Klei Aê Diê Blŭ: Klei Bi Hriêng 11:9-13.
Êlan kliăng:
“Đăm brei klei blŭ jhat kbiă mơ̆ng ƀăng êgei diih ôh, ƀiădah knŏng blŭ klei jăk dưi đru brei arăng hriê kơ prŏng, tui si mông găl, čiăng dưi bi mbha klei pap kơ phung dôk hmư̆” (Êphêsô 4:29).
Klei êmuh ksiêm mĭn: Si ngă mtao Y-Salômôn lŏ bi hriăm anak kơ klei tŭ boh blŭ mơ̆ng mnuih kpă ênô leh anăn phung ƀai? Hlăm hră Êphêsô 4:25-30 si ngă ƀĭng kna Y-Pôl bi hriăm kơ hnơ̆ng yuôm bhăn mơ̆ng klei blŭ? Ya klei brei drei mđing kơ klei blŭ čiăng ba klei tŭ kơ mnuih hmư̆ leh anăn bi guh kơang Anăn Khua Yang?
Mtao Y-Salômôn lač kơ klei tŭ boh blŭ mơ̆ng phung kpă ênô leh anăn phung ƀai čiăng lŏ bi hriăm anak bi êdah klei hdĭp kpă ênô hlăm klei blŭ. Ñu bi hriăm mnuih kpă ênô brei blŭ klei bi êdah klei knhâo čiăng hlăm klei blŭ dưi đru mtlaih mnuih dôk hmư̆ kbiă mơ̆ng klei jhat, mbĭt anăn brei blŭ klei jăk čiăng ba klei jăk mơak kơ êpul êya, leh anăn ăt răng mgang găp djuê digơ̆. Mklăk hŏng anăn, phung ƀai yua boh blŭ ngă jhat kơ phung riêng gah (êlan 9), mdlưh ƀuôn (êlan 11), leh anăn diñu ăt khăng blŭ klei jhat “Pô kreh yăl dliê bi êdah klei hgăm” ngă jhat kơ găp djuê, ƀĭng găp. Pruê̆ blŭ “mnuih mâo klei thâo săng dôk ñăt” hlăm êlan 12 lač kơ phung thâo mĭn thâo krơ̆ng klei blŭ pô, êlâo kơ blŭ bi mĭn bi nik (Klei Bi Hriêng 10:19). Khă gơ̆ dŭm klei blŭ mơ̆ng pô amâo soh amâo dah kñăm kơ klei jăk, ƀiădah tơdah amâo djŏ mmông, amâo găl, amâo djŏ hdră, djŏ anôk ăt srăng ngă jhat kơ phung dôk hmư̆. Mâo đa đa bruă hjăn găp djuê brei pioh hgăm snăn mpŭ, amâo dưi lač. Êngao anăn, khă gơ̆ blŭ hrăm hŏng phung mâo klei hriăm lu, bruă knuă amâo dah mda asei hĭn, ăt kăn yua klei anăn “amâo mđing” klei digơ̆ blŭ.
Hlăm hră khua ƀĭng kna Y-Pôl mơĭt kơ Sang Aê Diê Êphêsô, sĭt lač kơ klei hdĭp mrâo hlăm Yang Krist, ñu mñă kơ hnơ̆ng yuôm bhăn mơ̆ng klei blŭ. Ñu lač: “Kyuanăn brei grăp čô diih lui klei luar, blŭ klei sĭt hŏng phung riêng gah ñu, kyuadah drei jing jơ̆ng kngan hdơ̆ng drei” (Êphêsô 4:25). “Đăm brei klei blŭ jhat kbiă mơ̆ng ƀăng êgei diih ôh, ƀiădah knŏng blŭ klei jăk dưi đru brei arăng hriê kơ prŏng, tui si mông găl, čiăng dưi bi mbha klei pap kơ phung dôk hmư̆” (Êphêsô 4:29). Tơdah drei amâo thâo răng klei pô blŭ, blŭ luar, klei amâo jăk, amâo djŏ knŏng ngă jhat, bi ênguôt kơ găp djuê ôh, ƀiădah klei blŭ anăn ăt “bi ênguôt Yang Mngăt Jăk Aê Diê” (Êphêsô 4:30). Akâo kơ Khua Yang brei kơ grăp cô drei thâo răng klei pô blŭ, mâo Klei Aê Diê Blŭ mtrang mngač čiăng drei thâo hbĭl drei blŭ, thâo ya klei drei pioh hgăm, leh anăn tơdah blŭ brei blŭ klei kpă ênô ba klei tŭ kơ mnuih dôk hmư̆, kơ êpul lu leh anăn yuôm bhăn hĭn ăt bi guh kơang Anăn Khua Yang hlăm klei pô blŭ.
Ya klei drei akâo kơ Khua Yang đru pô bi mlih čiăng klei drei blŭ tŭ dưn kơ phung hmư̆?
Ơ Khua Yang, akâo kơ Ih pap brei kơ kâo mâo leh lu bliư̆ blŭ luar, klei blŭ ngă bi ênguôt pô mkăn. Akâo kơ Ih đru kâo djăl hmư̆, amâo ruăt blŭ, leh anăn lač dŭm klei blŭ ba klei tŭ kơ pô mkăn. Akâo kơ Ih đru klei kâo blŭ bi guh kơang kơ Anăn Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
