Bơtho Khôi Juăt 32:1-6
Trong tơm: “Ơ kon pơlei kơhlôh kơwao ưh kơ đei đon tơchĕng, lu iĕm pơm kơ Kră Yang thoi noh hă? Ưh kơ ‘bă lu iĕm hă, ưh kơ tơ’ngla pơjing iĕm hă? Ưh kơ trŏ Sư pơjing iĕm jing adrĕch adrung Sư hă?” (Bơtho Khôi Juăt 32: 6)
Nơ̆r jet tơchĕng pơwao:
- Lăm ‘bai pơhrăm tơm păng kơnhăm lăm tơdrâu trong blŭng a lăm nơ̆r hơri ‘nâu thoi yơ?
- ‘Bok Môis ư-ang kơ Kră Yang ‘Bok Kei-Dei bơih Tơ’ngla thoi yơ?
- Lu bơ̆n đei pơhrăm iŏk thoi yơ đơ̆ng tơdrong jang ưh kơ keh jing gah bơhngol đêl lu bơngai năm adrol?
Lu bơ̆n đêl băt kon pơlei Israel adrol kơ yak năm mơ̆t blah Dêh Mă Sư Pơkă, lu sư đei pơkă pơkăm gô chu pơm kiơ̆ tơdrong pơgơ̆p hăm Kră Yang ‘Bok Kei-Dei păng kon pơlei Israel đei pơjing bơih adrol kơ noh. Thoi noh kơplah kon pơlei Israel pơm glăi hăm lu tơdrong đei pơkă pơgơ̆p, gô đei chih hơmet nơ̆r vă kơ tơ’bôh pơdah tơdrong yoch noh, nơ̆r ‘bok Môis hơri tơm lăm nơ̆r jô̆ gah tơdrong kon pơlei Israel pơm tơplơ̆ hăm Kră Yang mă đei chih hơmet dơ̆ng.
Trong chăl lăm sơ̆p hla bơar Bơtho Khôi Juăt chăl noh sơ̆ rok kiơ̆ tơdrong chih trong chăl thoi tơring jê̆ tơtil gah hơlĕch, thoi noh lăm trong chăl đei chih hla bơar jô̆ yoch kăl kơ đei lu bơngai lăng pơsĭt, noh pơm ăn kơ Môis krao apĭnh lu hơtăl plĕnh păng teh athei mơ̆ng păng pơm kơdranh ‘bơ̆t anăp kon pơlei Israel pơm lu tơdromg glăi. ‘Bok Môis jô̆ khan kon pơlei đei pơm ayăt kơ ‘Bok Kei-Dei bơih Tơ’ngla kư̆m dang ‘Bă, kư̆m ‘Bok Dŏng Pơklaih, kư̆m Tơ’ngla pơjing păng pơjing lu su jing minh adrĕch (trong 6), tơdrong yoch kon pơlei pơm ăn jing đei hil mĭl thoi noh ‘bok Môis pơma khan lu sư bơih kon drŏ-nglo Kră Yang. Pơm thoi yơ minh Kră Yang ‘Bok Kei-Dei ‘lơ̆ng tơpăt păng sĭt ling lang đei ‘bơm truh “minh adrĕch kơ hlôh kơwao ưh kơ đei đon tơchĕng” noh dơ̆ng! (tr 5 BTTHĐ). Nơ̆r Môis pơma khan wă pơsĭt lăm Kră Yang ‘Bok Kei-Dei ưh kơ đei layơ tơplih, minh kon pơlei Israel đĕch đei tơplih jơhngơ̆m đơ̆ng rŏng kơ đei dôm tơdrong pŭn hiôk ‘lơ̆ng đơ̆ng Kră Yang ‘Bok Kei-Dei ăn kơ lu sư.
Kon bơngai ngăl pơma “ ‘lơ̆ng pơang, kơnê̆ pơjăm” mă-lei trŏ kơ pơma khan lăm ‘bai hơri ‘nâu nhen thoi oei đei đêl rơka gah bơhngol lăm kon pơlei Israel mă-lei kư̆m ưh kơ trŏ wă đơ̆p lê̆ dah ôn hlơp. Lăm noh lu tơdrong yoch mă Môis đei chih wă bơtho ăn kơ lu sư păng truh tơ kon sâu, wă kơnhăm bơwei tơdrong bơtho păng tơ ’blŏk nơ̆r đơ̆ng ‘Bok Kei-Dei khan tơbăt kơ lu kon sâu đơ̆ng rŏng dơ̆ng, lu tơdrong jang ưh kơ keh jing ‘lơ̆ng mă khan đêl đei mơn ơh sơ’ngon, mă-lei kơplah pơdah rơđah đơ̆ng noh gơh tơgŭm kơ bơngai lui gơh mơn hơmet ming dơ̆ng lăm tơdrong arih wă kơ wơ̆ ‘lŏ lăm tơdrong lui, ‘bôh tơdrong rơdu kơdih akâu păng mơn đơ̆ng tơdrong ‘mêm mơnat Kră Yang tih hloh, thoi noh mơ̆n, đei roi tơdrong mơn đơ̆ng ưh kơ keh jing gah bơhngol lu bơngai năm adrol ưh kơ trŏ wă kơ lu bơ̆n pơma chrih păng sek tơlang, mă-lei noh lu nơ̆r bơtho ‘lơ̆ng wă kơ rim ‘nu lu bơ̆n gơh yua bơtho gah lu kơmĭl ‘lơ̆ng dah kơmĭl kơnê̆ ăn kơ kon hơ’lơ̆p bơ̆n, păng wă tơ’blŏk ăn ko kon pơlei Kră Yang lăm khul bơngai lui gơh weh wer đơ̆ng tơdrong kơnê̆ lu bơngai adrol ki pơm.
Lu bơ̆n ngăl tơ’bơ̆p hăm tơdrong ‘bai pơhrăm ưh kơ keh jing gah bơhngol thoi yơ?
Kơkuh kơ Ih ơ Kră Yang, Ih bơih Kră Yang ‘Bok Kei-Dei ‘lơ̆ng tơpăt păng sĭt ling lang, apĭnh bơtho inh arih tơnăp hăm nơ̆r Ih, păng tơgŭm inh rai wơ̆ ‘lŏ đơ̆ng kơmĭl ưh kơ keh jing gah bơhngol lu bơngai nai, yua anăn Kră Yang Yêsu Krist, Amen.
Đŏk sơ̆p hla bơar nơ̆r ‘Bok Kei-Dei lăm pêng sơnăm: ISamuel 27
Kênh Youtube BHKTHN:
