Klei Aê Diê Blŭ: II Y‑Samuel 19:31-40
Êlan kliăng: “Kâo akâo kơ ih, brei dĭng buăl ih lŏ wĭt, čiăng kơ kâo dưi djiê hlăm ƀuôn kâo pô, giăm msat ama kâo leh anăn amĭ kâo. Ƀiădah nĕ tinei dĭng buăl ih Y‑Čhimham; brei ñu găn nao mbĭt hŏng khua kâo mtao, leh anăn ngă bĕ kơ ñu tui si ih mĭn jăk.” (II Y‑Samuel 19:37)
Klei êmuh ksiêm mĭn: Ya klei Mtao Y‑Đawit kwưh kơ Y‑Ƀarsilai? Si ngă ñu lŏ wĭt lač kơ mtao? Ya ngă ñu akâo brei anak ñu Y‑Čhimham nao mbĭt hŏng Mtao Y‑Đawit? Si drei mă yua knuih Y‑Ƀarsilai dôk dơ̆ng ƀơ̆ng huă kơ drei pô?
Klei Y‑Apsalôm anak êkei mtao bi kdơ̆ng dlưh rai kluôm dhuôm leh anăn Mtao Y‑Đawit dơ̆ng lŏ wĭt kơ sang mtao ñu. Mtao hdơr knga kơ Y‑Ƀarsilai đru leh ñu hlăm klei knap mñai, snăn mtao jak ba ñu wĭt kơ ƀuôn Yêrusalem čiăng čiêm rông leh anăn bi wĭt klei jăk. Sĭt nik anei jing mnơ̆ng lŏ wĭt lač jăk prŏng êdimi mơ̆ng Mtao Y‑Đawit, leh anăn tơdah ñu tŭ ư, Y‑Ƀarsilai srăng dưi dưn yua hlăk ñu mduôn. Mdê hŏng klei mĭn lu mnuih, Y‑Ƀarsilai hngah kyuadah ñu ƀuh kơ ñu mduôn snăk leh, leh anăn msĕ mơh, ñu amâo čiăng bi ktrŏ kơ Mtao Y‑Đawit ôh (êlan 35). Ti djiêô anăn, Y‑Ƀarsilai amâo dlăng kơ klei ñu đru Mtao Y‑Đawit jing bruă ngă čiăng mâo klei mưn pah ôh, anăn jing knŏng bruă răng čuăn kơ ñu pô (êlan 36). Leh anăn dlưn hĭn kơ jih jang, ñu thâo ya dŏ ñu čiăng ară anei hin snăn ñu mjưh leh djŏ mông. Ñu thâo anei jing mông mprăp êmiêt kơ klei ñu djiê amâo djŏ mông duah klei mdrŏng sah kdrưh kơang hlăm anôk ƀuôn prŏng ôh (êlan 37).
Klei Y‑Ƀarsilai hngah brei drei ƀuh knuih jăk ñu. Ñu bŏ hŏng klei luă gŭ tơdah ñu amâo yap ai ôh jih klei ñu ngă leh kơ mtao. Čang hmăng klei mĭn msĕ snei dưi bi lar hlăm klei hdĭp grăp čô phung anak čô Khua Yang. Mâo lu phung đăo Aê Diê brei leh kơ diñu klei thâo, klei brei mdê mdê, tui si djŏ diñu srăng yua klei brei anăn hŏng klei luă gŭ pioh mă bruă kơ Aê Diê, ƀiădah lĕ diñu jing hĕ mnuih mgao, čiăng mâo klei arăng yap, klei hdơr knga leh anăn klei mpŭ. Lu mnuih bi luč klei jăk jĭn kyua wơr bĭt hĕ klei anei: “Ñu srăng bi mni mơ̆ kơ dĭng buăl anăn kyuadah gơ̆ ngă klei ñu mtă leh?” (Y‑Luk 17:9). Pô hriăm êlam William H. Marty lač leh snei: “Aê Diê amâo tuôm đuôm nư kâo sa tŭt mta mnơ̆ng ôh; djŏ hĭn, kâo đuôm nư ñu jih jang klei.”
Wăt tơdah Y‑Ƀarsilai hngah nao kơ ƀuôn Yêrusalem dưn ƀiădah ñu kwưh akâo kơ Mtao Y‑Đawit brei anak ñu Y‑Čhimham nao mbĭt kăp mă bruă kơ mtao. Djŏ mơ̆ Y‑Ƀarsilai brei anak ñu mă tŭ klei pah mưn hrô kơ ñu? Klei ñu lač hlăm êlan 37b “leh anăn ngă bĕ kơ ñu tui si ih mĭn jăk” brei drei ƀuh Y‑Ƀarsilai amâo tuôm bi ktrŏ klei mĭn Mtao Y‑Đawit ôh, ñu knŏng čiăng anak ñu čuê klei sĭt suôr ñu kăp mă bruă kơ mtao đuč.
Y‑Ƀarsilai jing mnuih thâo yua jih jang mnơ̆ng ñu dưn mâo boh tŭ dưn tui si klei Aê Diê čiăng, leh anăn ñu jing mnuih thâo mprăp kơ mnuih mkăn mŭt hlăm klei mă bruă hŏng klei sĭt suôr leh anăn mâo boh tŭ dưn msĕ si ñu pô mơh. Hmăng hmưi kơ jih jang phung drei srăng hdĭp msĕ si klei Y‑Ƀarsilai mĭn anei sơăi, anăn jing hlăk drei thâo kral knhal drei snăn brei drei thâo mjưh djŏ mông, thâo kdŭn wĭt mtluôn jing anôk pioh kơ phung gưl ênuk êdei.
Si ngă drei “kăp dôk, kăp nao tui si Ñu gai” mơ̆?
Wah lač: Ơ Khua Yang, kâo bi mni kơ Ih kyua klei hdĭp phung mnuih mduôn msĕ si Y‑Ƀarsilai. Đru kâo hdĭp thâo luă gŭ, jih ai tiê yua jih jang klei Ih brei pioh mă bruă tui si Ih čiăng.
Dlăng Klei Aê Diê Blŭ hlăm tlâo thŭn: Y‑Sôphôni 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
