Klei Aê Diê Blŭ: Y-Yêrêmi 42:4-22
Êlan kliăng: “Ƀiădah hlei pô hmư̆ leh anăn amâo gưt ôh klei Kâo blŭ, pô anăn jing msĕ si sa čô mnuih mdơ̆ng sang ti dlông lăn, amâo mâo atur ôh. Êa êtăng tlă sang anăn, sang anăn klưh mtam leh anăn rai jih.” (Y-Luk 6:49)
Klei êmuh ksiêm mĭn: Si ngă Y-Jôhanan leh anăn phung ƀuôn sang bi êdah klei digơ̆ ktưn ai ngă tui hlue klei Yêhôwa mtrŭn? Khua pô hưn êlâo Y-Yêrêmi brei thâo si klei Yêhôwa lŏ wĭt lač? Si ngă digơ̆ lŏ wĭt ngă mdjŏ? Ya klei hriăm anei bi djŏ hŏng drei?
Tơdah Y-Jôhanan leh anăn phung ƀuôn sang amâo bi êdah ôh klei dleh knap digơ̆ (êlan 2), Khua pô hưn êlâo Y-Yêrêmi ăt thâo klă leh mơh, leh anăn klei anăn bi ênguôt kơ ñu. Ñu ƀuăn srăng wah lač kơ Yêhôwa kyua digơ̆, leh anăn lŏ sa blư̆ digơ̆ bi êdah klei digơ̆ ktưn ai ngă klei Yêhôwa mtă hŏng klei lač: “Thâodah jing jăk amâodah jhat, hmei srăng gưt asăp Yêhôwa Aê Diê hmei…” (êlan 6a) leh anăn kat asei: “Brei Yêhôwa jing Pô hưn sĭt suôr bi kdơ̆ng hŏng hmei” (êlan 5). Ƀiădah tloh pluh hruê, tơdah Khua pô hưn êlâo Y-Yêrêmi mă tŭ klei blŭ mơ̆ng Yêhôwa leh anăn lŏ hưn kơ diñu snăn jih jang bruă mdê sơăi. Aê Diê brei diñu thâo Aê Diê čiăng diñu dôk hlăm čar, leh anăn tinăn Ñu “…srăng mdơ̆ng diih leh anăn amâo mdlưh diih ôh; Kâo srăng pla diih leh anăn amâo buč ôh” (êlan 10). Ñu ƀuăn rơ̆ng hŏng digơ̆ Ñu srăng dôk mbĭt leh anăn bi mtlaih digơ̆, kyuanăn amâo brei digơ̆ huĭ ôh kơ mtao Ƀaƀilôn (êlan 11). Mklăk wĭt, bi tơdah digơ̆ ăt čiăng ngă tui si klei digơ̆ pô čiăng kyua mĭn ti čar Êjip srăng mâo klei trei mđao leh anăn hdĭp hŏng klei êđăp ênang, snăn Yêhôwa brei digơ̆ thâo jih jang klei digơ̆ mĭn anăn amâo djŏ ôh sơăi. Čuăn nao kơ čar Êjip srăng brei digơ̆ tŭ klei “…djiê hŏng đao gưm, hŏng klei ư̆ êpa, leh anăn hŏng klei ruă tưp” (êlan 17).
Amâo mâo ôh klei mơak mkăn mđơr hŏng klei mơak pô gĭt gai hlăm klei hdĭp myang dưi ƀuh phung ƀuôn sang tui duah klei Aê Diê čiăng leh anăn gưt. Năng ai Khua pô hưn êlâo Y-Yêrêmi mơak snăk leh anăn bŏ hŏng klei čang hmăng tơdah ñu ƀuh Y-Jôhanan leh anăn phung ƀuôn sang hriê kơ ñu čiăng êmuh Yêhôwa. Ƀiădah boh tŭ jing sa klei luar, diñu amâo čiăng gưt sĭt ôh kơ ya klei Yêhôwa mtă (êlan 20-21). Klei Aê Diê ƀuăn rơ̆ng amâo bi luč ôh klei diñu huĭ čiăng bi mlih klei mĭn dôk hlăm čar. Klei anăn brei ƀuh diñu knŏng čiăng Aê Diê tŭ klei diñu mĭn, amâodah lač snei, diñu čiăng Aê Diê tŭ ư kơ klei diñu čuăn leh jing nao kơ čar Êjip, leh anăn tơdah amâo gưt ôh kơ klei Aê Diê mtă, diñu amâo čiăng mă tŭ ôh klei bi kmhal.
Ênguôt êdimi, ƀiădah djŏ mơ̆ hruê anei drei ăt jing msĕ snăn mơh? Drei ăt khăng akâo kơ Aê Diê tuh klei jăk jĭn amâodah “thâo săng brei” kơ jih jang klei drei tăm čuăn ngă hĕ msĕ si bruă knuă, ruah ƀĭng khăp, ngă bi mklăk hŏng klei Aê Diê mtă leh anăn lu klei mkăn đa đa. Drei čiăng “brei klei kâo čiăng srăng jing” amâo djŏ “brei klei Ih čiăng srăng jing ôh”! Tui duah bĕ klei Aê Diê čiăng leh anăn gưt, đăm mgô̆ Aê Diê tŭ ư tui si klei drei mĭn leh ôh.
Ti anôk Aê Diê dôk hlăm jih jang klei diih čuăn ngă? Diih dôk hdĭp tui si klei Aê Diê čiăng amâodah tui si klei diih pô čiăng?
Wah lač: Ơ Aê Diê! Đru kâo thâo kâo knŏng dưi mă tŭ klei jăk jĭn mơ̆ng Ih tơdah kâo gưt kơ klei Ih mtă hŏng jih ai tiê, amâo djŏ ôh knŏng hmư̆ leh anăn mplư kâo pô.
Dlăng Klei Aê Diê Blŭ hlăm tlâo thŭn: Y-Mathiơ 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
