Phau Ntawv Nkauj 2:1-12
Nqe cim:
“Nws hais tias, kuv tsa kuv tus vajntxwv rau saum lub Roob Xi-oos uas yog kuv lub roob dawbhuv lawm” (Phau Ntawv Nkauj 2:6)
Lus nug rau sawvdaws xav:
– Phau Ntawv Nkauj 2 qhia paub dabtsi txog tibneeg thiab Vajtswv?
– Tus uas tau txhawb meejthawj tswj kav zoo li cas?
– Lo lus nqua hu twg pub rau cov vajntxwv?
– Zaj kawm no ntuas qhia peb yam dabtsi?
Phau Ntawv Nkauj 2:1-3 hais txog cov neeg uas tawm tswvyim phem los ntawm tej lus nug: “Vim li cas txhua haivneeg tuav hauv ntxeev siab? Vim li cas cov pejxeem tuav tswvyim ua tej uas tsis muaj qabhau?”, muaj lub ntsiab tias: Lwm haivneeg ruam heev thiab phem kawg nkaus, kav tawmtsam Vajtswv tus muaj hwjchim loj. Cov vajntxwv nyob hauv ntiajteb no yuav sawv los tuav tswvyim tawmtsam tus Tswv thiab tus uas tau muab txhawb meejthawj lawm. Lawv hais tias lawv yuav koom siab kom coob thiaj tawmtsam yeej tus Tswv. Lawv xav muaj kev ywjpheej, khiav tawm hauv tus Tswv txojkev tswj kav. Lawv tsis zeem paub qhov tseeb hais tias, kev ywpheej tiag tsuas yog nyob ntawm txojkev sib raug zoo nrog Vajtswv thiab ua raws li Nws txoj kevcai qhia.
Tus Tswv luag lawv plig thiab chim rau lawv heev. Nyob hauv qhov kev chim, Nws cem ua rau lawv ras pes dheev. Txawm yog cov vajntxwv kav tebchaws siv zog heev los lawv yeej ua tsis tau kom tus Tswv hloov siab li. “Nws hais tias, Kuv tsa kuv tus vajntxwv rau saum lub Roob Xi-oos uas yog kuv lub roob dawbhuv lawm” (nqe 6). Dua li ntawd, cov vajntxwv uas tawmtsam tus Tswv, tus uas tau muab txhawb meejthawj, tus Vajntxwv uas tus Tswv tsa rau saum lub roob dawbhuv yuav qhia tus Tswv txoj kevcai thiab tau muab hu ua Nws tus Tub. Vajtswv yuav mloog tus ntawd tej lus thov, pub cov tebchaws thiab txhua yam ua Vajntxwv tug. Tus Vajntxwv ntawd yuav tawmtsam txhua haivneeg cov vajntxwv thiab muaj yeej (nqe 7-9). Tus uas tau Muab Txhawb Meejthawj, tus Vajntxwv uas tau tus Tswv tsa yog Tswv Yexus, yug los ntawm Daviv cajces. “Tus no yog kuv tus tubtxib uas kuv xav tseg lawm, kuv hlub nws thiab kuv txaus siab rau nws, kuv yuav tso kuv tus Ntsujplig los rau saum nws, thiab nws yuav qhia kuv txojkev ncaj ncees rau txhua haivneeg paub” (Mathais 12:18).
Txawm yog Vajtswv yog tus uas tsim ntuj tsim teb muaj hwjchim rho pub tau txojsia los Nws yog tus uas muaj kev hlub, Nws niaj hnub cia sijhawm rau tus uas lees txim, tig rov los cuag Nws. Qhov xaus ntawm Phau Ntawv Nkauj 2 yog cov lus nqua hu cov thawjcoj kav tebchaws: Lawv yuav tsum ua neeg muaj tswvyim, mloog tus Tswv tej lus samhwm, hwm tus Tswv los ntawm kev tswj teb kav chaw, nrhiav kev nyob sib haum thiab hlub Vajtswv tus Tub uas yog Tswv Yexus. Cov thawjcoj kav tebchaws hwm tus Tswv yuav coj tau pejxeem taug tus Tswv txojkev: “Haivneeg uas muaj Vajtswv ua lawv tus Tswv muaj kev kaj siab, cov neeg uas nws xaiv ua nws tug lawm, lawv tau zoo nyob kaj siab lug” (Phau Ntawv Nkauj 33:12).
Zaj kawm no ntuas qhia peb yuav tsum los nkaum ntawm tus tswj kav uas muaj hwjchim, dhau ntawm nws tsis muaj ib qhov chaw uas nyob tau kaj siab ruaj khov li. Cia li thov Vajtswv pab rau tej nomtswv.
Thov Vajtswv,
Vajtswv tus uas muaj hwjchim loj! Nyuam yaus ua Koj tsaug vim tau ua Koj menyuam, tau nyob hauv txojkev nrog Vajtswv sib raug zoo, tau txais kev ywjpheej, kaj siab thiab vammeej. Nyuam yaus thov Vajtswv Koj pab rau tej nomtswv kav tebchaws paub hwm Koj, tswj teb kav chaw los ntawm txojkev ncaj ncees thiaj tau txais Koj tej koob hmoov. Nyuam yaus tuav Tswv Yexus lub npe thov, Amees.
Peb muaj tus cwjpwm li cas thaum zeem paub Vajtswv yog tus tswj kav muaj hwjchim?
Nyeem Vajluskub hauv peb lub xyoo: Tes Haujlwm 5
Kênh Youtube BHKTHN:
