Klei Aê Diê Blŭ: Y‑Yôhan 15:18-21
Êlan kliăng: “Tơdah arăng dlao wač kơ diih kyua anăn Krist, diih mâo klei jăk jĭn, kyuadah Mngăt Myang guh kơang, jing Mngăt Myang Aê Diê dôk ti diih.” (I Y‑Pêtrôs 4:14)
Klei êmuh ksiêm mĭn: Ya klei Khua Yang Yêsu mtô kơ boh klei sĭt ruă ênguôt hŏng phung ƀĭng kna Khua Yang? Si knhuah hdĭp brei phung đăo kơ Krist mâo tơdah phung lăn ala bi êmut? Ya ngă? Si drei wĭt ngă tơdah phung lăn ala bi êmut?
Hlăm klei blŭ mtô kơ phung ƀĭng kna, Khua Yang Yêsu mñă kơ sa boh klei ruă ênguôt tơdah tui hlue Khua Yang, anăn jing srăng tŭ klei “lăn ala bi êmut” (êlan 18). “Lăn ala” čiăng lač kơ klei myang mmăt tĭt wăt hlăm phung ka mâo klei kkiêng mrâo. Mta klei anei amâo jing klei bi kngăr ôh kyuadah lăn ala bi êmut leh kơ Khua Yang, snăn thơ̆ng yơh bi êmut wăt kơ phung tui hlue Ñu. Lăn ala knŏng khăp “kơ phung ñu pô”. Sa čô đăo kơ Khua Yang, ñu čuăn ai tiê lui jih knhuah hdĭp hđăp čiăng dôk hdĭp hlue si hnơ̆ng čuăn mơ̆ng Khua Yang, mnuih anăn srăng dôk hdĭp bi mklăk hŏng hnơ̆ng čuăn mơ̆ng lăn ala. Kyuanăn lăn ala srăng amâo khăp kơ drei ôh.
Khua Yang Yêsu brei phung ƀĭng kna thâo, Ñu Pô yơh ruah leh digơ̆ mơ̆ng krah lăn ala, leh anăn kñăm: “Sa čô dĭng buăl amâo jing prŏng hĭn kơ Khua ñu ôh” čiăng bi mđĭ ai digơ̆ đăm êdu ai ôh tơdah arăng ngă jhat, kyuadah Ñu Pô ăt tŭ klei arăng ngă jhat mơh. Ƀiădah lĕ, hlăm Y‑Yôhan 16:33 Khua Yang lač, “Hlăm lăn ala diih srăng mâo klei knap mñai; ƀiădah dôk kjăp bĕ, Kâo dưi leh hŏng lăn ala.!” Hŏng klei lač klă anei, Khua Yang čiăng kơ phung anak ƀuôn sang Ñu dôk kjăp ai tiê ti anăp klei truh kyuadah Ñu ăt dôk mbĭt nanao leh anăn đru drei dưi găn gao.
Phung đăo kơ Krist hlăm gưl ênuk tal êlâo arăng bi êmut kyua klei arăng mčeh luar jhat, msĕ si: bi kdơ̆ng, ngă klei mtŭk mtŭl hlăm klei bi mguôp… amâo djŏ knŏng arăng bi êmut ƀiădah wăt tŭ klei arăng ngă jhat ktang snăk. Hruê anei, klei roh hŏng phung đăo kơ Krist amâo hrŏ hĭn ôh ƀiădah mnêč hgăm kjham hĭn êjai, kma mŭt hlăm sang hră mơar, hlăm anôk mă bruă knuă, dlăng msĕ si hdjul êdu ƀiădah boh tŭ jhat lu hĭn. Drei tơl amâo thâo kral ôh klei bi kdơ̆ng leh anăn hbĭl ư ai mbĭt hŏng phung lăn ala kăn yŏng thâo. Klei hngah kơ klei đăo truh hlăm ƀuôn sang, ngă kơ drei amâo jhŏng hưn bi êdah klei đăo drei pô. Lu mnuih mĭn jăk hĭn kui kŏ hdĭp hŏng klei đăo pô kriêp ñăt, amâo jhŏng bi êdah drei jing pô đăo kơ Krist ôh kyua huĭ arăng bi êmut. Anei jing klei huĭ hyưt êdimi !
Phung đăo kơ Krist msĕ hŏng kan êlue mklăk hŏng hnoh êa đoh. Dôk hdĭp hlue si hnơ̆ng čuăn mơ̆ng Khua Yang jing phung đăo dôk êbat mklăk hŏng hnoh đoh hlăm ƀuôn sang yơh. Ƀiădah tơdah drei djă pioh kjăp klei đăo drei, leh anăn hmiêt mkăp tlă anăp hŏng klei dleh knap truh snăn mâo nanao klei ƀuăn pioh kơ drei. “Jăk mơak yơh diih tơdah arăng dlao wač, ngă jhat, leh anăn mčeh lu mta klei jhat kyua Kâo. 12Hơ̆k mơak bĕ, kyuadah klei mưn diih jing prŏng hlăm adiê, …” (Y‑Mathiơ 5:11-12). Djă pioh bĕ knhuah hdĭp êđăp ênang leh anăn đăo knang êjai găn klei dleh knap kyua Anăn Khua Yang, sĭt nik drei srăng bi knal klei jăk jĭn hlăm Ñu.
Drei tuôm bi knal mơ̆ klei jăk jĭn Khua Yang ƀuăn brei kơ drei, hlăk tŭ klei phung lăn ala bi êmut?
Wah lač: Ơ Khua Yang, akâo Ih brei kơ kâo ai tiê jhŏng tlă anăp hŏng klei lăn ala bi êmut leh anăn bi kdơ̆ng. brei kâo hdơr, Khua Yang dôk mbĭt nanao hŏng kâo hlăm klei dleh dlan leh anăn hơêč hmưi kơ kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôhan 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
