Yauhas 15:18-21
Nqe cim:
“Yog leejtwg thuam nej vim nej yog cov uas ntseeg Yexus Khetos, nej cia li zoo siab; qhov uas lawv thuam nej ntawd qhia rau sawvdaws paub hais tias Vajtswv twb txib Vaj Ntsujplig los nrog nej nyob lawm, Vajtswv tus Ntsujplig ntawd yog tus uas muaj tshwjchim ci ntsa iab.” (I Petus 4:14)
Lus nug rau sawvdaws xav:
– Tswv Yexus qhia txog qhov kev nyuaj siab twg rau cov thwjtim?
– Cov ntseeg Yexus tsimnyog muaj tus cwjpwm li cas thaum raug neeg ntiajteb ntxub? Vim li cas?
– Peb ua li cas thaum raug neeg ntiajteb ntxub?
Hauv cov lus qhia thwjtim, Tswv Yexus hais txog ib qho kev nyuaj siab thaum nrog tus Tswv mus, qhov ntawd yog yuav raug “neeg ntiajteb ntxub” (nqe 18). “Ntiajteb” yog hais txog lub hwjchim tsaus ntuj uas cov neeg tsis tau yug dua tshiab. Qhov no tsis muaj dabtsi txawv, ntiajteb twb ntxub tus Tswv ces lawv yeej yuav ntxub cov neeg uas nrog tus Tswv mus thiab. Ntiajteb tsuas hlub cov uas “yog lawv pab”. Tus uas ntseeg Vajtswv, txiav txim siab tso lub neej qub tseg los ua lub neej phim Vajtswv, tus neeg ntawd yuav ua lub neej txawv li tej neeg ntiajteb ua. Yog li, ntiajteb yuav tsis nyiam peb.
Tswv Yexus qhia rau cov thwjtim paub hais tias Nws twb xaiv lawv tawm hauv lub ntiajteb thiab Nws hais tias: “Tus tub qhe yeej tsis muaj hwjchim loj dua nws tus tswv” txhawb lawv lub zog kom tsis txhob qaug zog thaum raug tej kev tsimtxom, rau qhov tus Tswv twb raug tsimtxom lawm. Hauv Yauhas 16:33 tus Tswv hais tias, “Neeg ntiajteb yuav tsimtxom nej. Tiamsis nej yuav tsum ua siab tawv, rau qhov kuv twb kovyeej lub ntiajteb no lawm.” Nrog cov lus hais no, tus Tswv xav kom Nws cov menyuam yuav tsum ruaj siab thaum ntsib kev txomnyem, vim Nws twb niaj hnub nrog lawv nyob thiab pab lawv tiv dhau tej ntawd.
Cov ntseeg Yexus xubthawj raug ntxub vim lawv raug nkaug ntau yam tsis zoo xws li: ntxeev siab, tsim kev kub ntxhov rau sawvdaws… Lawv tsis yog raug ntxub xwb tiamsis tseem raug tsimtxom hnyav heev. Nimno, cov ntseeg Yexus tus yeebncuab yeej tseem muaj thiab ntse dua lawm, nws nkag mus rau hauv tej tsev kawm ntawv, tej chaw ua haujlwm ua kom neeg sib tawmtsam. Peb twb zeem tsis tau tias xyov thaum twg txojkev tawmtsam thiab ua li ntiajteb ua twb coj tau peb lawm. Qhov uas tso txojkev ntseeg tseg tabtom muaj nyob hauv lub ntiajteb, ua rau peb ntshai qhia tawm yus txojkev ntseeg. Muaj ntau leej yeem nyob twjywm tsis kam qhia tawm kev ntseeg, tsis kav qhia tias yus yog tus ntseeg Yexus, rau qhov ntshai tsam raug ntxub. Nov yog yam uas txaus ntshai heev!
Cov ntseeg Yexus tau muab piv zoo li tus ntses luam dej nce toj. Ua neej raws li tus Tswv nyiam yog peb tabtom ua txawv tibneeg ntiajteb. Thaum peb tuav kev ntseeg ruaj thiab txaus siab hlo tiv tej kev txomnyem ces peb tau txais tej lus cog tseg. “Thaum luag thuam nej thiab tsimtxom nej, vim nej yog Kuv cov thwjtim, nej tau koob hmoov. Nej cia li zoo siab rau qhov Vajtswv twb npaj nqi zog ntau kawg li cia rau saum ntuj ceebtsheej rau nej lawm.” (Mathais 5:11-12). Cia li muaj tus cwjpwm tus thiab ntseeg thaum raug txomnyem vim tus Tswv lub npe, peb yeej yuav tau txais tej koob hmoov Nws pub.
Thov Vajtswv,
Vajtswv, thov Koj pub kom nyuam yaus muaj lub siab tawv qhawv tiv taus tej kev ntxub, tawmtsam ntawm lub ntiajteb. Thov Koj qhia kom nyuam yaus paub tias Koj nrog nraim nyuam yaus hauv tej kev nyuaj thiab tej koob hmoov. Nyuam yaus tuav Tswv Yexus lub npe thov, Amees.
Puas muaj ib zaug twg peb tau txais tus Tswv tej lus cog tseg foom koob hmoov rau tus uas raug ntiajteb ntxub lawm tau?
Nyeem Vajluskub hauv peb lub xyoo: Yauhas 3
Kênh Youtube BHKTHN:
