Yelemis 42:4-22
Nqe cim:
“Tus uas hnov kuv tej lus, tiamsis tsis ua raws li, tus ntawd zoo ib yam li tus kws ua tsev uas khawb qhov ncej tsis tob. Thaum dej huam los ntaus lub tsev, lub tsev ntawd txawm vau thiab puastsuaj tas huv tibsi lawm” (Lukas 6:49).
Lus nug rau sawvdaws xav:
– Yauhanas thiab cov pejxeem qhia tshwm kev txiav txim siab ua raws tus Tswv tej lus samhwm zoo licas?
– Tus cevlus Yelemis qhia rau lawv paub tus Tswv tej lus teb yog licas?
– Lawv ua licas thaum hnov tej lus ntawd?
– Zaj kawm no muaj yam dabtsi ntsigtxog peb?
Txawm hais tias Yauhanas thiab tagnrho cov pejxeem tsis hais txog lawv tej kev txomnyem (nqe 2), los tus cevlus Yelemis yeej paub tseeb thiab qhov ntawd ua rau nws ntxhov siab. Nws coglus yuav thov tus Tswv pab lawv, thiab ib zaug ntxiv lawv qhia tshwm kev txiav txim siab ua raws tus Tswv tej lus los ntawm tej lus hais tias: “Txawm yog tej lus teb uas peb kom koj thov tus TSWV uas yog peb tus Vajtswv yuav haum peb siab thiab tsis haum los peb yuav mloog nws lus…” (nqe 6a), thiab lawv hais khov kho hais tias: “Thov tus TSWV ua timkhawv ncaj thiab tseeb rau peb” (nqe 5). Tiamsis kaum hnub tomqab, thaum tus cevlus Yelemis txais tau tus Tswv tej lus teb thiab muab piav qhia rau lawv ces txhua yam txawv tas. Tus Tswv qhia rau lawv paub hais tias Nws xav kom lawv nyob twjywm hauv lub tebchaws, Nws hais tias: “Yog nej txaus siab nyob hauv tebchaws no, kuv yuav tsis rhuav nej, tiamsis yuav pab kom nej vammeej; kuv yuav cog nej kom ruaj thiab tsis dob nej povtseg” (nqe 10). Tus Tswv coglus rau lawv hais tias Nws yuav nrog lawv nyob, cawm lawv dim, yog li ntawd lawv txhob ntshai tus vajntxwv uas kav tebchaws Npanpiloos (nqe 11). Tiamsis, yog lawv xav ua raws li lawv lub siabnyiam vim xav hais tias nyob hauv tebchaws Iziv yuav muaj noj muaj haus thiab muaj kev thajyeeb, ces tus Tswv qhia rau lawv paub hais tias tej uas lawv xav yuamkev lawm. Yog txiavtxim siab khiav mus tebchaws Iziv ces lawv yuav “…tuag tas rau hniav ntaj hniav riam lossis kev tshaib kev nqhis lossis kab mob kev nkeeg” (nqe 17).
Tsis muaj ib txojkev zoo siab twg rau tus thawjcoj sab kev ntseeg loj heev dua qhov uas pom cov pejxeem nrhiav ua raws Vajtswv lub siab nyiam. Tej zaum tus cevlus Yelemis zoo siab heev thiab puv npo kev cia siab thaum pom Yauhanas thiab cov pejxeem tuaj nrhiav nws taij thov tus Tswv. Tiamsis qhov uas txais tau tsuas yog kev dag xwb, qhov tseeb lawv yeej tsis xav ua raws li tus Tswv qhia (nqe 20-21). Vajtswv lo lus cogtseg tsis ua rau lawv kov yeej kev ntshai cia kom lawv txiav txim siab nyob hauv lub tebchaws. Qhov ntawd qhia pom hais tias lawv tsuas xav kom tus Tswv ua raws li lawv lub siabnyiam xwb, hais tau hais tias lawv xav kom tus Tswv yib raws li lawv kev txiav txim siab khiav mus nyob nram tebchaws Iziv, thiab thaum tsis ua raws li tus Tswv tej lus, lawv kuj tsis xav raug tus Tswv rau txim
Tu siab kawg li, tiamsis puas yog niaj hnub nimno peb kuj zoo ib yam li lawv thiab? Peb pheej thov tus Tswv pub koob hmoov lossis “ua siab ntev” rau tej uas peb twb txiav txim siab xws li nrhiav haujlwm, nrhiav txijnkawm, ua yam tsis raws li Vajtswv Txojlus qhia,… Peb xav kom “muaj raws li tus kheej siab nyiam” xwb, tsis xav kom “muaj raws li Leej Txiv lub siabnyiam”! Yuav tsum nrhiav ua raws tus Tswv lub siab nyiam, tsis txhob qhuab yuam tus Tswv ua raws li peb lub siab nyiam.
Thov Vajtswv,
Vajtswv! Thov pab nyuam yaus zeem paub hais tias nyuam yaus tsuas tau Koj pub koob hmoov thaum ua raws li Koj tej lus qhia, tsis yog tsuas mloog Koj tej lus cia li tso tseg. Amees.
Tus Tswv tabtom nyob qhov twg hauv peb tej kev txiav txim siab? Peb tabtom ua raws tus Tswv siab nyiam lossis tus kheej siab nyiam?
UA KOOB TSHEEJ NCO TXOG TUS TSWV MUS SAUM NTUJ, TUS TSWV COV MENYUAM ZOO SIAB VIM NWS TAU MUS THIAB TU CHAW TSEG RAU PEB NYOB SAUM NTUJ CEEBTSHEEJ UAS CI NTSA IAB, CIA LI TSHAJTAWM TXOJMOO ZOO RAU TXHUA TUS KOM SAWVDAWS TAU TXAIS TEJ KOOBHMOOV TUS TSWV PUB.
Nyeem Vajluskub hauv peb lub xyoos: Mathais 23
Kênh Youtube BHKTHN:
