Galati 2:1-10
“Lu sư băt thoi noh yua kơ lu sư ‘bôh ‘Bok Kei-Dei ăn kơ inh pơm jơ̆ng ‘bang Yêsu năm chă bơtho đe đei lơi lơ bơngai lui kơ inh bơtho tơpă, kư̆m thoi ‘Bok Kei-Dei ăn kơ Pêtrôs pơm jơ̆ng ‘bang Yêsu năm chă bơtho đe đei lơi mơ̆n.” (Galati 2:8)
Nơ̆r jet tơchĕng pơwao:
-‘Bok Pôl yua iŏk lu nơ̆r ayơ wă bơtho tơ’bôh kơ lu bơngai wei lăng khul bơngai lui tơ Jêrusalem?
– Yua kơ kiơ sư khan “’Bok Kei-Dei ưh kơ pơdê kơ bu ôh”?
– ‘Bai pơhrăm ‘nâu tơ’blŏk kơ bơ̆n tơdrong kiơ?
Lăm chăl kơ đeh ‘bai pơhrăm năr ‘nâu roi pơdeh gah tơdrong jang ‘bok Pôl, ‘Barnaba păng Tĭt năm tơ dêh Jêrusalem wă pơma dơnuh hăm “lu bơngai pơm tih” (trong 2) wă khan lu bơngai pơgơ̆r bơngai lui kơplah ‘noh sơ̆ jơ̆ ‘bok Yakơ oh Kră Yang Yêsu, păng ‘bar ‘nu jơ̆ng ‘bang Pêtrôs, Yôhan wă pơma roi gah Tơdrong ‘Nao ‘Lơ̆ng mă sư đei bơtho kơ lu bơngai tơmoi ưh kơ khul Juđê. Yua kơ đei lơ bơngai ưh kơ jô̆ tơdrong jang Sư, tơdrong jang ưh kơ tơpă păng khan sư bơtho Tơdrong ‘Nao ‘Lơ̆ng kiơ̆ kơdih. Lăm tơdrong pơma pơjah băl gah tơdrong hŏk pơhrăm, Tơdrong Dŏng pơklaih – Hŏk pơhrăm Tơdrong Bơngai Lui, ‘bok Pôl tơ’bôh tơdrong pơyom ‘măn kơ lu jơ̆ng ‘bang gơh pơgơ̆r lu jơ̆ng ‘bang nai đơ̆ng tơdrong năm tơ’bơ̆p lu sư wă kơ băt hơđăl Tơdrong ‘Nao ‘Lơ̆ng mă sư păng lu sư bơtho ‘noh lei lăi pơma kơ minh tơdrong đĕch. Sư pơyom kơ tơdrong pơjing tơdrong lui, mălei sư chu Kră Yang tôm tơdrong. Lăm tơdrong lu sư tơ’bơ̆p băl tơ’bôh lu sư pơma dơnuh tơpăt păng pơyom băl.
Mă khan lei ră, yua kơ kiơ sư khan “lu sư ưh kơ wă ming tơplih tơdrong Inh bơtho ôh” (trong 6) păng “lu sư ưh kơ wă ming tơplih, tơdrong Inh bơtho ôh” (trong 6 BTTHĐ) yua kơ “’Bok Kei-Dei ưh kơ đei pơdê kơ bu ôh”? đei lu bơngai tơblang nơ̆r ‘Bok Kei-Dei mơ’nah khan, lu bơngai lui tơ pơlei Galati khan kơdih lu sư rơdu, yua kơ mơ̆ng kiơ̆ jơ̆ng ‘bang bơtho mă ưh kơ arih hơdai hăm Kră Yang Yêsu. ‘Bok Pôl khan kơ lu sư thoi âu, mă khan kon bơngai lăng jơ̆ng ‘bang âu tih hloh kơ jơ̆ng ‘bang to, mă khan pơyom kơ đơ̆ng tơdrong sư bơtho păng lơ sơnăm kiơ̆ Kră Yang, mălei sư păng Pêtrôs bơih bơngai jơ̆ng ‘bang Kră Yang tơpă, Kră Yang wơh yua bre sư năm bơtho kơ lơ bơngai phara (trong 7-8) đơ̆ng noh, ‘bok Pôl ưh kơ đei layơ rơdu yua kơ sơ̆ sư ayăt kơ Kră Yang dah mă pơm jơ̆ng ‘bang oei ‘lơ̆p hơmuh hơmŏng. Hăm jơhngơ̆m pơyom, sư đei năm chă tơ’bơ̆p lu jơ̆ng ‘bang nai mălei sư khan “’Bok Kei-Dei ăn kơ Pêtrôs pơm jơ̆ng ‘bang năm bơtho đe đei lơi… kư̆m ăn kơ inh pơm jơ̆ng ‘bang năm chă bơtho đe đei lơ mơ̆n” (trong 8).
‘Bai pơhrăm ‘nâu tơ’blŏk rim kơ bơ̆n, mă khan bơngai ‘nao lui dah lui đunh sơnăm bơih, mă khan tơ khul hnam akŭm tih dah tơ anih akŭm lăm pơlei mă khan adrĕch Bahnar dah yuăn, mă khan đei tơdrong jang lăm hnam akŭm dah mă bơngai lui hmă.v.v…, ‘nĕ pôk atŏk kơdih pơm tih, kư̆m ‘nĕ lăng bơ̆n kơdih khan iĕ. Đĭ đăng kơ bơ̆n jơ̆ đĭch đam Kră Yang lei lăi đĕch. Rim ‘nu Kră Yang wơh păng yua lăm tơdrong jang phara kiơ̆ kơ Kră Yang wă, bơ̆n athei bơ̆jang hăm jơhngơ̆m đĭch đam ‘lơ̆ng tơpăt păng tơnăp lăm Kră Yang.
Kơkuh kơ Kră Yang, inh bơnê kơ Ih yua kơ ‘bok Pôl bơih pơm kơmĭl ‘lơ̆ng lăm tơdrong jang Ih krao. Apinh Kră Yang tơgŭm kơ inh huay kơ pơang kư̆m huay kơ rơdu yua kơ băt Tơ’ngla mă pơgơ̆r lăm jơhngơ̆m bơngai nai kư̆m thoi lăm jơhngơ̆m inh. Yua anăn Kră Yang Yêsu Krist, Amen!
Hăm đei layơ bơ̆n ‘bôh kơdih bơ̆n đei anih jang “tih” dah mă jang “iĕ” hloh kơ bơngai nai ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 13
Kênh Youtube BHKTHN:
