II Kevcai 11:18-21
Nqe cim:
“Nej tsis txhob ua nej lub neej zoo li tej neeg ntiajteb ua, tiamsis nej yuav tsum cia Vajtswv hloov nej lub siab kom nej muaj lub siab tshiab. Nej thiaj yuav paub ua raws li Vajtswv lub siab nyiam. Yog nej ua li ntawd, nej thiaj paub ua qhov zoo, ua haum Vajtswv siab thiab paub ua zoo kawg nkaus” (Loos 12:2).
Lus nug rau sawvdaws xav:
– Ua ntej tus Tswv haivneeg mus nyob hauv Tebchaws Coglus Tseg, Vajtswv tau qhia lawv txog yam dabtsi?
– Cov niam txiv ntseeg xyaum raws tej lus qhia no licas?
Ua ntej Vajtswv haivneeg mus nyob hauv Tebchaws Coglus Tseg, Vajtswv samhwm kom lawv yuav tsum nco ntsoov Vajtswv Txojlus thiab qhuab qhia rau lawv tej menyuam txhua hnub. Menyuam yog kev zoo siab ntawm nkawm niam txiv tiamsis qee zaug peb “poob” menyuam. Qhia menyuam yog tes haujlwm uas nyuaj kawg li. Muaj ntau nkawm niam txiv hlub Vajtswv, txawjntse, npluanuj tiamsis muaj cov menyuam tsis tsimtxiaj. Nyob ntawm no, tus Tswv qhia niam txiv yuav tsum muaj feemxyuam qhuab qhia menyuam kom lawv tuav ruaj kev ntseeg. Yuav ua tau li ntawd, niam txiv yuav tsum muaj lubneej ntseeg zoo, ua qauv zoo hauv kev cim nco Vajtswv Txojlus rau hauv nruab siab, kev xav thiab ua raws li Vajtswv Txojlus qhia (nqe 18). Niam txiv yuav qhia tsis tau menyuam hlub tus Tswv yog hais tias lawv tsis hlub tus Tswv; yuav qhia tsis tau menyuam nyeem Vajluskub, thov Vajtswv, mus pehawm,… yog hais tias niam txiv tsis ua yamntxwv zoo! Cia li qhia rau menyuam paub hais tias peb hlub thiab saib hlob Vajtswv Txojlus npaum licas. Hais tau hais tias, niam txiv tsis yog tsuas qhia menyuam los ntawm ncauj lus xwb, tiamsis yuav tsum qhia menyuam los ntawm yus lubneej thiab.
Nqe 19-20, tus Tswv qhia niam txiv yuav tsum tseg sijhawm los qhia menyuam txhua sijhawm txhua qhov chaw. Siv niam txiv lubneej txhua hnub los qhia txog kev ntseeg rau menyuam. Niam txiv yuav qhia tsis tau menyuam hlub tus Tswv yog hais tias Hnub So lawv tso tseg kev pehawm mus ua haujlwm nrhiav nyiaj, lossis yuam kom menyuam tseg kev pehawm mus kawm ntawv ntxiv! Niam txiv yuav tsum cia tus Tswv ua tus tseemceeb hauv lubneej. Yuav tsum nrhiav txhua lub tswvyim los pab menyuam cim nco Vajtswv Txojlus thiab ua raws. Cia li siv txhua lub tsamthawj, tshwjxeeb yog siv sijhawm tsevneeg teev hawm los coj tsevneeg kawm nco Vajtswv Txojlus thiab ua neej raws li Vajtswv Txojlus qhia. Ntawd kuj yog lub tswvyim zoo heev pab kovyeej kev dag ntxias thiab kev txhaum (Ntawv Nkauj 119:11).
Lub cuabyig yuav nyob kaj siab tsis yog nyob ntawm tej khoom nyiaj txiag, tej kev kawm txawj kawm ntse, tiamsis yog nyob ntawm kev mloog tus Tswv lus (nqe 21). Ib yam nyob hauv tej kev sim siab uas cov cuabyig Yixalayees ntsib thaum mus nyob hauv Tebchaws Coglus Tseg yog kev qhia menyuam paub Vajtswv Txojlus thiab ua raws Vajtswv Txojlus qhia kom tsis qaug mus ua raws li lwm haivneeg kev ua neej thiab kev pe dab pe mlom. Ntawm no kuj yog kev sim siab rau cov tsevneeg ntseeg Yexus. Niaj hnub nimno peb tabtom nyob hauv tiam uas muaj kev ua neej txawv Vajtswv Txojlus qhia. Peb tej menyuam qaij tsis dhau kev ua neej nrog tsev kawm ntawv, ntsib phoojywg, siv internet…, vim li ntawd yoojyim qaug rau lub ntiajteb. Thaum zoo li ntawd, niam txiv yuav tsum tuav ruaj lubneej ntseeg, ua yamntxwv zoo thiab siv sijhawm los qhuab qhia menyuam “txhob ua nej lub neej zoo li tej neeg ntiajteb ua” (Loos 12:2), kom tus Tswv tej koobhmoov muaj npluamias rau peb txhua lub cuabyig
Thov Vajtswv,
Tus Tswv, nyob hauv tiam uas tibneeg ua neej txawv Koj Txojlus qhia, thov pab nyuam yaus niaj hnub ua raws Koj Txojlus, ua yamntxwv zoo thiab qhia tej menyuam ua neej hlub Koj, kom nyuam yaus lub cuabyig puv npo kev kaj siab. Nyuam yaus tuav Yexus Khetos lub npe thov, Amees.
Peb puas xyaum ua lubneej ntseeg txhua hnub lawm tau?
Nyeem Vajluskub hauv peb lub xyoo: Mathais 26
Kênh Youtube BHKTHN:
