Klei Aê Diê Blŭ: Y‑Yêrêmi 35:1-10.
Êlan kliăng: “Đăm diih mnăm kpiê ôh, diih pô, kăn phung anak čô diih rei hlŏng lar. Đăm diih mdơ̆ng sang ôh, amâodah rah mjeh, amâodah pla đang boh kriăk ƀâo ôh; ƀiădah brei diih dôk hlăm sang čhiăm jih hruê diih dôk hdĭp, čiăng kơ diih dôk hdĭp lu hruê hlăm čar diih jưh bhiâo.” (Y‑Yêrêmi 35:6-7).
Klei êmuh ksiêm mĭn: Ti djuê ana mnuih Rêkap? Si klei diñu bi êdah klei bi hmô ai tiê sĭt suôr hlue ngă klei aê diñu? Ya klei hriăm drei mâo mơ̆ng klei phung Rêkap gưt asăp?
Hră čih anăn găp djuê hlăm I Klei Yăl Dliê 2:55 brei thâo sang Rêkap hlăm djuê ana Kênit, jing mnuih ƀuôn sang hiu răng mnơ̆ng mơ̆ng tač êngao nao ti Kanaan hdĭp mbĭt hŏng phung ƀuôn sang Yuđa ƀiădah diñu ăt djă pioh klei hdĭp hiu răng mnơ̆ng. Yêhôwa Aê Diê mtă kơ Khua pô hưn êlâo Y‑Yêrêmi nao ti krĭng mnuih Rêkap hdĭp mda, ba diñu hlăm sa boh adŭ hlăm Sang Yêhôwa leh anăn brei diñu mnăm kpiê. “Ƀiădah diñu lŏ wĭt lač, “Hmei amâo srăng mnăm kpiê ôh, kyuadah Y‑Jônadap anak êkei Y‑Rêkap ama hmei mtă kơ hmei leh, ‘Đăm diih mnăm kpiê ôh, diih pô, kăn phung anak čô diih rei hlŏng lar. Đăm diih mdơ̆ng sang ôh, amâodah rah mjeh, amâodah pla đang boh kriăk ƀâo ôh; ƀiădah brei diih dôk hlăm sang čhiăm jih hruê diih dôk hdĭp, čiăng kơ diih dôk hdĭp lu hruê hlăm čar diih jưh bhiâo” (êlan 6-7). Leh anăn phung Rêkap bi mklă: “ƀiădah hmei dôk hlăm sang čhiăm, gưt leh anăn ngă leh jih jang klei Y‑Jônadap ama hmei mtă leh” (êlan 10).
Amâo djŏ knŏng Aê Diê mtrŭn asăp kơ Khua pô hưn êlâo Y‑Yêrêmi mplư phung Rêkap ôh, ƀiădah kyua thâo sĭt ai tiê sĭt suôr djă pioh klei phung aê diñu mtô giăm 300 thŭn anei, anăn Aê Diê Pô thâo jih jang klei mă klei bi hmô phung Rêkap gưt asăp čiăng ƀuah mkra kơ ai tiê phung ƀuôn sang Ñu amâo sĭt suôr djă pioh Klei Aê Diê Blŭ, ngă soh hŏng klei bi mguôp hŏng Ñu.
Mnuih Rêkap dưi lač jing phung mdê hjăn. Diñu ăt tŭ klei khăt klĭt leh anăn kkuh mpŭ kơ Yêhôwa Aê Diê wăt tơdah amâo dưi yap jing phung ƀuôn sang Israel ôh. Ya klei phung aê diñu mtô năng ai hŏng hdră kñăm đăm hdĭp hŏng klei hdĭp phưi tha bi luč hĕ knuih jăk siam mơ̆ng klei hdĭp hiu răng mnơ̆ng. Diñu amâo dưi mnăm kpiê, amâo dưi mdơ̆ng sang, amâodah buh pla, jih klei hdĭp knŏng dôk hlăm sang čhiăm msĕ si čiăng hdơr pô jing phung tue ti lăn ala. Diñu amâo čiăng ôh klei kpiê ruă ngă kơ diñu amâo lŏ mdih čiăng hưn klei hdĭp huĭ mpŭ kơ Aê Diê. Hdĭp hlăm sang čhiăm srăng ngă kơ diñu amâo mâo ya klei jing dŏ lăn ala gai ai tiê klei mĭn diñu ôh, ƀiădah diñu srăng thâo săng nanao klei hdĭp anei jing êjai đuč.
Klei bi hmô phung Rêkap gưt asăp djă pioh klei phung aê diñu mtô, wăt tơdah phung aê diñu djiê leh êbeh 200 thŭn êlâo anăn, mñă kơ drei klei hdĭp mrâo mrang ênưih ngă kơ drei ƀuh jăk đei anăn drei wơr hĕ pô jing sa čô tue ti lăn ala anei. Đăm brei ya klei bi tluh kơ mnơ̆ng dhơ̆ng ngă kơ drei wơr Klei Aê Diê Blŭ mtô jing Klei Blŭ mơ̆ng Pô Hdĭp. Brei drei ăt bi mĭn nao mŭt hlăm “sang čhiăm” čiăng hriăm hdĭp mđing ai tiê klei mĭn kơ Ƀuôn Ala Mtao.
Drei gưt asăp Aê Diê kluôm ênŭm nanao mơ̆?
Wah lač: Ơ Aê Diê pô khăp! Akâo kơ Ih đru kâo hdơr nanao klei hdĭp anei jing êjai, đru kâo tui hlue klei hdĭp huĭ mpŭ leh anăn kkuh mpŭ kơ Aê Diê hlăm bruă “khăp kơ mnơ̆ng hlăm adiê”.
Dlăng Klei Aê Diê Blŭ hlăm tlâo thŭn: Klei Mmuñ Hđăp 85:1-13; 86:1-17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
