Klei Aê Diê Blŭ: Y‑Yakơ 2:18‑19
Êlan kliăng: “Ih đăo mâo knŏng sa čô Aê Diê; jăk leh. Wăt phung yang jhat đăo msĕ mơh — leh anăn diñu ktư̆ yơ̆ng.” (Y‑Yakơ 2:19)
Klei êmuh ksiêm mĭn: Klei Aê Diê Blŭ: hlei phung yang jhat jing? Si Y‑Yakơ lač kơ klei phung yang jhat đăo kơ Aê Diê? Ya klei mñă kơ drei kơ klei đăo sĭt?
Čih kơ phung đăo kơ klei hdĭp klei đăo,Y‑Yakơ hưn mdah leh kơ boh sĭt ngă bi kngăr snăk. Êlâo anăn, ñu lač amâo djŏ ôh jih jang klei đăo msĕ sơăi, kyua mâo mta klei đăo djiê, amâo dưi bi mtlaih hlei pô ôh. Hlăm trăn Klei Aê Diê Blŭ anei, ñu lač kơ sa klei jing sĭt, anăn jing wăt yang jhat ăt mâo klei đăo mơh. Boh blŭ “yang jhat” knŏng lač kơ sa êpul mâo klei myang, myang hĭn kơ anak mnuih ƀiădah ti gŭ Aê Diê. Yang jhat jing phung dĭng buăl jăk lĕ hlăm klei soh, bi kdơ̆ng hŏng Aê Diê, duah êlan bi rai hdră jăk Aê Diê, leh anăn ktŭng anak mnuih kbưi hŏng Aê Diê. Klei Aê Diê Blŭ brei thâo klei knhal tuč kơ phung yang jhat jing war pui leh anăn boh tâo pui lă lar (Klei Bi Êdah 20:10).
Y‑Yakơ brei thâo wăt yang jhat ăt đăo mơh kơ “knŏng sa čô Aê Diê”. Hlăk êjai lăn ala kkuh kơ lu yang mdê mdê, phung Israel mâo hriăm leh anăn đăo knŏng mâo sa Aê Diê leh anăn Anăn Ñu jing Yêhôwa, čih leh hlăm Klei Mtô Mñă Klei Bhiăn 6:4, “Hmư̆ bĕ, Ơ phung Israel: Knŏng hjăn Yêhôwa jing Aê Diê drei”. Yang jhat brei thâo klei bi mklă anei ăt msĕ si thâo lu klei sĭt nik tur knơ̆ng mkăn msĕ si klei Aê Diê jing mâo sĭt, thâo klei myang Khua Yang Yêsu, thâo klei phat kđi knhal tuč, ƀuôn ala mtao leh anăn war pui…Y‑Yakơ brei thâo amâo djŏ knŏng klei thâo ôh, yang jhat lŏ “ktư̆ yơ̆ng”. Jing yang jhat amâo djŏ knŏng thâo kral ôh ƀiădah lŏ thâo ƀuh. Ƀiădah klă sĭt klei thâo yang jhat amâo atăt kơ klei bi mtlaih ôh ƀiădah truh kơ klei bi kmhal lă lar hlăm war pui kyua yang jhat bi kdơ̆ng nanao hŏng Aê Diê.
Drei êmuh hjăn pô dôk đăo kơ Aê Diê msĕ si klei yang jhat đăo mơ̆? Hlăm ai tiê klei mĭn, drei hriăm lu klei thâo kơ klei đăo, klei hriăm yuôm bhăn, tuč lu êlan Klei Aê Diê Blŭ. Hlăm klei khăp, grăp blư̆ tơdah lač kơ klei Khua Yang tŭ klei knap mñai leh anăn djiê, drei mgei ai tiê tơl luh êa ală; grăp blư̆ bi mĭn kơ klei hdĭp ti war pui, drei ƀrơ̆k mdih, bi mĭn. Ƀiădah bi klei hdĭp drei si ngă? Drei dôk bi êdah sa klei hdĭp huĭ mpŭ, amâodah jing sa klei hdĭp bi kdơ̆ng hŏng Aê Diê? Klei adôk kƀah hlăm klei yang jhat đăo jing gưt asăp Aê Diê. Anăn jing klei drei dôk kƀah leh anăn bi êdah grăp hruê mơ̆ amâodah hơăi? Klei đăo sĭt nik jing ai tiê klei mĭn thâo kral Aê Diê, ai tiê huĭ mpŭ kơ Aê Diê, leh anăn jih ai tiê hdĭp kơ Aê Diê. Akâo kơ Aê Diê đru drei jih ai tiê đăo knang, gưt asăp amâo djŏ knŏng đăo ôh.
Ya klei bi mklă brei ƀuh drei amâo đăo msĕ si klei phung yang jhat đăo ôh?
Wah lač: Ơ Khua Yang, hriăm kơ klei phung yang jhat đăo ngă kơ kâo brei mđing ai tiê lŏ ksiêm dlăng klei đăo pô. Akâo kơ klei đăo kâo amâo djŏ jing klei thâo ôh, amâo jing klei khăp ôh, ƀiădah lŏ jing ai tiê gưt asăp, sa klei hdĭp djŏ hŏng klei đăo, sa klei bi êdah djŏ klă kơ klei khăp leh anăn hdơr knga kơ klei bi mtlaih Ih brei leh kơ kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Luk 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
