Yakaunpaus 2:18-19
Nqe cim.
“Koj ntseeg hais tias yeej muaj tib tug Vajtswv xwb, koj ntseeg li ntawd zoo lawm, dab los kuj ntseeg ib yam nkaus li ntawd, thiab dab ntshai Vajtswv ua ibce tshee hnyo.” (Yakaunpaus 2:19)
Lus nug rau sawvdaws xav.
– Vajluskub qhia paub dab yog leejtwg?
– Yakaunpaus hais li cas txog dab kev ntseeg Vajtswv?
– Peb kawm tau yam dabtsi hais txog kev ntseeg tseeb?
Sau tsab ntawv xa mus rau cov ntseeg hais txog lubneej sab kev ntseeg, Yakaunpaus qhia rau lawv txog tej yam tseeb uas lawv tsis tau hnov dua. Ua ntej ntawd, Yakaunpaus qhia hais tias tsis yog txojkev ntseeg twg puavleej zoo ib yam, rau qhov muaj cov kev ntseeg tuag, cawm tsis tau leejtwg dim. Hauv ntu Vajluskub no, Yakaunpaus hais txog ib qhov tseeb ntxiv thiab, ntawd yog dab kuj muaj kev ntseeg. Lo lus “dab” hais txog ib lub hwvxyeej, muaj hwjchim dua tibneeg tiamsis swb Vajtswv. Dab yog cov timtswv raug hauv ntxias, ntxeev siab tawmtsam Vajtswv, nrhiav tswvyim rhuav Vajtswv tes haujlwm, thiab haub ntxias tibneeg txav deb Vajtswv. Vajluskub qhia paub qhov xaus ntawm dab yog nyob“hauv cov nplaim taws leejfaj uas cig ntswj pesyos thiab kev tsimtxom tas hnub tas hmo mus ibtxhis li” (Tshwmsim 20:10).
Yakaunpaus qhia hais tias dab kuj ntseeg tias “muaj tib tug Vajtswv xwb”. Thaum neeg ntiajteb pehawm ntau tus tswv, cov neeg Yixalayees tau qhia thiab ntseeg hais tias tsuas muaj tib tug Vajtswv xwb, thiab Nws lub npe hu uas tus Tswv, tau sau tseg hauv II Kevcai 6:4, “Ib tsoom Yixalayees, nej ua tib zoo mloog, tsuas yog tus Tswv tib leeg xwb, thiaj yog peb tus Vajtswv.” Dab yeej paub tej no thiab tseem paub ntau yam ntxiv hais txog Vajtswv kev muaj nyob, paub Tswv Yexus tus yamntxwv Vajtswv, paub txojkev txiav txim thaum kawg, ntuj ceebtsheej thiab ntuj tawg huvsi,… Yakaunpaus qhia hais tias, dab tsis yog muaj kev paub xwb, tiamsis tseem “ntshai ua ib ce tshee hnyo” thiab. Txhais tau hais tias dab tsis yog tsuas paub xwb tiamsis tseem hnov ntshai thiab. Tiamsis dab txojkev paub tsis coj mus tau txojkev cawmdim, ho coj mus raug txojkev txiav txim mus ibtxhis nyob hauv ntuj tawg, rau qhov dab ibtxwm tawmtsam Vajtswv.
Peb yuav tsum nug yus tus kheej tias, peb puas tabtom ntseeg Vajtswv zoo li dab ntseeg? Hais txog sab kev totaub, peb paub ntau yam kev kawm txog Vajtswv, ntau txojkev cai ntseeg tseemceeb, nco tau ntau nqe Vajluskub. Hais txog sab kev xav, txhua zaus uas hais txog tus Tswv raug txomnyem thiab tuag, peb mob siab txog qhov uas poob kuamuag; txhua zaus uas xav txog lub neej nyob hauv ntuj tawg, peb tu siab, tsis tsaug zog. Tiamsis peb lubneej ho zoo li cas? Peb puas tabtom qhia tshwm lubneej ntseeg zoo, lossis ho ua lub neej tawmtsam Vajtswv? Yam tseem tsis tau muaj nyob hauv dab txojkev ntseeg yog kev mloog Vajtswv lus. Ntawd puas yog yam uas peb tabtom tsis tau muaj thiab tsis qhia tshwm txhua hnub? Kev ntseeg tseeb yog muaj kev paub Vajtswv, muaj lub siab hlub Nws, thiab muaj kev txiav txim siab ua neej pub rau Nws. Thov Vajtswv pab kom peb niaj hnub mob siab ntseeg, muaj kev mloog lus, tsis yog tsuas ntseeg xwb.
Thov Vajtswv,
Tus Tswv, kawm txog dab kev ntseeg ua rau nyuam yaus muaj sijhawm tig los tshuaj saib nyuam yaus txojkev ntseeg. Thov kom nyuam yaus txojkev ntseeg tsis yog kev paub, siab xav xwb tiamsis tseem muaj kev txiav txim siab mloog lus, ua neej raws li txojkev ntseeg, muaj kev xav tsimnyog txog tus Tswv txojkev hlub thiab kev cawmdim. Nyuam yaus tuav Yexus Khetos lub npe thov, Amees.
Qhov twg yog timkhawv qhia paub tias peb tsis ntseeg zoo li dab ntseeg?
Nyeem Vajluskub hauv peb lub xyoos: Lukas 18
Kênh Youtube BHKTHN:
