Klei Aê Diê Blŭ: Klei Mtô Mñă Klei Bhiăn 23:9-14
Êlan kliăng: “Kyuadah Yêhôwa Aê Diê diih êbat ti krah wăl diih, čiăng bi mtlaih diih leh anăn čiăng jao phung roh diih ti anăp diih, kyuanăn brei wăl diih jing doh jăk, čiăng kơ Ñu amâo ƀuh ôh sa mnơ̆ng čhŏ ti krah diih, leh anăn đuĕ hĕ mơ̆ng diih” (Klei Mtô Mñă Klei Bhiăn 23:14)
Klei êmuh ksiêm mĭn: Ya klei bhiăn Aê Diê bi hriăm phung ƀuôn sang Ñu tơdah dôk jưh bi blah hŏng phung roh? Ya jing klei kñăm čiăng mơ̆ng klei bhiăn anei? Ih mâo klei hriăm leh anăn thâo si Pô Aê Diê jing? Ya ih srăng ngă čiăng kơ klei hdĭp kđeh leh anăn klei hdĭp myang ih mâo klei doh jăk nanao?
Trăn Klei Aê Diê Blŭ anei čih kơ klei bhiăn yua knŏng kơ anôk kahan jưh êjai dôk kbưi mơ̆ng ƀuôn sang. Phung Israel wăt êjai dôk ti sang amâodah nao bi blah ăt răng kriê sơăi diñu pô mơ̆ng djăp mta klei jhat. Hlăm ênuk bi blah ngă, digơ̆ srăng djă pioh kjăp klei bhiăn kơ klei bi doh anôk dôk, klei anei bi hmô kơ klei doh jăk, kyuadah Aê Diê jing Pô doh jăk dôk ti krah phung kahan čiăng đru phung ƀuôn sang Ñu dưi hŏng phung roh digơ̆.
Sĭt nik hlăm ênuk anăn amâo mâo ôh sa găp djuê amâodah sa phung kahan yang diñu amâodah khua gĭt gai phung kahan diñu mtrŭn kơ klei doh jăk leh anăn ngă klei doh êƀăt hlăm anôk dôk ktang tĭt msĕ si phung ƀuôn sang Israel lač mdê leh anăn phung kahan Israel lač mbĭt čêč kdrêč msĕ snăn. Tơdah bi mĭn kơ anôk phung kahan jưh ênuk bi blah ngă, drei khăng bi mĭn ƀuh kơ anôk anăn mtŭk mtŭl, čhŏ mrŏ, klei ruă ênưih tưp snăk. Ƀiădah anôk phung kahan Aê Diê jưh amâo djŏ msĕ snăn ôh kyuadah klei bhiăn Aê Diê mtrŭn tliêr kjăp kơ jih jang phung kahan. Jih jang klei bhiăn anei amâo djŏ knŏng bi êdah kơ Aê Diê jing Pô doh jăk ôh ƀiădah wăt Aê Diê čiăng bi hriăm mơh phung kahan Ñu mâo knhuah dôk dơ̆ng ƀơ̆ng huă doh jăk, mdê hŏng phung kahan phung găp djuê tue. Êngao kơ anăn, drei ăt ƀuh mơh klei Aê Diê uêñ mĭn leh anăn răng mgang klei suaih pral kơ grăp čô kahan čiăng đăm mâo klei ruă tưp leh anăn čiăng kơ digơ̆ mâo ai bi blah.
Hruê anei, phung đăo kơ Krist amâo lŏ mâo klei mgô̆ brei ngă tui si klei bhiăn anei kyua anôk dôk hdĭp ôh, kyuadah klei hdĭp drei ênuk anei amâo msĕ ôh hŏng ênuk Klei Bi Mguôp Hđăp. Ƀiădah sĭt nik, Aê Diê čiăng kơ phung ƀuôn sang Ñu jing doh jăk amâo djŏ knŏng hlăm klei hdĭp myang ôh, ƀiădah doh jăk wăt hlăm klei dôk dơ̆ng ƀơ̆ng huă grăp hruê mơh. Kyuanăn amâo răk ya ênuk ôh, klei mprăp klei thâo săng kơ bruă răng kriê klei doh êƀăt leh anăn răng mgang klei ruă kơ asei mlei pô leh anăn kơ phung ƀuôn sang pô jing klei yuôm bhăn snăk. Tui si hnơ̆ng dưi, phung đăo đru kjư hlăm bruă răng mgang klei suaih pral, đru bi mđĭ klei hdĭp phung mnuih ƀuôn sang ăt dôk hlăm klei knap mñai. Dưi ngă klei anăn êngao kơ klei bi đru čiăng mâo klei hdĭp jăk hĭn, anăn ăt jing êlan drei bi đru hdơ̆ng drei čiăng kơ ƀuôn drei mâo klei doh leh anăn bi guh kơang kơ Anăn Khua Yang hlăm klei hdĭp drei mơh.
Drei uêñ mĭn đru bi mđĭ knhuah dôk dơ̆ng ƀơ̆ng huă doh jăk hlăm klei hdĭp myang wăt hlăm klei hdĭp kđeh mơ̆?
Wah lač: Ơ Aê Diê, Ih jing Pô doh jăk leh anăn Ih čiăng kâo jing doh jăk msĕ si Ih mơh. Grăp hruê đru kâo amâo djŏ jing doh jăk knŏng hlăm klei hdĭp myang ôh, ƀiădah thâo kiă kriê răng mgang wăt kơ asei mlei kâo jing doh jăk msĕ mơh.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 4:32-5:16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
