I Timautes 5:3-8
Nqe cim:
“Tiamsis tus pojntsuam uas muaj tub muaj ntxhais lossis muaj xeebntxwv, cov tub, cov ntxhais, thiab cov xeebntxwv yuav tsum yug nws, pauj nws txiaj ntsig thiaj haum Vajtswv siab” (I Timautes 5:4).
Lus nug rau sawvdaws xav:
– Peb paub licas txog cov neeg Yudais tej pojntsuam thaum ub lub neej?
– Timthawj Paulus qhia tus pojntsuam tej menyuam lossis tej xeebntxwv yuav tsum muaj feemxyuam licas?
– Tus uas tsis ua tiav feemxyuam pauj niamtxiv txiaj ntsig yog tus zoo licas?
– Peb ua qhia tshwm kev pauj niamtxiv txiag ntsig licas lawm?
“Pojntsuam” yog hais txog tus pojniam uas tus txiv tuag lawm. Cov pojniam neeg Yudais thaum ub raug saib ua cov uas poob qis tshajplaws, vim tsis muaj cai tuav tej qub txeeg qub teg lawv yuav tsum ua neej vamkhom tus txiv lossis cov txiv neej hauv lub cuabyig. Pojntsuam yog ib hom nyob hauv peb hom neeg uas Vajluskub sau tseg hais tias tsis muaj ncauj lus, lawv yog “cov neeg txomnyem, tej menyuam ntsuag, tej pojntsuam”. Tus Tswv yeej hlub thiab hmov tshua txog lawv.
Timthawj Paulus qhia hais tias cov pojntsuam uas tsis muaj leejtwg pab ces Pawg Ntseeg yuav tsum pab lawv (nqe 3). Yog tus pojntsuam twg muaj menyuam lossis xeebntxwv, ces lawv yuav tsum “yug nws, pauj nws txiaj ntsig thiaj haum Vajtswv siab” (nqe 4). Kev pauj niamtxiv txiaj ntsig, qhov xubthawj yog ua raws tus Tswv txoj kevcai (Khiavdim 20:12), qhov thib ob yog ua tiav tibneeg li feemxyuam vim txhua tus tibneeg tshwmsim los ua neej puavleej ris niamtxiv txiaj ntsig uas yog tu loj hlob thiab qhuab qhia tsheej neeg. Yog li ntawd, ua neej nco niamtxiv txiaj ntsig yog “pauj txiaj ntsig” rau lawv thiab qhov ntawd “haum Vajtswv siab”.
Hais txog cov neeg tsis nco niamtxiv txiaj ntsig hauv Pawg Ntseeg, Timthawj Paulus hais tias: “Yog leejtwg tsis pab nws kwv nws tij thiab nws tsev neeg, tus ntawd tsis txhob hais tias nws yog tus ntseeg Vajtswv. Yog nws tsis pab nws kwv nws tij ces nws tseem phem heev dua tus uas tsis ntseeg Vajtswv thiab” (nqe 8). Kev ntseeg tseeb yuav tsum ua qhia tshwm los ntawm tes haujlwm. Tus uas lees hais tias nws yog tus Tswv cov menyuam tiamsis tsis ua lub neej nco lwm tus txiaj ntsig, ces tus ntawd tsis muaj kev ntseeg, nws tseem phem heev dua tus tsis ntseeg lawm thiab. Vim nco niamtxiv txiaj ntsig yog txojcai uas tus Tswv muab tso rau hauv tibneeg nruab siab thiab kev txawj xav ua yam zoo. Txhua tus neeg txawm yuav paub thiab tsis paub Vajtswv los puavleej totaub hais tias nco niamtxiv txiajntsig yog yam yuav tsum ua, yog li ntawd leejtwg khav hais tias nws yog tus Tswv menyuam tiamsis tsis pauj niamtxiv txiajntsig ces yuav tsum raug txim hnyav dua cov neeg tsis tau ntseeg.
Peb siv ntau txoj haukev los qhia tshwm nplooj siab nco niamtxiv txiajntsig. Xubthawj yog hauv kev hais lus yuav tsum saib taus lwm tus, tshwjxeeb yog thaum pog yawg, niamtxiv laus lawm, lawv tswj tsis tau ncauj lus thiab tes haujlwm. Nyob ntawm peb lub peevxwm, peb yuav tsum tu, muab nyiaj txiag rau cov laus tau siv. Yog tibneeg uas qaug zog, ntau zaug peb kuj ua tej yam tsis zoo, ua rau pog yawg thiab niamtxiv nyuaj siab. Vim li ntawd, cia li muab cov txheeb ze uas yus hlub tso rau tus Tswv, thov Nws tsomkwm thiab pub rau pog yawg, niamtxiv muaj kev kaj siab, zoo siab.
Thov Vajtswv,
Tus Tswv, nyuam yaus ua Koj tsaug vim Koj pub nyuam yaus muaj niam muaj txiv. Nyuam yaus paub hais tias lawv tej txiajntsig uas yug, tu loj hlob loj kawg li. Thov Koj pub rau nyuam yaus niam thiab txiv muaj dag zog thiab kev zoo siab ua neej nrog tej xeebleej xeebntxwv, thiab pab nyuam yaus qhia tshwm kev nco lawv txiaj ntsig. Amees.
Ncaj rau hnub Nco Niamtxiv Txiajntsig, peb puas ua dabtsi qhia tshwm nplooj siab nco niamtxiv txiaj ntsig lawm tau?
HNUB NO YOG HNUB NCO NIAMTXIV TXIAJNTSIG, TAIJ THOV TUS TSWV PUB KOOB HMOOV, PUB DAG ZOG NTXIV RAU SAWVDAWS KOM MUAJ LUB NEEJ KAJ SIAB HAUV TUS TSWV, UA QAUV ZOO HAUV KEV NTSEEG RAU TEJ MENYUAM XYAUM.
Nyeem Vajluskub hauv peb lub xyoos: Mathais 19:16-20:19
Kênh Youtube BHKTHN:
