Yelemis 35:1-10
Nqe cim:
“…Nws tseem qhia ntxiv hais tias peb tsis txhob ua vaj ua tsev lossis ua liaj ua teb, lossis cog txiv hmab, lossis yuav cawv txiv hmab thiab nws samhwm ntxiv hais tias kom peb nyob tsevntaub xwb, peb thiaj tau nyob ntev hauv lub tebchaws no, ib yam li cov neeg uas tsis muaj tebchaws” (nqe 6-7).
Lus nug rau sawvdaws xav:
– Cov neeg Lekhas yog leejtwg cajces?
– Lawv ua qauv licas txog qhov kev mloog thiab ua raws li lawv tus yawgkoob qhia?
– Peb kawm tau yam dabtsi los ntawm cov neeg Lekhas tus qauv mloog lus?
Raws li cajces hauv I.Xwmtxheej Vajntxwv 2:55 qhia paub cov neeg Lekhas yog Kenais cajces, lawv yog cov neeg nyob tsis muaj chaws thiab yog lwm haivneeg los nrog cov neeg Yudas nyob hauv tebchaws Kana-as tiamsis lawv kuj nyob tsis ruaj chaws. Tus Tswv thiaj hais kom tus cevlus Yelemis mus rau cheebtsam uas cov neeg Lekhas nyob, coj lawv tuaj hauv ib chav tsev hauv lub Tuamtsev thiab caw lawv haus cawv txiv hmab. “Tiamsis lawv teb hais tias, peb tsis haus cawv. Peb yawgkoob Yaunadas uas yog Lekhas tus tub qhia rau peb hais tias, kom peb lossis peb cov xeebntxwv tsis txhob haus cawv hlo li. Nws tseem qhia ntxiv hais tias peb tsis txhob ua vaj ua tsev lossis ua liaj ua teb, lossis cog txiv hmab, lossis yuav cawv txiv hmab Thiab nws samhwm ntxiv hais tias kom peb nyob tsevntaub xwb, peb thiaj tau nyob ntev hauv lub tebchaws no, ib yam li cov neeg uas tsis muaj tebchaws” (nqe 6-7). Thiab cov neeg Lekhas hais khov kho tias: “Peb ua txhua yam raws li peb yawgkoob Yaunadas qhia rau peb lawm” (nqe 10).
Tsis yog tus Tswv tso cai rau Yelemis mus haub ntxias lossis mus dag cov neeg Lekhas, tiamsis vim Nws paub zoo lawv yog cov neeg ncaj ncees ua tau raws nraim li cov yawgkoob tej lus qhia tau kwvlam li 300 xyoo los lawm, yog li tus Tswv uas paub txhua yam xav siv cov neeg Lekhas tus qauv ncaj ncees no los qhia rau Nws haivneeg uas muaj lub siab tsis ncaj ncees, tsis ua raws li tus Tswv tej lus qhia, thiab ua txhaum rau Nws.
Cov neeg Lekhas yog ib co neeg tshwjxeeb. Lawv kuj ua kevcai txiav tawv thiab pehawm tus Tswv tiamsis lawv ho tsis raug suav ua cov neeg Yixalayees. Tej lus uas lawv cov yawgkoob qhia lub homphiaj yog tsis txhob cia lub neej npluanuj thiab quav cawv tua tau lawv lub neej nyob tsis ruaj chaws. Lawv tsis haus cawv, tsis ua vaj ua tsev, tsis ua liaj ua teb, nyob tsevntaub mus tas tiam neej kom lawv nco ntsoov hais tias yus yog neeg tuaj ua qhua hauv lub ntiajteb no xwb. Lawv tsis xav ua neeg haus cawv thiaj li qhia tawm lub neej hwm tus Tswv. Ua neej nyob tsevntaub thiaj tsis raug ntiajteb rub lossis ntxias tau, tiamsis lawv paub hais tias lub neej no tsuas nyob ib vuag xwb.
Cov neeg Lekhas tus qauv ncaj ncees, ua raws li cov yawgkoob qhia, qhia rau peb paub hais tias lub neej tamsim no yoojyim ua rau peb txaus siab, tsis nco txog hais tias peb yog neeg tuaj ua qhua hauv lub ntiajteb no lawm. Tsis txhob cia tej khoom ntiajteb ntxias tau peb tsis nco tus Tswv tej lus uas cawm neeg txojsia qhia. Kuv xav hais tias cia peb mus nyob hauv lub “tsevntaub” xyaum npaj lub neej mus nyob saum ntuj ceebtsheej.
Koj puas kam ua raws nraim li tus Tswv Txojlus qhia?
Thov Vajtswv,
Vajtswv! Thov Koj pab kom nyuam yaus nco ntsoov lub neej no tsuas nyob ib vuag xwb, Koj qhia nyuam yaus paub ua neeg hwm Koj thiab pehawm Koj los ntawm qhov “muab siab npuab tej uas nyob rau saum ntuj ceebtsheej”. Amees.
Nyeem Vajluskub hauv peb lub xyoo: Phau Ntawv Nkauj 85:1-86:17
Kênh Youtube BHKTHN:
