Klei Aê Diê Blŭ: Hêbrơ 2:5-9
Êlan kliăng: “Čiăng kơ hŏng klei Aê Diê pap Ñu dưi tŭ klei djiê hrô kơ jih jang mnuih” (Hêbrơ 2:9c).
Klei êmuh ksiêm mĭn: Si anôk bruă anak mnuih jing hlăm hdră klei Aê Diê hrih mjing? Ya klei yuôm kơ drei hlăm klei Kyua Yang Yêsu djiêl klei djiê?
Phung Israel mâo klei thâo săng êlam Klei Bi Mguôp Hđăp, snăn tơdah čih hră kơ diñu, pô čih hră Hêbrơ khăng hrêč mă mơ̆ng Klei Bi Mguôp Hđăp hlăm klei bi kjăp hdră mĭn ñu hưn mdah. Dŭm êlan 6-8a kdrêč Klei Aê Diê Blŭ anei mă mơ̆ng Klei Mmuñ Hđăp 8:4-6, hlăk mtao Y- Đawit lač kơ anôk bruă yuôm bhăn mnuih hlăm hdră Aê Diê hrih mjing jih jang mnơ̆ng. Aê Diê hrih mjing anak mnuih “knŏng ƀiă ti gŭ hĭn kơ Aê Diê”, mâo “klei guh kơang leh anăn klei mpŭ”, brei klei dưi kiă kriê jih jang mnơ̆ng leh anăn jih jang mnơ̆ng đup gưt kơ mnuih. Ƀiădah mơ̆ng klei jăk jĭn anei, pô čih hră Hêbrơ ƀuh sa boh klei sĭt, ƀiădah “ară anei drei amâo ƀuh ôh mnuih kiă kriê jih jang mnơ̆ng” (êlan 8c), amâodah hlăm hră mblang mrâo“ară anei drei ka ƀuh ôh jih jang mnơ̆ng đup gưt kơ anak mnuih.” Si ngă msĕ snăn?
Klei soh mŭt hlăm hdră Aê Diê hrih mjing jih jang mnơ̆ng jăk siam leh msĕ si khua ƀĭng kna Y-Pôl mblang, “Kyuadah msĕ si klei soh mŭt leh hlăm lăn ala kyua sa čô mnuih, leh anăn klei djiê truh kyua klei soh, snăn mơh klei djiê truh leh kơ jih jang mnuih, kyuadah jih jang mnuih ngă soh leh” (Rôm 5:12). Klei djiê jing boh klei huĭ mduĭ mơ̆ng klei soh leh anăn jing klei jih jang mnuih tlă anăp sơăi, amâo mâo êlan dưi tlaih ôh. Klei năng huĭ hĭn jing klei djiê pŏk ƀăng bhă atăt mnuih nao kơ klei Aê Diê phat kđi leh anăn dôk ti anăp klei bi kmhal huĭ hyưt jih ênuk hlŏng lar.
Êjai klei djiê jing klei huĭ hyưt kơ phung mnuih, snăn klei Khua Yang Yêsu djiê jing klei yuôm bhăn êdimima, “Pô Aê Diê mđua leh đuôn mtao klei guh kơang leh anăn klei mpŭ kyua klei djiê Ñu tŭ leh,” (êlan 9b). Klei djiê ba klei guh kơang kơ Yang Krist kyuadah jing klei djiê hrô “kơ jih jang mnuih”, klei djiê bi êdah “klei Aê Diê pap” (êlan 9c). Khua Yang Yêsu “djiêl” leh klei djiê, jing klei bi knal kluôm dhuôm, sĭt klă kơ klei jih jang mnuih huĭ hyưt čiăng kơ hŏng klei anăn dưi bi leh bruă klei bi mtlaih. Dơ̆ng mơ̆ng msat, Khua Yang Yêsu kbiă lŏ hdĭp čiăng hưn bi sĭt klei myang Ñu dưi hĭn hŏng klei djiê leh anăn ară anei Ñu dôk “djă kliăng klei djiê leh anăn ƀuôn phung djiê” (Klei Bi Êdah 1:18).
Sĭt jing anak mnuih, ƀiă snăk pô amâo huĭ kơ klei djiê. Ƀiădah, klei djiê amâo lŏ jing klei huĭ hyưt ôh hŏng phung đăo jing phung “djiê mbĭt” leh leh anăn “kbiă lŏ hdĭp leh mbĭt hŏng Khua Yang Yêsu” mơ̆ng hlăk đăo kơ Ñu. Hlăk anăn, drei hŏng klei jhŏng hưn kraih snei: “Ơ klei djiê, ti klei ŏng dưi? Ơ klei djiê ti ênuč ŏng? … Ƀiădah bi mni kơ Aê Diê, Pô brei kơ drei klei dưi hlăm Khua Yang drei Yêsu Krist” (I Kôrantô 15:55, 57).
Si ngă grăp hruê drei dôk hdĭp dưi hĭn hŏng klei soh hŏng Pô djiêl leh klei djiê kyua drei mơ̆?
Wah lač: Ơ Khua Yang, bi mni kơ Khua Yang Yêsu hriê leh ti lăn ala leh anăn tŭ klei djiê ti kyâo bi kal čiăng bi mtlaih kâo mơ̆ng klei soh leh anăn klei djiê. Akâo klei myang Yang Mngăt Jăk đru kâo dôk hdĭp năng hŏng anôk bruă yuôm bhăn jing anak Aê Diê, hlăm jih jang klei myơr klei guh kơang kơ Ih nanao.
Dlăng Klei Aê Diê Blŭ hlăm tlâo thŭn: Y‑Êsai 6:1 – 7:9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
