Klei Aê Diê Blŭ: Y-Mathiơ 16:5-12
Êlan kliăng: “Diih amâo thâo hĕ kpei ƀiă dưi bi buk jih klŏ kpŭng?”(I Kôrantô 5:6b)
Klei êmuh ksiêm mĭn: Khua Yang Yêsu yua rup “kpei” čiăng mtô kơ phung ƀĭng kna ya klei? Ya ngă Khua Yang mtô diñu “Răng bĕ kơ kpei ”? Klei Khua Yang mtô mñă kơ drei ya klei hlăm klei hdĭp tui hlue Khua Yang?
Leh Khua Yang Yêsu hngah amâo ngă ôh klei myang hlue si phung čiăng lông dlăng Ñu akâo, Khua Yang leh anăn phung ƀĭng kna đĭ mran nao ti hang dih, tơdah truh ti anôk anăn phung ƀĭng kna ƀuh diñu wơr ba kpŭng. Ƀri mmông găl anei, Khua Yang Yêsu yua rup “kpei” čiăng hưn êlâo brei phung ƀĭng kna răng kơ “kpei” phung Pharisi leh anăn phung Sadusi. Hlăm Klei Bi Mguôp Hđăp, êngao kơ Y-Mathiơ 13:33 leh anăn Y-Luk 13:21,“kpei” khăng čiăng lač kơ klei hmăi amâo jăk. Khua Yang Yêsu ƀuah kơ klei phung Pharisi mgưt leh anăn klei hdĭp hlue lăn ala mơ̆ng phung Sadusi, ƀiădah phung ƀĭng kna kƀah klei pral thâo săng hlăm mngăt, diñu mĭndah Khua Yang ƀuah kyua diñu wơr amâo ba kpŭng. Khua Yang Yêsu mñă kơ phung ƀĭng kna diñu ƀuh leh dua blư̆ klei myang mblư̆ kpŭng, năng djŏ brei diñu thâo klei myang Khua Yang Yêsu, ƀiădah lĕ, diñu wơr bĭt hĕ Pô mblư̆ leh kpŭng kơ dŭm êbâo čô ƀơ̆ng yơh dôk mbĭt hŏng pô. Knhal tuč, Khua Yang mblang kơ phung ƀĭng kna thâo săng klei Ñu čiăng jing brei diñu ñĕ đuĕ hĕ, đăm brei ai tiê hdĭp hlue si lăn ala hmăi djŏ leh anăn ăt kăn hdĭp mgưt msĕ si phung Pharisi leh anăn phung Sadusi rei.
Êdei anei tơdah čih hră kơ dŭm Phung Sang Aê Diê, Khua ƀĭng kna Y-Pôl ăt hưn êlâo brei răng, brei răng đăm brei klei hmăi amâo jăk mơ̆ng lăn ala hmăi hlăm klei hdĭp tui hlue Khua Yang ôh. “Kpei ƀiă dưi bi buk jih kpŭng” (Galati 5:9; I Kôrantô 5:6), tơdah drei rông pioh klei soh wê, klei soh drei yap jing điêt dưn, snăn ăt srăng hmăi jhat hlăm klei hdĭp drei amâo srăng jing điêt ôh, dŭm klei anăn srăng ƀrư̆ ƀrư̆ plah mă kluôm jih klei hdĭp drei amâo mdê ôh hŏng kpei bi buk kpŭng. Kyua anăn, Khua Yang Yêsu mtô phung ƀĭng kna “Răng bĕ kơ kpei…”.
Phung đăo brei răng đăm brei hmăi ôh kyua ai tiê hlue si lăn ala msĕ si phung Sadusi, jing drei hdĭp msĕ si phung ti lăn ala, knŏng mdê kơ klei knang leh anăn klei đăo đuč, knuih hdĭp anei ngă kơ drei srăng ñŭ kma leh anăn hlai mbĭt hŏng lăn ala. Êngao anăn, brei drei ăt răng đăm hmăi ôh kơ kpei phung Phasiri jing ai tiê mgưt. Ti êngao huĭ mpŭ, doh jăk ƀiădah hlăm lam bŏ hŏng klei ksiêm yap soh jhat, “… jing msĕ si msat arăng mia čŭr kô̆, ti êngao dlăng msĕ si siam, ƀiădah hlăm lam bŏ hŏng klang mnuih djiê leh anăn djăp mta mnơ̆ng čhŏ” (Y-Mathiơ 23:27). Huĭ hyưt hĭn mơ̆ng mta “kpei” anei jing dưi bi hgăm ală mta anak mnuih kyua arăng ăt mĭndah anăn jing sa čô khăp kơ Khua Yang leh anăn sĭt suôr, ƀiădah brei răng kyuadah “Leh anăn ti anăp Ñu amâo mâo sa mnơ̆ng hrih leh dưi dôk hgăm, ƀiădah jih jang mnơ̆ng pŏk leh anăn bi êdah leh ti anăp ală Pô drei srăng hưn bruă drei ngă” (Hêbrơ 4:13).
Mâo Ya “kpei” dôk hmăi hlăm klei hdĭp drei mơ̆?
Wah lač: Ơ Khua Yang, akâo kơ Ih đru kâo thâo kral, kâo hmăi kyua ai tiê hlue si lăn ala amâodah dôk hdĭp mgưt ti anăp Ih leh anăn ti anăp ayŏng adei mơ̆. Akâo kơ Khua Yang bi mlih kâo čiăng kơ kâo hdĭp sĭt suôr leh anăn kpă ênô hŏng Khua Yang leh anăn pô mkăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mathiơ 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
