II Xamuyees 19:31-40
Nqe cim:
“Cia kuv rov qab mus tsev thiab mus tuag ze kuv niam kuv txiv tej toj ntxa. Vajntxwv, ntawm no yog kuv tus tub Khihas, nws yuav yog tus tu koj; cia li coj nws nrog koj mus thiab koj xav pab nws li cas, los koj cia li pab nws raws li koj pom zoo” (II Xamuyees 19:37).
Lus nug rau sawvdaws xav:
– Vajntxwv Daviv hais licas rau yawg Npaxilais?
– Nws teb vajntxwv licas?
– Vim licas nws thov kom Vajntxwv Daviv coj nws tus tub Khihas nrog vajntxwv mus ?
– Peb kawm tau Npaxilais tus qauv licas rau hauv peb lubneej?
Axaloos uas yog vajntxwv Daviv tus tub ntxeev siab rau vajntxwv tiamsis raug swb lawm thiab nimno Vajntxwv Daviv tabtom npaj rov los hauv Yeluxalees. Vajntxwv nco txog Npaxilais tej txiaj ntsig uas tau pab nws thaum ntsib kev txomnyem, yog li ntawd vajntxwv caw nws nrog vajntxwv los hauv nroog Yeluxalees pub noj pub hnav thiab pauj txiaj ntsig. Ntawd yog ib qhov khoomplig loj heev ntawm Vajntxwv Daviv, thiab yog kam lees yuav, Npaxilais yuav tau txais tej ntawd thaum nws hnubnyoog laus lawm. Tsis ua li lwm tus lub siab xav, Npaxilais tsis kam lees yuav vim pom nws laus heev lawm, thiab nws kuj tsis xav ua nra hnyav rau Vajntxwv Daviv (nqe 35). Tsis tas li ntawd xwb, Npaxilais yeej tsis saib qhov uas pab Vajntxwv Daviv yog pab kom tau nqi zog, ntawd yog nws lub luag haujlwm (nqe 36). Thiab qhov zoo tshajplaws, yog nws paub lub sijhawm no yam nws cheemtsum yog dabtsi, nws thiaj paub nres kom yog sijhawm. Nws paub hais tias sijhawm no yog sijhawm npaj rau nws txojkev tuag, tsis yog npaj nrhiav kev muaj txiag npluanuj hauv nroog Yeluxalees (nqe 37).
Npaxilais tej lus teb qhia pom qhov zoo ntawm nws tus kheej. Npaxilais txo hwjchim thaum nws tsis saib tej uas ua rau vajntxwv yog ua kom tau nqi zog. Xav kom qhov kev xav no muaj nyob hauv tus Tswv cov menyuam txhua tus lub neej. Muaj coob tug ntseeg tau tus Tswv muab pub tej peevxwm, koob hmoov, tsimnyog yuav tsum siv los ntawm lub siab txo hwjchim los mus ua tus Tswv haujlwm tiamsis lawv ho khavtheeb, ua kom luag lwm tus paub txog lawv, ua lawv tsaug thiab saib taus lawv. Coob tug tsis tau txais koob hmoov thaum hnov qab nqe Vajluskub uas hais tias: “Txawm yog tus tubtxib ua raws li nej hais los tsis tas nej yuav ua nws tsaug?” (Lukas 17:9). Dr. William H. Marty tau hais tias: “Vajtswv tsis tshuav kuv ib qhov nqi; qhov uas yog, ces yog kuv tshuav Nws nqi rau txhua yam.”
Tsis xav los nyob hauv nroog Yeluxalees tiamsis Npaxilais tau thov kom nws tus tub uas yog Khihas tau ua haujlwm pub rau vajntxwv. Puas yog Npaxilais cia nws tus tub mus txais tej koob hmoov hloov nws chaw? Lo lus nws hais nyob hauv nqe 37b: “Koj xav pab nws li cas, los koj cia li pab nws raws li koj pom zoo” qhia pom hais tias Npaxilais tsis qhuab yuam kom Vajntxwv Daviv ua dabtsi, nws tsuas xav kom nws tus tub tau ua haujlwm pab vajntxwv xwb.
Npaxilais yog tus neeg paub siv tej uas nws muaj kom muaj nqis rau tus Tswv, thiab kuj yog tus neeg paub npaj kom lwm tus tau ua haujlwm ncaj ncees thiab tawg paj txi txiv li nws. Xav kom peb txhua tus puav leej muaj tej kev xav zoo li Npaxilais, ntawd yog zeem paub tus kheej muaj nrim thiaj paub nres kom yog sijhawm, paub thaub qab thiab tseg chaw rau phaum neeg tshiab.
Thov Vajtswv,
Tus Tswv, nyuam yaus ua Koj tsaug vim muaj cov neeg ua qauv zoo li yawg Npaxilais. Thov pab nyuam yaus paub ua lub neej txo hwjchim, tas siab siv tej koob hmoov Koj pub kom ua tau Koj tes haujlwm raws li Koj lub siab nyiam. Amees.
Peb puas txaus siab nres thiab mus raws li raws li tej koob hmoov tus Tswv muab pub lawm tau?
Nyeem Vajluskub hauv peb lub xyoo: Xefaniyas 1
Kênh Youtube BHKTHN:
