Klei Aê Diê Blŭ: Klei Mtô Mñă Klei Bhiăn 11:18-21
Êlan kliăng: “Đăm jing msĕ si phung ênuk anei ôh, ƀiădah brei Aê Diê bi mlih klei hdĭp diih hŏng klei Ñu lŏ bi mrâo klei mĭn diih, čiăng kơ diih dưi thâo ya jing klei Aê Diê čiăng jăk, mơak, leh anăn klă.” (Rôm 12:2)
Klei êmuh ksiêm mĭn: Êlâo kơ phung ƀuôn sang Aê Diê mŭt dôk hlăm Čar Aê Diê Ƀuăn, ya mta klei Aê Diê mtô mtă leh kơ diñu? Si amĭ ama phung đăo kơ Krist mă yua klei mtô anei?
Êlâo kơ phung ƀuôn sang Aê Diê mŭt dôk hlăm Čar Aê Diê Ƀuăn, Aê Diê mtă mtăn kơ kơ diñu brei djă pioh Klei Aê Diê Blŭ leh anăn mtô lač kơ phung anak čô grăp hruê. Phung anak jing klei mơak kơ amĭ ama ƀiădah tăp năng drei “luč” anak kyuadah amâo mtô diñu tui hlue Khua Yang. Mtô anak jing bruă myang dleh hĭn. Lu amĭ ama khăp kơ Aê Diê, thâo mbruă, mdrŏng sah, ƀiădah phung anak čô lĕ jhat amâo tŭ. Tinei, Khua Yang mtô amĭ ama brei mâo bruă klam mtô anak, čiăng kơ digơ̆ djă pioh kjăp klei đăo hlăm Khua Yang. Čiăng dưi msĕ snăn, brei amĭ ama hdĭp huĭ mpŭ kơ Aê Diê, ngă klei bi hmô hlăm bruă djă pioh Klei Aê Diê Blŭ hlăm ai tiê, hlăm klei mĭn leh anăn gưt ngă hlue Klei Aê Diê Blŭ (êlan 18). Amĭ ama amâo dưi ôh mtô anak thâo khăp kơ Khua Yang tơdah diñu pô amâo khăp kơ Khua Yang ôh; amâo dưi ôh mtô anak dlăng Klei Aê Diê, wah lač, nao bi kƀĭn kkuh mpŭ kơ Aê Diê, đa đa mkăn… tơdah amĭ ama amâo ngă klei bi hmô! Brei bĕ anak čô thâo ƀuh si klei drei khăp leh anăn mpŭ kơ Klei Aê Diê Blŭ. Blŭ mdê, amĭ ama amâo mtô lač kơ anak knŏng hŏng klei blŭ ôh, ƀiădah brei mtô anak wăt hŏng klei hdĭp drei pô yơh.
Êlan 19-20 Khua Yang mtô amĭ ama brei thâo yua bi jăk hruê mmông, mmông găl pioh mtô lač anak hlăm djăp mmông, djăp anôk. Yua boh klei sĭt hlăm klei hdĭp amĭ ama pioh mtô lač anak kơ klei đăo. Amĭ ama amâo dưi ôh mtô anak khăp huĭ mpŭ kơ Aê Diê, tơdah Hruê Kjuh amĭ ama lui mmông kkuh mpŭ ƀiădah nao mă bruă thiăm, brei anak mdei kƀĭn kkuh mpŭ čiăng nao hriăm hră thiăm! Brei amĭ ama dưm Khua Yang êlâo hĭn mrô sa hlăm klei hdĭp. Tui duah djăp hdră êlan čiăng kơ anak djă pioh Klei Aê Diê Blŭ leh anăn gưt ngă hlue. Yua bĕ jih jang mmông găl, boh nik nak pioh mmông kƀĭn kkuh mpŭ hlăm gŏ sang, čiăng kơ jih jang mnuih hlăm sang djă pioh Klei Aê Diê Blŭ leh anăn hdĭp tui si Klei Aê Diê Blŭ mtô. Klei anăn ăt jing klei tŭ dưn hĭn čiăng dưi bi kdơ̆ng hŏng klei mplư leh anăn klei soh (Klei Mmuñ Hđăp 119:11).
Gŏ sang jăk mơak amâo hlue tui si ngăn drăp, klei hriăm dlông ôh, ƀiădah hlue tui si klei gưt asăp Khua Yang (êlan 21). Sa hlăm lu klei lông dlăng kơ gŏ sang phung Israel tơdah mŭt dôk hlăm Čar Aê Diê Ƀuăn, jing klei čiêm rông mtô anak čô thâo Klei Aê Diê Blŭ leh anăn gưt djă pioh Klei Aê Diê Blŭ mtô mtă, čiăng kơ đăm hmăi tui klei bhiăn leh anăn klei kkuh rup yang phung ƀuôn sang tue. Anei ăt jing klei lông dlăng kơ gŏ sang phung đăo kơ Krist msĕ mơh. Hruê anei drei dôk hdĭp ti krah ênuk ƀuôn sang mâo lu mta êlan hdră klei mĭn hdĭp bi mklăk hŏng Klei Aê Diê Blŭ mtô. Phung anak drei amâo dưi tlaih ôh hŏng klei hdĭp mbĭt hlăm sang hră mơar, bi rŏ hŏng phung ƀĭng găp, yua internet…, kyuanăn êlưih snăk bi hmăi mơ̆ng lăn ala. Ti anăp boh klei sĭt anăn, brei amĭ ama djă krơ̆ng knhuah klei hdĭp huĭ mpŭ kơ Aê Diê, ngă klei bi hmô leh anăn pioh mmông mtô lač anak čô “đăm jing msĕ si phung ênuk anei ôh” (Rôm 12:2), čiăng kơ klei jăk mơak mơ̆ng Khua Yang êbeh dlai hlăm grăp gŏ sang drei.
Si ngă drei hriăm mjuăt ai tiê huĭ mpŭ grăp hruê mơ̆?
Wah lač: Ơ Khua Yang, ti krah ƀuôn sang mâo lu mta êlan hdră klei mĭn hdĭp bi mklăk hŏng Klei Aê Diê Blŭ mtô, akâo Khua Yang đru kâo djă pioh Klei Ih Blŭ nanao, hdĭp bi hmô leh anăn mtô lač anak čô khăp mpŭ kơ Khua Yang, čiăng kơ gŏ sang kâo mâo klei jăk mơak nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mathiơ 26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
