Klei Aê Diê Blŭ: Y‑Mathiơ 6:24
Êlan kliăng: “Sa čô amâo dưi ôh jing hlŭn kơ dua čô khua; kyuadah ñu srăng bi êmut kơ sa čô anei leh anăn khăp kơ sa čô mkăn. Amâodah ñu srăng mpŭ kơ pô anei leh anăn bi êmut kơ pô mkăn. Diih amâo dưi ôh mă bruă kơ Aê Diê wăt kơ klei jing mdrŏng.” (Y‑Mathiơ 6:24)
Klei êmuh ksiêm mĭn: Khua Yang Yêsu brei drei thâo mâo dua čô khua, hlei pô drei ruah hlăm dua čô khua anăn? Ya ngă amâo dưi ôh mă bruă kơ jih dua čô khua anei hlăm sa blư̆? Hlei pô dôk jing khua ih ară anei?
“Jing hlŭn kơ dua čô khua” amâo djŏ ôh ngă dua bruă msĕ si ênuk anei, ƀiădah boh blŭ “khua” Khua Yang Yêsu mtô tinei čiăng lač kơ mnuih mâo klei dưi hĭn ti dlông sa čô hlŭn, leh anăn boh blŭ “jing hlŭn” mblang jing ngă hlŭn kơ sa čô “khua”. Hlăm ênuk Khua Yang Yêsu, hlŭn jing ngăn drăp kơ sa čô khua, jing dŏ khua leh anăn ngă bruă kơ khua djăp mta, jih hruê mmông. Kyuanăn sa čô mnuih amâo dưi ôh jing hlŭn kơ dua čô khua sa blư̆, leh anăn kăn dưi mơh gưt ngă klei mtă mơ̆ng dua čô khua hlăm sa blư̆, kyuadah srăng ngă kơ pô jing hlŭn bi êmut kơ khua anei leh anăn khăp kơ khua adih. Bi êmut leh anăn khăp amâo djŏ ôh knŏng lač kơ klei bi djhưng hlăm ai tiê ƀiădah lač kơ klei jih ai tiê leh anăn dưm pioh êlâo hĭn. Kyuanăn, sa čô hlŭn brei bi klă hĕ hlei pô jing khua drei mă bruă.
Khua Yang Yêsu brei thâo brei drei ruah sa hlăm dua čô khua, Aê Diê leh anăn Mamôn. “Mamôn” jing boh blŭ Arap lač kơ ngăn drăp. “Mamôn” ăt lač kơ “mta klei đăo knang” amâodah “mta klei sa čô mnuih đăo knang”, kyuanăn “jing hlŭn kơ Mamôn” mblang jing “đăo knang kơ ngăn drăp kơ klei jing mdrŏng”.
Lu phung đăo hruê anei gĭr ktĭr mă bruă kơ dua čô khua. Diñu kkuh mpŭ kơ Aê Diê Hruê Kjuh, mă bruă kơ “Mamôn” dơ̆ng mơ̆ng Hruê Sa truh kơ Hruê Êma, leh anăn pioh Hruê Năm kơ hjăn pô. Klei mĭn anei yap klei đăo msĕ si sa mta klei khăp čiăng mkăn, msĕ si mkra đang djam amâodah klei hlăp čhưn. Diñu dlăng kơ bruă kkuh mpŭ leh anăn mă bruă kơ Khua Yang hlăm Hruê Kjuh jing sa mta klei khăp čiăng hĭn kơ yap klei anăn jing bruă brei ngă. Ƀiădah đăm mâo pô wơr bĭt ôh Aê Diê amâo djŏ ôh knŏng jing Pô Bi Mtlaih drei, ƀiădah Ñu jing Khua, jing Khua Yang drei, Pô mâo jih klei dưi ti dlông klei hdĭp drei. Bi drei jing dĭng buăl Ñu mâodah jing hlŭn Ñu.
Ngăn dưn drei ti lăn ala amâodah hlăm adiê, klei hdĭp mngăt ai tiê drei bŏ hŏng klei mngač amâodah klei mmăt tĭt (Y‑Mathiơ 6:19-23), leh anăn khua drei jing Aê Diê amâodah dŏ ngăn klei mdrŏng sah ti lăn ala anei. Drei dưi ngă bruă kơ prăk kăk leh anăn mgưt mă bruă kơ Aê Diê, amâodah mă bruă kơ Khua Yang leh anăn yua prăk kăk kơ drei pô, ƀiădah drei amâo tuôm dưi ôh mă bruă kơ jih dua! Jih jang drei mă bruă kơ sa mta klei sơăi, amâodah blŭ mdê hĭn, mâo sa mta klei dôk kiă kriê drei, drei čuăn ruah mta klei dưm êlâo hĭn, gĭt gai hdră êlan yua hruê mmông, klei hmăng hmưi leh anăn klei mĭn kơ klei tŭ jing. Kyuanăn, grăp čô drei brei čuăn kơ hlei pô drei mă bruă, kơ Aê Diê amâodah kơ mta klei mkăn.
Si ngă drei hmiêt mkăp jing sa čô dĭng buăl kluôm dhuôm kơ Aê Diê mơ̆?
Wah lač: Ơ Khua Yang, kâo hdơr knga bi mni kơ Khua Yang brei kâo dưi jing anak Ih, dưi mă bruă kơ Ih. Ih amâo djŏ knŏng jing Khua kâo, ƀiădah wăt jing Khua bŏ hŏng klei khăp, klei jăk leh anăn sĭt suôr. Kâo ƀuăn srăng sĭt suôr mă bruă kơ Khua Yang kluôm jih klei hdĭp.
Dlăng Klei Aê Diê Blŭ hlăm tlâo thŭn: Y‑Yôhan 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
