Klei Aê Diê Blŭ: Y-Timôthê 5:3-8
Êlan kliăng: “Tơdah sa čô mniê djiê ung mâo anak amâodah čô, brei digơ̆ hriăm êlâo hĭn thâo ngă klei mpŭ kơ găp djuê diñu pô, leh anăn thâo hdơr knga kơ amĭ ama diñu. Kyuadah klei anăn bi mơak kơ Aê Diê” (I Y-Timôthê 5:4)
Klei êmuh ksiêm mĭn: Ya klei drei thâo kơ klei dleh knap phung mniê djiê ung phung Yuđa ênuk đưm? Tui si Khua ƀĭng kna Y-Pôl mtă si ngă bruă răng čuăn kơ phung anak čô mniê djiê ung anăn? Mnuih amâo bi leh ôh bruă răng čuăn ngă klei mpŭ si ngă mnuih ñu jing?
“Mniê djiê ung” amâodah mniê mlâo čiăng lač kơ mniê mâo ung djiê leh. Phung mniê Yuđa ênuk đưm arăng yap digơ̆ jing phung hơăi mang hlăm yang ƀuôn, amâo dưi dưn ngăn ôh kyuanăn digơ̆ hdĭp tui si ung digơ̆ amâodah phung êkei hlăm gŏ sang. Mniê djiê ung jing sa hlăm tlâo phung mnuih Klei Aê Diê Blŭ bi êdah jing mnuih kŏ krei asei hjăn leh anăn ênưih êka kƀeh hlăm yang ƀuôn, anăn jing: “mnuih ƀun ƀin, phung anak êrĭt, mniê djiê ung.” Aê Diê khăp nanao leh anăn mđing mĭn kơ digơ̆.
Khua ƀĭng kna Y-Pôl mtă Phung Sang Aê Diê yơh srăng rông ba phung mniê djiê ung amâo mâo anak čô ôh (êlan 3). Bi phung mniê djiê ung ƀiădah mâo anak čô snăn, “brei digơ̆ hriăm êlâo hĭn thâo ngă klei mpŭ kơ găp djuê diñu pô, leh anăn thâo hdơr knga kơ amĭ ama diñu. Kyuadah klei anăn bi mơak kơ Aê Diê” (êlan 4). Klei mpŭ kơ amĭ ama tal êlâo hĭn jing gưt kơ klei bhiăn Aê Diê (Klei Kbiă 20:12), tal dua jing bi leh bruă čoh čuăn kơ sa čô mnuih kyuadah grăp čô mnuih hdĭp ti lăn ala anei đuôm nư amĭ ba ama ƀă leh anăn čiêm rông sơăi. Kyuanăn, ngă klei mpŭ jing “klei thâo hdơr knga” leh anăn “klei anăn bi mơak kơ Aê Diê”.
Bi phung bi đru đăo hlăm Phung Sang Aê Diê amâo thâo ngă klei mpŭ, Khua ƀĭng kna Y-Pôl pia kơ diñu jing phung “hngah leh klei đăo leh anăn jing jhat hĭn kơ sa čô amâo đăo ôh” (êlan 8). Klei đăo sĭt bi êdah hŏng klei gưt asăp. Pô lač kơ ñu jing anak čô Aê Diê ƀiădah amâo thâo ngă klei mpŭ ôh jing hngah leh kơ klei đăo yơh, leh anăn jhat êgao hĭn kơ phung amâo đăo mơh. Kyuadah klei thâo mpŭ jing klei bhiăn Aê Diê dưm hlăm ai tiê kpă grăp čô mnuih, hlăm hdră mĭn klei ênuah ênô jih jang găp djuê mnuih. Jih jang mnuih thâo kral Aê Diê amâodah amâo thâo kral dưn ăt thâo sơăi kơ klei mpŭ jing bruă bhiăn ngă, kyuanăn hlei phung hưn kơ diñu pô jing anak Aê Diê ƀiădah amâo thâo mpŭ ôh srăng tŭ klei bi kmhal ktrŏ hĭn kơ phung amâo thâo kral Aê Diê ôh.
Drei dưi bi êdah klei thâo mpŭ hŏng lu êlan mdê mdê. Êlâo hĭn hlăm klei dôk dơ̆ng ƀơ̆ng huă, klei blŭ tlao bi êdah klei mpŭ, boh nik kơ aduôn aê, amĭ ama mduôn, tăp năng digơ̆ amâo dưi krơ̆ng ôh klei digơ̆ ngă. Tăp hnơ̆ng pô dưi, brei drei čiêm rông, mtrah prăk kăk kơ digơ̆. Jing mnuih êdu awăt sĭt nik drei ăt mâo lu klei kƀah mơh. Tăp năng ngă klei bi ênguôt kơ aduôn aê, amĭ ama, kyuanăn brei drei wah lač myơr phung drei khăp kơ Khua Yang, akâo Ñu kiă kriê leh anăn brei kơ aduôn aê, amĭ ama klei hơ̆k mơak, klei êđăp ênang.
Grăp hruê Mpŭ Kơ Amĭ Ama, ya bruă drei ngă čiăng bi êdah klei mpŭ?
Wah lač: Ơ Khua Yang, kâo lač jăk kơ Ih brei kơ kâo mâo amĭ, mâo ama. Kâo thâo kơ ai dleh aduôn aê, amĭ ama ƀă kkiêng leh anăn rông ba kâo prŏng snăk. Brei kơ amĭ ama kâo mâo klei suaih pral leh anăn klei hơ̆k mơak hdĭp hŏng phung anak čô, đru kâo bi êdah nanao klei thâo mpŭ kơ digơ̆ msĕ mơh.
Dlăng Klei Aê Diê Blŭ hlăm tlâo thŭn: Y-Mathiơ 19:16-20:19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
