?
Nyeem Vajluskub hauv peb lub xyoos: Yaxayas 6:1-7:9
Kênh Youtube BHKTHN:
